JOBO 20

₂A thi tsha kona u konḓelela;

ndi ḓo fhindula;

ndo dinalea, ndi vho fhela mbilu.

₃Ni tshi amba nga u ralo ni khou ntsema;

ndi na ṱhalukanyo,

ndi ḓo ni fhindula.

₄A ni zwi ḓivhi uri u bva mathomoni,

tshee muthu a vhewa fhano fhasi,

₅a hu na muvhi we a ḓiphiṋa u ya thambo naa?

Dakalo ḽa a no nyadza Mudzimu a ḽi lengi u fhela.

₆A nga vha na bvumo ḽa guma lutomboni,

ṱhoho yawe ya kwama makole;

₇u ḓo lovha unga mupfudze wawe, vhane vha mu ḓivha vha si ḓivhe he a ya.

₈U ḓo fhufha unga muloro a si tsha wanala;

u ḓo ngalangala unga bono ḽa vhusiku,

₉ḽiṱo ḽe ḽa vhona bono iḽo ḽa si tsha ḽi vhona;

u ḓo vuwa a si tsheeho.

₁₀Vhana vhawe vha ḓo vhuedzedza

zwe a tswela vhashai;

zwanḓa zwawe zwo fanela u humisa lupfumo lwawe.

₁₁Muvhili wawe wo vha u muswa, u na nungo,

hone u ḓo ṱuwa u tshi vha buse.

₁₂Vhuvhi vhu a mu ḓifhela

lune a vhu khuba mulomoni,

₁₃a muṋedza nga zwiṱuku, a si tende vhu tshi ṱavhanya u fhelela.

₁₄Hone thumbuni yawe zwiḽiwa zwi a shanduka,

zwa kalakata unga vhuṱungu ha ṋowa.

₁₅Lupfumo lwe a mila, u a lu ṱanza;

Mudzimu u mu ṱanzisa lwone.

₁₆U ḓo nga o mama vhuṱungu ha ṋowa,

a nga ó lumiwa nga vuluvulu, a fa.

₁₇Ha tsha ḓo ḓiphiṋa nga milambo i elaho mapfura,

na milambwana yo ḓalaho mutoli na luvhomba.

₁₈Zwe a zwi bvela biko,

u ḓo zwi humisa zwi songo ḽiwa;

ha nga ḓiphiṋi nga mbuelo dza bindu ḽawe.

₁₉Hufha o kandeledza vhashai a vha ṅaledza,

a dzhia nnḓu dzo fhaṱwaho nga vhaṅwe.

₂₀U a phaga, ha furi;

lupfumo lwe a khokha lu nga si mu tshidze.

₂₁A tshi ḽa ha sii;

mashudu awe ha nga yi thambo.

₂₂U ḓo ri a tshi kha ḓi ḽa a tshi fura,

a welwa nga khombo, a ḓelwa nga maṱungu mahulu.

₂₃Litshani a ḽe a fure –

Mudzimu u ḓo sinyuwa a mu laṱisa,

a tou mu nisela mavili.

₂₄U ḓo ri a tshi shavha pfumo ḽa tsimbi,

a pfulwa nga musevhe wo poswaho nga vhura ha musinaseṱha.

₂₅U ḓo ri a tshi u ṱomola muṱanani wawe,

ṱhodzi i penyaho a i ṱomola kha tshavhuṱungu,

a welwa nga zwi ofhisaho.

₂₆Zwoṱhe zwe a vhulunga zwi ḓo phusukanywa;

u ḓo fhiswa nga mulilo

u songo vhudzedzwaho nga muthu,

thundu yo salaho nḓuni ya swa ye lore.

₂₇Ḽiṱaḓulu ḽi ḓo dzumbulula vhuvhi hawe,

na ḽifhasi ḽi ḓo ṱanzilela ḽa mu laṱa;

₂₈thundu i re nḓuni yawe i ḓo kumbiwa

nga muḓalo wa maḓi,

musi wa mbiti dza Mudzimu.

₂₉Mudzimu u livhanya vhavhi na zwo raloho;

ndi ḽone ifa ḽe a vha dzudzanyela.