JOBO 19

_1-2Ni ḓo litsha lini u nṱhavha mbilu?

Uvhani ni tou mpaḓukanya nga maipfi aṋu;

₃ni ḓi endela u ntsema, na nndevhela,

na u shona a ni shoni.

₄Nangwe ndo khakha zwanga,

inwi zwi ni dina ngani?

₅Arali ni tshi ḓiita vhahaṱuli vhanga,

dambulo ḽanga í yone ṱhanzi yaṋu,

₆ḓivhani-ha uri ndo khakhelwa nga Mudzimu;

ndi Ene o ntandaho nga mambule awe.

₇Ndi tshi ṱavha mukosi ndó huvhadzwa,

a hu na phindulo;

nda luvhelela, nda si haṱulwe.

₈Mudzimu o dzivha nḓila,

a thi koni u fhira;

nḓila yanga o i tiba nga swiswi;

₉o mmvula vhugala, a mmvisa mvumbo;

₁₀u nkovhola thungo dzoṱhe,

ndo fhela;

o tupula fulufhelo ḽanga unga muri;

₁₁u nndyela vhuhali,

u nnyita swina ḽawe;

₁₂mbiti dzawe dzo bva pfumo,

dzo ḓa u dia nṋe,

dzo govhela nnḓu yanga.

₁₃O nnduṱanya na vha hashu;

khonani dzanga dzi vho nnyita mutsinda;

_14-15mashaka anga na ṱhama dzanga vho nṱamba;

vhe vha dala nḓuni yanga vho nkhangwa;

vhashumi vhanga vha vhasidzana vha ntsedza unga mutsinda;

₁₆ndi tshi vhidza phuli yanga,

a i aravhi,

ndi fanela u tou i luvhelela;

₁₇musadzi wanga ha koni u konḓelela mufemo wanga;

vhana vha mme anga vha ri ndi a nukha;

₁₈na vhana vhaṱuku vha a nnyadza,

nda takuwa vha a kwetedzana;

₁₉khonani dzanga dza mbiluni dzi a nnengwa;

vhe nda vha ndi tshi vha funa vho ntshandukela;

₂₀ndo fhela, ndo sala ndi lukanda na marambo;

ho tou sala dethele fhedzi.

₂₁Khonani dzanga, a ni mpfeli vhuṱungu naa?

Ndi ri mpfeleni vhuṱungu nandi;

tshanḓa tsha Mudzimu tsho nthwa!

₂₂Ndi mini Mudzimu a tshi ri u ntovhola na inwi na ntovhola?

A ni athu pfelela u ntambudza naa?

₂₃Ngavhe maipfi anga haya a tshi ṅwalwa!

Ngavhe a tshi tou ṅwalwa buguni!

₂₄Ngavhe a tshi ṅwalwa kha mutobvu nga luunzhi,

zwa tou korwa kha tombo,

zwa dzula zwi hone lini na lini!

₂₅Nṋe ndi a zwi ḓivha uri

Mulifheli wanga u a tshila;

u ḓo fhedza nga u ḓa a kunda ḽifhasi.

₂₆Nangwe lukanda lwanga lu tshi ḓo vha lwo no ṱahala,

ndi ḓo vhona Mudzimu ndí kha muvhili wonouno,

Mudzimu ndi ḓo mu vhona.

₂₇Ndi ḓo mu vhona nga anga maṱo, e si a muṅwe;

mbilu yanga i nyengela zwenezwo!

₂₈Arali na ri, “Ri nga mu tovhola hani,

vhunga a tshi tambudzelwa vhuvhi hawe?” –

₂₉zwino-ha ofhani pfumo ḽo ni sumbaho;

mbiti dza Mudzimu dzi swiela vhavhi nga pfumo,

ndi hone ni tshi ḓo ḓivha uri hu na khaṱhulo.