JOBO 18

₂Jobo, a ni koni u vhuya na fhumula-vho naa?

Ni ri tshete, ri ambe-vho, ni thetshelese.

₃Ndi mini ni tshi ri ita dziphukha?

Ni ri itelani matsilu?

₄Ni khou tou ḓivhaisa nga mbiti dzaṋu.

Ni ḓo ri u sinyuwa vhathu vha pfuluwa shangoni naa?

Kani-ha ni vhona unga zwikwara zwi ḓo sudzuluwa?

₅Nṋe ndi ri tshedza tsha muvhi tshone tshi ḓo dzima;

tshivhasoni tshawe

a hu tsha ḓo duga khavhu;

₆nḓuni yawe a hu nga vhi na tshedza;

luvhone lwawe lu ḓo dzima.

₇A tshi tshimbila ho vha hu tshi pfala mutsindo,

hone zwino u vho pepeleka;

o ḓifasha nga vhukwila hawe;

₈o longa mulenzhe tshikwekweni;

khunḓa yo fasha muvei;

₉tshilibana tsho mu fasha tshirethe;

tsho ganedza a fashwa;

₁₀o retshelwa tshikwekwe ngomu mavuni;

nḓilani yawe ho rewa mulavhu.

₁₁O tangwa nga ḓuvha na mulilo;

a zwi mu humeli;

₁₂o kulea nungo nga nḓala;

khombo yo lindela u mu mila;

₁₃dwadze ḽi ḽa lukanda lwawe;

tanzhe ḽa lufu ḽi ḽa miraḓo yawe.

₁₄U kwatulwa, a bviswa nḓuni he a vha o dzumbama,

a khwikhwidzelwa ha khosi ya zwi ofhisaho,

₁₅hayani hawe ha hashwa tsevhela,

hu si mele tshithu,

₁₆midzi yawe ngeno fhasi yó oma,

ngei nṱha matavhi ó puta,

₁₇bvumo ḽawe fhano shangoni ḽa fhela,

dzina ḽawe ḽa si tsha humbulwa.

₁₈U thathiwa shangoni,

a pandelwa tshedzani a shavhela swiswini.

₁₉Ha na na ṅwana;

he a vha a tshi dzula ho ngo sia na muthu.

₂₀U bva vhubvaḓuvha u swika vhukovhela,

vha no pfa zwe a livhanywa nazwo vha tetemela nga nyofho.

₂₁Vhavhi vha livhiwa nga zwo raloho;

vha sa londi Mudzimu vho fanelwa nga zwenezwo.