JOBO 17

₁Ndi vho fa,

muya wo pwashekana,

ho sala tshalo fhedzi.

₂Ngoho ndo tingwa nga vhagoḓi;

a vha nkhumeli.

₃Ndi ḓo ambelwa nga nnyi ha Iwe?

Nga a vhe Iwe muṋe.

₄Wo vha dzhiela ṱhalukanyo;

u songo tenda vha tshi nkunda.

₅Zwi nga munna a no kovhela khonani dzawe vhuṱali,

ngeno vhana vhawe vho kovhedza maṱo nga nḓala.

₆Mudzimu o nnyita tshianeo;

ndi pfelwa mare khofheni.

₇Ndo ṱoḓou pofula nga u ḽa mbilu;

miraḓo yanga yo fhelela,

ndo sala ndi murunzi.

₈Avha vha no ḓiita vha si na vhufhura,

vha tshi zwi vhona vha a tshenuwa;

vha si na mulandu vha tshi vhona nṋe muvhi,

vha a dinalea.

₉Naho zwo ralo, a no thetshelesa Mudzimu ha pambuwi nḓilani yawe;

wa zwanḓa zwi si na tshika u ḓi wana nungo a tshi ya.

₁₀Hone naho inwi na ḓa noṱhe na ima phanḓa hanga,

a thi nga wani muṱali na muthihi kha inwi.

₁₁Maḓuvha anga o fhela;

hu maano anga,

hu zwine mbilu ya tama,

zwoṱhe zwo pfuvha.

₁₂Khonani dzanga dzi tshi vhona vhusiku

dzi ri ndi masiari;

vha tshi vhona swiswi vha ri ḽi vho tsha.

₁₃Ndi kha ḓi lavhelelani?

Hayani hanga ndi tshalo,

hune nda ḓo adza thovho yanga swiswini.

₁₄Tshalo ndi ḓo ri ndi tshone khotsi anga,

mme anga na khaladzi anga ndi mbungu.

₁₅Zwino fulufhelo ḽanga ḽi ngafhi-ha?

Ndi nnyi ane a ḽi vhona?

₁₆Kani ḽi ḓo ntevhela ndi tshi tsela vhudzulavhafu?

Ri ḓo dzhena roṱhe buseni?