JOBO 16

_1-2Ndo no ḓi pfa manzhi o raloho.

Inwi ni tshi ri ni a nkhuthadza,

ndi hone ni tshi nkula nungo.

₃Nṋa ni tshi ravhaḓa ni ḓo sokou ela ni sa gumi?

Ni dinwa ngani ni tshi vhuya na fhindula?

₄Arali no vha ni tshi nga nṋe,

nṋe ndi tshi nga inwi,

ndo vha ndi tshi ḓo ḓi amba zwoṱhe zwine na amba.

Ndo vha ndi tshi nga ḓi ni shoshela nga maipfi,

nda ni dzungudzela ṱhoho nga lunyadzo.

₅Ndo vha ndi tshi ḓo amba a u ni khwaṱhisa,

hone i si vhe khuthadzo ya mulomo fhedzi.

₆Ndi tshi amba a zwi mpfarisi tshithu,

na u fhumula a zwi dzikisi vhuṱungu hanga.

₇Mudzimu, wo nṱahadza,

wo lozwa muṱa wanga;

₈wo nzhongondedza nda sala ndi mukumba na marambo,

ndi zwine vhathu vha ri ndi na mulandu.

₉Wo nthathekanya wo sinyuwa;

u tshi mmbona u shenganya maṋo nga mbiti;

u tou nnzwondolola wa nnyita swina.

₁₀Vhathu vha a nnzhonzhowedza,

vha ntshata mpama nga lunyadzo,

vha a nthathedza.

₁₁Mudzimu o nkumedza mavemu;

o mposela vhavhi, vha mpfara vhe ndwa.

₁₂Ndo vha ndi tshi tshila nga mulalo,

a mpfara nga mikulo,

a nndevha nde mbala;

u nnyita tshipfuliwa,

₁₃a mposa nga misevhe thungo dzoṱhe,

a ita tshiṱuhu a mpfula tswio, a shululela ndulu yanga fhasi;

₁₄u nkhuvhadza a dovha; u nngwela unga muhali.

₁₅Ndi khou lila:

ndo rungelela saga nṱha ha lukanda lwanga;

ndi khou tsumbudzea mavuni.

₁₆Ndo lila nda tswukisa maṱo; maṱo anga o swifhala.

₁₇Ndo pfalwo ndi si na mulandu wa vhuvemu,

na thabelo yanga i si na muhoyo.

₁₈Iwe ḽifhasi, u songo fukedza malofha anga;

mukosi wanga kha u ḓi pfala.

₁₉Ṱhanzi yanga i makoleni,

i ima na nṋe i henengei ṱaḓulu.

₂₀Khonani dzanga dzi a nngoḓa;

Mudzimu Ene u vhona miṱodzi yanga i tshi tevhuwa.

₂₁Ndi ṱoḓa wa u mphuphuthela kha Mudzimu,

a nga muthu a tshi phuphuthela khonani yawe.

A songo lenga.

₂₂Hu tshee ho sala miṅwaha i si gathi,

ndi ḓo ṱuwa ndi tshi fara lwendo, nda ya hu sa humiwi.