JOBO 15

₂Jobo, a no ngo amba tshithu;

a hu na na muṱali na muthihi

a no amba zwi sa pfali unga inwi,

₃a ḓilamulela nga maipfi a sa ambi tshithu,

a sokou anza nyambo i si na mushumo.

₄Ni ita uri vhathu vha si tsha ofha Mudzimu,

vha mu nyadze.

₅Vhuvhi haṋu vhu pfala nga zwine na amba;

ni khou dzumbama nga vhukwila.

₆A si nṋe a no khou ni laṱa,

inwi muṋe ni khou laṱwa nga maipfi aṋu,

ṱhanzi i no ni laṱa ndi mulomo waṋu.

₇Kani o rangaho u bebwa ndi inwi?

Mudzimu a tshi vhumba dzithavha no vha ni hone?

₈Kani no zwi pfa a tshi dzudzanya zwoṱhe?

Vhuṱali vhu na inwi ni noṱhe kani?

₉Zwoṱhe zwine na zwi ḓivha, riṋe a ri zwi ḓivhi-vho?

Ndi ifhio nḓivho yaṋu ine ri si vhe nayo?

₁₀Ro guda vhuṱali kha vhakalaha vho tshenaho mmvi,

vha re na makole a no fhira a khotsi aṋu.

₁₁Mudzimu a tshi ni khuthadza ni zwi nyadzelani?

Hufha ro mu ambela nga maipfi a vhulenda.

₁₂Mbilu yaṋu i ni isa kule;

ni ri lavhelesa no sinyalala.

₁₃Ni sinyutshela Mudzimu,

na shulula maipfi o raliho!

₁₄Ndi nnyi wa mbilu yo ṱambaho?

O bebwaho nga musadzi ndi nnyi a re muvhuya?

₁₅Hufha Mudzimu na vharuṅwa vhawe

a sa vha fulufhedzi,

na vha ṱaḓulu a tshi vha sedza u vhona mbilu dzavho dzi songo ṱamba;

₁₆muthu ene, Mudzimu a nga mu vhona o ṱamba hani?

Hufha a tshi nengisa, o tshinyala,

a tshi tshinya a sa zwi pfi,

zwa nga ndi u nwa maḓi.

₁₇Zwino thetshelesani ndi ni funze;

ndi ḓo ni vhudza zwe nda vhona nga anga maṱo.

₁₈Vhaṱali vho mpfunza ngoho ye vha pfa nga vhokhotsi avho,

a vho ngo vhuya vha dzumba zwiphiri.

₁₉Shango ḽo vha ḽi tshee ḽavho vhe vhoṱhe,

vhá songo vangana na vhannḓa.

₂₀Muvhi u kandeledza vhaṅwe,

hone u dzula nga nyofho vhutshilo hawe hoṱhe,

nga u ḓivha uri a nga si pfuke ḓuvha ḽawe.

₂₁Nḓevheni dzawe hu dzula hu tshi pfala mikosi i ofhisaho;

a tshi tou ri, ndi a ḓiphiṋa, mavemu a a mu wela.

₂₂Ha fulufheli uri u ḓo vhuya a ponyoka swiswi;

tshawe hu ḓo vha u ḽiwa nga pfumo;

₂₃maanga o lindela tshitumbu tshawe;

u a ḓivha uri o lindelwa nga swiswi;

₂₄u ofhiswa nga khombo na maṱungu,

zwa mu wela unga khosi khulu i tshi yo dia.

₂₅Munna ane a sumba Mudzimu nga vili,

a imedzana na Ramaanḓaoṱhe, o livhiwa nga zwenezwo.

_26-27O angula, a bva na tshiḽelo,

ndi zwine a vho omisa mutsinga,

a takusa tshiṱangu tshawe,

a gidimela u yo lwa na Mudzimu.

₂₈Ndi ene munna we a yo dzula matumbani,

a dzhia nnḓu dzo ṱutshelwaho nga vhaṋe vhadzo,

marubi e a phusukanywa a pfi a songo tsha vuswa,

ene a a vusa a sa londi uri o teketelwa nga Mudzimu.

₂₉A nga si tsha pfuma a ya thambo;

thundu yawe a i tsha ḓo vha hone;

thakha yawe a i tsha ḓo ḓala shango.

₃₀Swiswi ha nga ḽi ponyoki;

u ḓo nga muri une matavhi awo a swa nga mulilo;

u ḓo hwalwa nga mufemo u bvaho mulomoni wa Mudzimu.

₃₁Ane a ḓifhura nga u fulufhela mahandana,

u ḓo pfufhiwa nga one mahandana.

₃₂U ḓo nga davhi ḽine ḽi si tsha ḓo ṱuma lurere,

a puta tshifhinga tshawe tshi sa athu swika.

₃₃U ḓo nga munḓirivhe u no moḓisa magaga,

a nga muolivi une wa fhufhura maluvha.

₃₄A nyadzaho Mudzimu u ḓo shaya vhana;

mahaya o fhaṱwaho nga tshanḓanguvhoni

a ḓo tou lore.

₃₅Ndi vhone vha no vhifha muvhilini

nga vhunwa, vha beba vhuvhi,

vha wana vho ḓifhura.