JOBO 14

₁Muthu o bebwaho nga musadzi

u tshila maḓuvha a si gathi,

ha wani mulalo;

₂u ri u aluwa a mbo ḓi puta unga dzuvha;

u fhira nga luvhilo unga murunzi u tshi vhuya.

₃Mudzimu, tshithu tsho raloho u tshi londelani?

U ḓidinelani nga u nnyisa tsengoni wa nkhaṱhula?

₄Hufha u tshi ḓivha uri muthu ndi muri u vhavhaho,

a nga aṋwa hani mitshelo i ḓifhaho?

₅Maḓuvha a vhutshilo ha muthu a dzula o vhalwa,

na miṅwedzi ine a ḓo tshila;

Iwe wo mu vhetshela mikano,

a nga si i pfuke.

₆Lavhelesa thungo, u mu litshe,

ḽi kovhele zwaḽo e mutholiwa.

₇Muri wó reṅwa u a ḓi vha na fulufhelo;

u a vuwa wa mela maḓadzwane.

₈Nangwe midzi yawo yo no vha ya kale,

tshiguthe tshawo tshó no fela mavuni,

₉wá wana maḓi u a simuwa,

wa ṱuma lurere unga tshimela tshiswa.

₁₀Muthu ene a fa zwo fhela;

u ri u fa a yafhi?

₁₁Milambo i nga vhuya ya xa,

lwanzhe lwa vhuya lwa oma,

₁₂muthu a sa athu vuwa tshee a fa.

Lutombo lu tshi kha ḓi vha hone a nga si vuwe;

a nga si vhuye a tsukunyea o eḓela.

₁₃Ngavhe u tshi nnzumba vhudzulavhafu,

nda dzumbama mbiti dzau dza vhuya dza dzika,

wa konou vhea ḓuvha ḽine wa ḓo nnyelelwa ngaḽo.

₁₄Huno muthu a fa u a dovha a tshila naa?

Maḓuvha oṱhe ndi tshee ndo hwala hoyu muhwalo

ndi ḓo lindela ndi vhuye ndi rulwe.

₁₅Ndi hone u tshi ḓo mmbidza nda aravha,

wa takadzwa nga nṋe tshisikwa tshau.

₁₆Zwenezwo u ḓo ri u tshi londa vhuṱala hanga,

wa si tsha londa he nda bvisa mulenzhe nḓilani.

₁₇Vhutshinyi hanga u ḓo vhu shatela khalini,

wa tiba vhuvhi hanga.

₁₈Thavha dzi a ḓi korea dza wa,

nngwa dza sudzuluswa vhudzuloni hadzo,

₁₉maḓi a ṱahadza matombo,

mvula dza mikumbela dza kumba mavu;

na zwe vhathu vha fulufhela,

Iwe u zwi lozwa nga u ralo, vha fulufhuwa.

₂₀U kuyekanya muthu a si tsha vha hone,

wa rivhisa tshifhaṱuwo tshawe a fa.

₂₁Vhana vhawe vha sala vha tshi huliswa,

ene a si zwi ḓivhe;

nangwe vha tshi shoniswa, a si zwi pfe.

₂₂Tshine a tshi pfa ndi vhuṱungu ha muvhili wawe na u vhavha ha mbilu yawe.