JOBO 13

₁Zwoṱhe zwine na amba ndo no ḓi zwi vhona,

ndo no ḓi zwi pfa, ndo no ḓi zwi ṱalukanya.

₂Zwine na zwi ḓivha, na nṋe ndi a zwi ḓivha,

a ni mphiri.

₃Nṋe a thi khou amba na inwi,

ndi khou amba na Ramaanḓaoṱhe,

ndi ṱoḓa u hanedzana na Mudzimu.

₄Inwi ni pila u shaya nḓivho haṋu nga mazwifhi;

noṱhe ni dziṅanga dzi sa fhodzi muthu.

₅Ngavhe ni tshi ḓifhumulela zwaṋu,

vhathu vho vha vha tshi nga ḓo ḓi ri no ṱalifha.

₆Thetshelesani ndi tshi hwedza mulandu wanga,

ni pfe vhuṱanzi hanga.

₇Ni zwifhelani?

Nṋa ni nga ambela Mudzimu nga mazwifhi?

₈Ni nga ri ni tshi ambela Mudzimu

na ita tshiṱalula?

Ndi nnyi we a ri ni mu sengele khoroni?

₉Arali a ṱola mbilu dzaṋu a nga wana tshivhuya?

Ni vhona unga ni nga mu fhura unga ni tshi fhura vhathu?

₁₀Nangwe tshiṱalula tshaṋu tsho dzumbama,

ha nga litshi u ni kaidza.

₁₁Vhuhulu hawe a vhu ni ofhisi?

Ni tshi mu elekanya a ni tetemeli?

₁₂Mirero yaṋu ndi milora,

i fhufha na muya;

nyambo yaṋu i ṋoka unga vumba.

₁₃Ni tshete ndi ambe;

zwi nngwelaho kha zwi nngwele.

₁₄Ndi ḓo luma mbilu nda amba,

naho ndi tshi khou dembelela nga lwatsi.

₁₅Nangwe Mudzimu a tshi ḓo mmbulaha –

ndi tshee ndo lavhelela Ene

uri ndi livhane nae tsengoni.

₁₆Nda ralo ndi nga tshidzwa;

muvhi ha livhani na Mudzimu.

₁₇Zwino thetshelesani ndi ṱalutshedze;

kolongonyani nḓevhe dzaṋu ni pfe.

₁₈Ndo lindela u ḓisengela,

hufha ndi tshi ḓivha uri ndi ngohoni.

₁₉Ha ḓa ane a ḓo livhana na nṋe tsengoni,

a mphindula, ndi ḓo fhumula nda ḓifela.

₂₀Mudzimu, litsha ndi humbele zwithu zwivhili,

ndi hone ndi sa ḓo u dzumbama:

₂₁Nkhumele!

U songo mmbulaha nga nyofho!

₂₂Nkhwelele, ndi ḓo fhindula,

kana nṋe ndi ambe,

Iwe u fhindule.

₂₃Vhuvhi hanga ndi vhufhio?

Ndo tshinyani?

Ndi pomokelwani? Ntsumbedze vhutshinyi hanga!

₂₄Khefha u tshi nnzumbama

wa nnyita swina ḽau?

₂₅U nga endela u shushedza ṱari ḽi fhufhaho nga muya?

U nga pandamedza mathukhwi?

₂₆U mmbetshela ṱhamu i vhavhaho,

wa nthwela zwe nda ita ndi tshee muṱuku.

₂₇Wo mpata milenzhe nga tshipato;

u sedza zwoṱhe zwine nda ita,

wa londa vhuṱala hanga.

₂₈Ndi zwe nda ṱahala unga vongori,

nda nga nguvho yo ḽiwaho nga tsole.