VHARANGAPHANḒA 16

₁Muṅwe musi Simisoni a ya muḓini wa Vhafilista wa Gaza, henefho a ṱangana na musadzi wa phombwe, a mu dzhenisa nḓuni. ₂Vhathu vha Gaza vha pfa uri Simisoni u henefho, vha tanga afho fhethu, vha mu lalela vhusiku hoṱhe khoroni ya muḓi. Vha tou tshete vhusiku hoṱhe, vha tshi ri, “Ri ḓo mu lindela ḽi vhuye ḽi tshe, ra konou mu vhulaha.” ₃Hone Simisoni a tou lala u swika vhukati ha vhusiku fhedzi, a mbo vuwa, a fara mahothi a khoro ya muḓi, khathihi na phuphu mbili, a zwi tupula, khathihi na khoṋo na zwoṱhe, a zwi hwala nga mahaḓa, a zwi isa muṱumbani wa muvhundu wo livhanaho na Hebroni.

₄Ngavhuya Simisoni a funana na musadzi we a vha a tshi pfi Delila; onoyo o vha a tshi dzula govhani ḽa Soreke. ₅Mahosi maṱanu a Vhafilista a ya kha uyo musadzi a ri, “Kwengweledza Simisoni a u vhudze hune maanḓa awe mahulu a bva hone na uri ri nga mu kunda hani ra mu vhofha, ra mu kona. Muṅwe na muṅwe washu u ḓo u ṋea mangwende a 1 100 a siliva.”

₆Ndi hone Delila a tshi amba na Simisoni a ri, “Nga vha mmbudze hune maanḓa avho mahulu a bva hone na uri muthu a nga vha vhofha hani a vha kona.”

₇Simisoni a fhindula a ri, “Arali vha mmbofha nga tsinga dza vhura ṱhanu na mbili ntswa dzi songo omiswaho, ndi ḓo shaya nungo u ḓi nga muṅwe na muṅwe.”

₈Ndi hone mahosi a Vhafilista vha tshi ḓisela Delila tsinga dza vhura ṱhanu na mbili ntswa dzi songo omiswaho, a vhofha Simisoni. ₉Ho vha hu na vhanna vho dzumbama kamarani iṅwe. A ṱavha mukosi a ri, “Simisoni! Vhafilista asivha!” Simisoni a mbo ṱhukukanya dziḽa tsinga dza vhura dza nga harani i tshi ṱhukhuwa musi yo kwamiwa nga mulilo. Vha ḓi dzula vha sa ḓivhi tshiphiri tsha hune maanḓa awe a bva hone.

₁₀Delila a vhudza Simisoni a ri, “Vhone vha khou tamba nga nṋe, a vha mmbudzi ngoho. Nga vha mmbudze uri muthu a nga vha vhofha hani.”

₁₁Simisoni a fhindula a ri, “Arali vha mmbofha nga thambo ntswa dzi sa athu vhofha tshithu, ndi ḓo shaya nungo u ḓi nga muṅwe na muṅwe.”

₁₂Ndi hone Delila a tshi wana thambo ntswa, a mu vhofha ngadzo. A ṱavha mukosi a ri, “Simisoni! Vhafilista asivha!” Ho vha ho lindela vhanna kamarani iṅwe. Simisoni a mbo ṱhukhula idzo thambo dza mu vhofhaho zwishasha dza tou nga ndi harani.

₁₃Delila a vhudza Simisoni a ri, “Vha kha ḓi tamba nga nṋe, a vha mmbudzi ngoho. Nga vha mmbudze uri muthu a nga vha vhofha hani.”

Simisoni a fhindula a ri, “Arali na luka mitsheli miṱanu na mivhili ya mavhudzi anga kha tshitandi na ombela khokho, ndi ḓo shaya nungo u ḓi nga muṅwe na muṅwe.”

₁₄Zwino Delila a eḓedza Simisoni, a dzhia mitsheli ya mavhudzi awe miṱanu na mivhili, a tanda a ita lubomo. A ombela khokho, a ṱavha mukosi a ri, “Simisoni! Vhafilista asivha!” Simisoni a mbo karuwa a ṱomola khokho na lubomo.

₁₅Ndi hone Delila a tshi vhudza Simisoni a ri, “Vha nga ri vha a mpfuna vha sa mpfulufhedzi naa? Vho tamba nga nṋe luraru, vha fhedza vha sa mmbudze hune maanḓa avho a bva hone.”

₁₆Delila a ḓi vhudzisa Simisoni misi yoṱhe. Simisoni a vhuya a neta a nga a sa fa nga lunzili lwa uyo musadzi, ₁₇a fhedza nga u mu vhudza a ri, “Mavhudzi anga ha athu vhuya a vheulwa. Ndo kumedzwa Mudzimu nda vha munaziri u bva tshee nda bebwa. Nda vheulwa mavhudzi, maanḓa anga a ḓo ṱuwa nda shaya nungo u ḓi nga muṅwe na muṅwe.”

₁₈Delila a tshi vhona uri Simisoni o mu vhudza ngoho yoṱhe, a ruma muḓinḓa ha mahosi a Vhafilista a ri, “Nga vha dovhe vha vhuye. Ndi hone o mmbudza ngoho!” Mahosi a Vhafilista vha ḓa vho fara siliva. ₁₉Delila a siamedza Simisoni tshirumbi tshawe a mu ladza, a konou vhidza munna a vheula mitsheli miṱanu na mivhili ya mavhudzi a Simisoni, ha vha hone a tshi vho kona Simisoni a sala a si tshee na maanḓa. ₂₀Ndi hone Delila a tshi ṱavha mukosi a ri, “Simisoni! Vhafilista asivha!” Simisoni a karuwa a tshi ri, “Ndi ḓo ponyoka nda ṱuwa sa misi.” Simisoni o vha a sa ḓivhi uri Muṋe washu o mu ṱutshela. ₂₁Vhafilista vha mu fara, vha mu rumbula maṱo. Vha mu hwala vha mu isa Gaza, vha mu vhofha nga geḓane mbili dza musinaseṱha, vha mu vhea dzhele vha mu kombetshedza u kuya. ₂₂Hone mavhudzi awe a dovha a thoma u mela.

₂₃Mahosi a Vhafilista vha kuvhangana vha ita vhuṱambo, vha ṋekedza mudzimu wavho Dagoni zwiṱhavhelo zwinzhi. Vha imba vha ri,

₂₄Musi vhathu vha tshi mu vhona vha renda mudzimu wavho vha tshi ri,

₂₅Zwenezwo vhó takala, vha ṱavha mukosi vha ri, “Vhidzani Simisoni a ḓe ri tambe ngae.” Ndi hone vha tshi vhidza Simisoni a bviswa dzhele, a ḓa vha tamba ngae, vha mu imisa vhukati ha dziphuphu. ₂₆Simisoni a amba na mutukana we a vha a tshi khou mu endedza o mu fara nga tshanḓa a ri, “Nnzudze hune nda kona u farelela phuphu dza thembele iyi. Ndi ṱoḓa u ḓitika ngadzo.” ₂₇Zwino iyo thembele yo vha yo ḓala vhanna na vhasadzi. Mahosi oṱhe maṱanu a Vhafilista o vha e hone, nṱha ha ṱhanga hu na vhanna na vhasadzi vhane vha nga swika zwigidi zwiraru, vho sedza hu tshi khou tambiwa nga Simisoni.

₂₈Ndi hone Simisoni a tshi rabela Muṋe washu a ri, “Muṋe wa zwoṱhe Muṋe washu, nnyelelwe. Yawee Mudzimu, dovha u nṋee maanḓa lwonolu luthihi fhedzi, ndi lifhedze Vhafilista vho rumbulaho maṱo anga.” ₂₉Ndi hone Simisoni a tshi farelela phuphu mbili dza vhukati dzo tikaho thembele. Tshanḓa tshauḽa tsha farelela iṅwe phuphu, tshamonde tsha farelela iṅwe, a sukumedza, ₃₀a ṱavha mukosi a ri, “Kha ndi fe na Vhafilista havha!” A sukumedza nga nungo dzawe dzoṱhe, thembele ye fhasi mbombo, ya wela nṱha ha vhaḽa mahosi maṱanu na vhathu vhoṱhe vha re ngomu hayo. Zwenezwo Simisoni a vhulaha vhathu vhanzhi musi a tshi fa u fhira vhe a vhulaha a kha ḓi tshila.

₃₁Vharathu vhawe na vhoṱhe vha muṱa wa khotsi awe vha ḓa vha dzhia tshitumbu tshawe. Vha vhuya nae vha mu swiṱa vhukati ha Tsora na Eshthaolo tshaloni tsha khotsi awe Manua. O vha murangaphanḓa wa Vhaisraele miṅwaha ya 20.