VHARANGAPHANḒA 15

₁Ngavhuya Simisoni a yo dalela mufumakadzi wawe, musi hu tshi kaṋiwa goroi, a mu ṱutshela na mbudzana. A vhudza khotsi a musadzi a ri, “Kha vha litshe ndi dzhenise musadzi wanga nḓuni.” Hone khotsi a musadzi vha si tende a tshi dzhena. ₂Vha vhudza Simisoni vha ri, “Vhukuma nṋe ndo vha ndi tshi vhona unga a ni tsha mu funa na zwiṱuku, ndi zwe nda mu ṋea khonani yaṋu. Huno murathu wawe o naka u fhira ene. Dzhiani ene a vhe musadzi waṋu.”

₃Simisoni a fhindula a ri, “Zwino holuno a si mulandu wanga arali ndi tshi huvhadza Vhafilista!” ₄Ndi hone a tshi ṱuwa a yo fara phunguhwe dza 300. A vhofhekanya mitshila yadzo nga mivhili-mivhili; a vhofhelela khuḽane kha ayo mapfundo. ₅A funga idzo khuḽane nga mulilo, a khadela idzo phunguhwe masimuni a zwiliṅwa zwa Vhafilista. Ngauralo a fhisa zwiliṅwa zwe zwa vha zwo no kaṋiwa na zwe zwa vha zwi tshee masimuni, khathihi na masimu a miolivi. ₆Vhafilista vha tshi vhudzisa o zwi itaho, vha pfa hu tshi pfi ndi Simisoni, o zwi ita nge makhulu wawe a no dzula Thimina a dzhia ṅwananyana wawe a mu ṋea khonani ya Simisoni. Ndi hone Vhafilista vha tshi ṱuwa vha yo fhisa uyo musadzi a fa, vha ita na u fhisa khotsi awe a fa.

₇Simisoni a vha vhudza a ri, “No ita nga u ralo! A thi nga vhuyi nda awela ndi sa athu ni lifhedza!” ₈A lwa navho lu ofhisaho, a vhulaha vhanzhi vhavho. Ndi hone a tshi ṱuwa a yo dzula bakoni luwani lwa Ethamu.

₉Vhafilista vha ḓa vha ṱoka mishasha kha ḽa Juda, vha dia muḓi wa Lehi.

₁₀Vhanna vha Juda vha vha vhudzisa vha ri, “Ni lwelani na riṋe?”

Vhone vha fhindula vha ri, “Ro ḓa u fara Simisoni uri ri mu ite zwe a ri ita.”

₁₁Ndi hone hu tshi takuwa vhanna vha Juda vha 3 000 vha ya bakoni luwani lwa Ethamu, vha vhudza Simisoni vha ri, “A ni zwi ḓivhi uri Vhafilista vha a ri vhusa? Zwino no ri itani?”

Simisoni a fhindula a ri, “Ndo vha ita zwe vha nnyita.”

₁₂Vhone vha ri, “Ro ḓa fhano u ni vhofha uri ri ni kumedze Vhafilista.”

Simisoni a ri, “Nnyaneleni uri inwi vhaṋe ni nga si mmbulahe.”

₁₃Vhone vha ri, “Ndi zwone, ri ḓo tou ni vhofha ra ni kumedza vhone. Ri nga si ni vhulahe.” Ndi hone vha tshi mu vhofha nga thambo ntswa mbili, vha vhuya nae a tshi bva bakoni. ₁₄A tshi swika Lehi, Vhafilista vha mu gidimela vha tshi ṱavha mukosi. Muya wa Muṋe washu a ḓa khae e na maanḓa, a ṱhukhula thambo dzo mu vhofhaho zwanḓa, dza nga harani yo fhiswaho, dza wela fhasi. ₁₅A wana shambo ḽa luṱaha lwa donngi ine ya kha ḓi bva u fa, a kotama a ḽi doba, a vhulaha vhanna vha tshigidi ngaḽo. ₁₆Simisoni a imba luimbo a ri,

₁₇A ri u fhedza u imba a laṱa ḽiḽa shambo ḽa luṱaha kule, afho fhethu a ri hu pfi Ramathi Lehi (Tshaluṱaha).

₁₈Zwenezwo Simisoni a farwa nga ḓora ḽihulu, a lilela Muṋe washu a ri, “Wo mpha gundo ḽihulu ḽingafha, zwino ndi a tou fa nga ḓora nda wela zwanḓani zwa Vhafilista avha vha songo fumbaho naa?”

₁₉Ndi hone Muṋe washu a tshi phula tshisima henefho Lehi, maḓi a tou ela. Simisoni a nwa, nungo dzawe dza mbo vhuya, a dzivhuluwa. Ndi zwe a ri hu pfi Eni Hakoree (Tshisima tsha mukosi). Tshi kha ḓi vha hone henefho Lehi.

₂₀Simisoni a ranga Vhaisraele phanḓa misi ya Vhafilista, ha vhuya ha fhela miṅwaha ya 20.