VHARANGAPHANḒA 17

₁Ho vha hu na muṅwe munna we a vha a tshi pfi Mika, a tshi dzula mivhunduni ya Efraimi. ₂Mme awe o vha o tswelwa mangwende a siliva a 1 100, a ita na u teketela fobvu iḽo ṅwana wawe Mika a tshi zwi pfa. Ndi hone Mika a tshi amba na mme awe a ri, “Mme anga, tshelede iyo i na nṋe. Ndi nṋe ndo i dzhiaho.”

Mme awe vha ri, “Ngavhe Muṋe washu a tshi ni shudufhadza ṅwananga!” ₃Mika a mbo humisela iyo tshelede ha mme awe, vhone vha ri, “Ndi ḓo thivhela u teketela huḽa uri zwi si wele ṅwananga, nṋe muṋe ndi ḓo ana nda ṋekedza Muṋe washu iyo siliva. I ḓo shuma u vhaḓisa tshifanyiso tsha thanda tsha fhomiwa nga siliva. Zwino ndi ḓo ni ṋea mangwende ayo a siliva a humela ha inwi.” ₄Ndi hone Mika a tshi a humisela ha mme awe. Mme awe vha dzhia maḓana mavhili a ayo mangwende a siliva vha a ṋea mufuli wa tsimbi, ene a vhaḓa tshifanyiso tsha thanda, a tshi fhoma nga siliva. Itsho tshifanyiso tsha vhewa nḓuni ya Mika.

₅Munna hoyo Mika o vha e na thembele. A ita zwifanyiso na luvhemba lwa u vhonisa, a vhea muṅwe ṅwana wawe uri a vhe tshifhe wawe. ₆(Misi iyo Israele ho vha hu si na khosi, muṅwe na muṅwe o vha a tshi ita zwine a funa.) ₇Nga tshifhinga tshenetsho ho vha hu na muṅwe muṱhannga wa Mulivi a tshi dzula muḓini wa Betlehema kha ḽa Juda. ₈A pfuluwa Betlehema a yo ṱoḓa huṅwe hune a nga dzula hone. E lwendoni a swika nḓuni ya Mika mivhunduni ya Efraimi. ₉Mika a mu vhudzisa a ri, “Ni bva ngafhi?”

Uyo muṱhannga a fhindula a ri, “Ndi Mulivi a no bva Betlehema kha ḽa Juda. Ndi khou ṱoḓa hune nda dzula hone.” ₁₀Mika a ri, “Dzulani na nṋe. Ivhani tshifhe wanga ni nge khotsi anga, ndi ḓo ni ṋea mangwende a fumi a siliva nga ṅwaha na zwiambaro na zwiḽiwa zwaṋu.” ₁₁Uyo muṱhannga wa Mulivi a tenda u dzula na Mika, a tou nga ṅwana wawe. ₁₂Mika a mu vhea uri a vhe tshifhe wawe, a dzula muṱani wa Mika. ₁₃Mika a ri, “Zwino ndi ḓivha uri Muṋe washu u ḓo nnyitela vhuthu, ngauri ndo no vha na tshifhe wa Mulivi.”