Vhuvhi ha vhathu vha Sodoma
1Vhaḽa vharuṅwa vhavhili vha swika Sodoma nga madekwana, vha wana Loto o dzula khoroni ya muḓi. A tshi vha vhona, a takuwa a yo vha ṱanganedza, a kotama a vhuya a gwadama, 2a ri, “Vhaṋe vhanga, vha songo fhira, kha vha ḓe nḓuni yanga. Vha ḓo ṱamba milenzhe vha kuvhama henefha, vha konou vuwa vha tshi fara lwendo lwavho matshelo nga matsheloni.”
Vhone vha fhindula vha ri, “Aiwa, ri ḓo lala nnḓa.”
3Hone ene a sivhelela a ita lunzili, vha vhuya vha ṱuwa nae vha dzhena nḓuni yawe. A vha lugisela zwiḽiwa, a bika vhurotho vhu si na mbilisa, vha ḽa. 4Huno vha sa athu yo kuvhama, vhanna vhoṱhe vha muḓi wa Sodoma, vhahulwane na vhaṱuku, vha bva masia oṱhe a muḓi, ha si sale na muthihi, vha tanga iyo nnḓu, 5vha vhidzelela Loto vha ri, “Vhaḽa vhanna vhe vha u dalela madekwana ano vha ngafhi? Vha bvisele nnḓa ri lale navho!”
6Loto a bvela nnḓa u yo vha ṱanganedza muṋangoni, a sia o vala vothi, 7a ri, “Aiwa nandi vha hashu, ni songo ita vhuvhi ho raloho. 8Vhonani, nṋe ndi na vhana vhavhili vha vhasidzana vha sa athu dzhena nḓuni na muthu wa munna. Litshani ndi ni ḓisele vhone ni ite zwine na funa ngavho. Hone avha vhanna ndi vhaeni vha re nḓuni yanga, ndo fanela u vha tsireledza, ni songo vha ita tshithu.”
9Vhone vha ri, “Ibva nḓilani! Wo ḓa fhano u mutsinda, zwino u vho ḓiita khosi! Ri ḓo u ita zwi no fhira zwa havho!” Vha tshi ralo vha ḓi kombetshedza Loto, vha sendela vha tshi ri vha pwashe vothi. 10Hone vhaḽa vhanna vha re nga ngomu vha kokodzela Loto ngomu nḓuni, vha vala vothi. 11Vha mbo ḓi pofudza vhaḽa vhanna vhe vha vha vhe muṋangoni wa nnḓu, vha tou pofula vhoṱhe, vhahulwane na vhaṱuku, vha si tsha kona u vhona muṋango.
Loto a tshi lamukiswa Sodoma
12Vhaḽa vhanna vhavhili vha vhudzisa Loto vha ri, “U na muṅwe muthu fhano – vhakwasha kana vhana vha vhatukana na vha vhasidzana, kana muṅwe muthu fhano muḓini ane a vha wa hau? Vha bvise hafhano; 13fhethu fhano ri khou ṱoḓa u hu phusukanya. Mukosi u no swika ha Muṋe washu u tshi pomoka vhathu vhaho wo no hulela lwe a vhuya a ri ruma uri ri ḓe ri hu phusukanye.”
14Ndi hone Loto a tshi yo amba na vhakwasha vhawe vhe vha vha vho no fulufhedzisa u vhinga vhananyana vhawe, a ri, “Ṱavhanyani ni bve fhethu fhano, Muṋe washu u ṱoḓa u hu phusukanya!” Hone vhakwasha vhawe vha vhona unga u khou swaswa.
15Musi mapfuvhi a tshi tswuka, vharuṅwa vha ṱuṱuwedza Loto vha ri, “Ṱavhanya u dzhie musadzi wau na vhananyana vhau vhavhili vha re fhano, ni sa ḓo lovha na muḓi uno musi u tshi lifhedzwa.” 16Huno a tshi kha ḓi timatima, vhaḽa vhanna vhavhili vha mu fara nga tshanḓa na musadzi wawe na vhananyana vhawe vhavhili, vha vha endedza vha bva afho muḓini, ngauri Muṋe washu o vha khathutshela. 17Musi vha tshi khou vha bvisa, muṅwe wavho a ri, “Shavhani ni sa ḓo fa! Ni songo sedza murahu, nahone ni songo vhuya na ima huṅwe fhano mudavhini! Shavhelani dzithavhani, ni sa ḓo kumbiwa!”
18Huno Loto a vha fhindula a ri, “Aiwa nandi vhaṋe vhanga! 19Vho ntakalela, vho nnyita nga vhuthu vhuhulu vha ntshidza. Hone u shavhela dzithavhani ndi nga si kone; khombo i nga ḓo mpfara ndi tshee nḓilani nda fa. 20Kha vha vhone, kuḓi ngoku fhano tsini hune nda nga shavhela hone, na u vha kuṱuku ndi kuṱuku. Nga vha litshe ndi shavhele hone, hufha ku kuṱuku. Ndi hone ndi tshi ḓo vha ndo tshila.”
21Muruṅwa a fhindula a ri, “Ndi zwone, na zwenezwo ndi ḓo u tendela; a thi nga phusukanyi muḓi une wa khou u amba. 22Hone ṱavhanya u gidimele hone, ngauri a thi koni u ita tshithu u sa athu swika khawo.” (Ndi zwine uyo muḓi wa pfi Tsuara.)
U phusukanywa ha Sodoma na Gomora
23Musi ḓuvha ḽi tshi bva, Loto a vha a tshi swika Tsuara. 24Muṋe washu a nisela Sodoma na Gomora tsevhela i fhisaho i tshi bva ha Muṋe washu ṱaḓulu. 25A phusukanya iyo miḓi na mudavhi woṱhe, khathihi na vhoṱhe vha dzulaho afho muḓini, na zwimela zwa shango. 26Musadzi wa Loto a sedza murahu a mbo ḓi shanduka phuphu ya muṋo.
27Nga matshelo Abrahamu a fhindutshela fhaḽa fhethu he a vha o ima na Muṋe washu, 28a sedza Sodoma na Gomora nga thungo ya fhasi, na govha ḽoṱhe ḽa Jorodani, a vhona shango ḽoṱhe ḽi tshi duba buluvhutsi, zwi tshi nga vhutsi vhu no duba vhu tshi bva ṋanḓoni. 29Huno musi Mudzimu a tshi phusukanya miḓi ya govha ḽa Jorodani he Loto a vha a tshi dzula hone, a lamukisa Loto khomboni nge a elelwa Abrahamu.
Vhubvo ha Vhamuaba na Vhaamoni
30Loto na vhananyana vhawe vha pfuluwa Tsuara vha yo dzula dzithavhani, nge a vha a tshi ofha u dzula Tsuara. Ene na vhananyana vhawe vhavhili vha yo dzula bakoni. 31Muṅwe musi mukomana a vhudza murathu a ri, “Khotsi ashu vho kalaha, nahone a hu na munna shangoni ḽino ane a nga ri vhinga sa zwine zwa itwa mashangoni oṱhe. 32Nga ri nwise khotsi ashu waini ri dzhene navho nḓuni, ri vhumbe lutsinga lwa muṱa wa hashu nga khotsi ashu.”
33Vhusiku honoho vha nwisa khotsi avho waini, mukomana a kuvhama navho, khotsi awe vha si vhe na nzhele nazwo uyo ṅwananyana a tshi kuvhama na musi a tshi vuwa.
34Nga matshelo mukomana a vhudza murathu a ri, “Madekwe ndo kuvhama na khotsi anga; nga ri dovhe ri vha nwise waini ṋamusi nga madekwana, inwi ni dzhene ni kuvhame navho uri ri vhumbe lutsinga lwa muṱa wa hashu nga khotsi ashu.” 35Ndi hone vha tshi dovha u nwisa khotsi avho waini vhusiku honoho, murathu a kuvhama navho. Na zwenezwo a vho ngo vha na nzhele nazwo a tshi kuvhama na musi a tshi vuwa.
36Vhananyana vha Loto vhuvhili havho vha mbo ḓi vhifha muvhilini nga khotsi avho, 37mukomana a vha na ṅwana wa mutukana, a pfi Muaba (Ndo-mu-wana-kha-baba); ndi ene khotsi a Vhamuaba vha misi ino. 38Murathu na ene a vha na ṅwana wa mutukana, a pfi Benami (Ṅwana-wa-shaka-ḽanga); ndi ene khotsi a Vhaamoni vha misi ino.
