GENESI 20

₁Zwino Abrahamu a pfuluwa henefho a ya dzinguni ḽa Negeve, a dzula vhukati ha Kadeshe na Shuru. A dovha a pfuluwa a yo dzula Gerara. ₂Abrahamu e henefho a vhudza vhathu a tshi amba Sara musadzi wawe a ri, “Ndi khaladzi anga.” Ndi hone Abimelekhe khosi ya Gerara a tshi vhidzisa Sara a mu dzhia. ₃Hone ḽiṅwe ḓuvha nga madekwana Mudzimu a ḓa ha Abimelekhe muloroni a ri, “U ḓo fa nga mulandu wa musadzi we wa mu dzhia; u na munna wawe.”

₄Zwino Abimelekhe o vha a sa athu sendela tsini ha Sara, ndi zwe a fhindula a ri, “Iwe Muṋe wa zwoṱhe, vhukuma u nga lozwa lushaka lu si na mulandu naa? ₅A thi ri Abrahamu o mmbudza a ri, ‘Ndi khaladzi anga’? Na ene muṋe Sara o ri, ‘Ndi khaladzi anga.’ Hezwo a tho ngo zwi ita nga khole.”

₆Ndi hone Mudzimu a tshi amba nae muloroni a ri, “Ee, ndi a zwi ḓivha uri izwo a wo ngo zwi ita nga khole, ndi zwe na Nṋe nda si u litshe u tshi nkhakhela nga u mu kwama. ₇Zwino humisa musadzi wa hoyo munna, ngauri ndi muporofita; u ḓo u rabelela wa tshila. Hone wa sa mu humisa, u ḓivhe uri iwe na vhathu vhau vhoṱhe ni ḓo fa.”

₈Nga matshelo ḽi tshi tou tsha Abimelekhe a vhidza magota awe oṱhe, a vha vhudza zwoṱhe zwe a pfa; vha farwa nga nyofho khulu. ₉Ndi hone Abimelekhe a tshi vhidza Abrahamu a ri, “No ri ita mini? Ndo ni khakhela ngani ni tshi vhuya na nnzhenisa mulanduni mungafha, nṋe na muvhuso wanga? No nnyita zwi sa itwi!” ₁₀Abimelekhe a sengisa Abrahamu a ri, “Izwi no zwi itelani?”

₁₁Abrahamu a fhindula a ri, “Ndo humbula nda ri, ‘Vhukuma fhano Mudzimu ha ofhiwi, vha ḓo mmbulaha vha tshi mmbulahela musadzi wanga.’ ₁₂Ene ndi khaladzi anga, ndi ṅwananyana wa khotsi anga, naho e si wa mme anga; a dovha a vha musadzi wanga. ₁₃Huno zwiḽa Mudzimu a tshi ita uri ndi ṱuwe muṱani wa khotsi anga ndi tendeleke na shango, ndo mu vhudza nda ri, ‘Arali ni tshi mpfuna, hoṱhe hune ra ya, ni tshi nnyamba ni ri: Ndi khaladzi anga.’ ”

₁₄Ndi hone Abimelekhe a tshi ḓisa nngu na kholomo na dziphuli, dza vhanna na dza vhasadzi, a ṋea Abrahamu, a dovha a mu ṋea Sara musadzi wawe. ₁₅Abimelekhe a ri, “Shango ḽanga ngeḽi, kha vha dzule hune vha funa.” ₁₆A amba na Sara a ri, “Ndi khou ṋea khaladzi avho mangwende a 1 000 a siliva. Hetshi ndi tshipfumelo tsha mulandu wa zwe nda vha khakhela; ndi tshi bvisa vhoṱhe vha re navho vha tshi zwi vhona; vhone musadzi vho ṱamba mulandu tshoṱhe.”

₁₇Zwenezwo Abrahamu a rabela Mudzimu, Mudzimu a fhodza Abimelekhe na mufumakadzi wawe na phuli dzawe dza vhasadzi uri vha dovhe vha vhe na vhana, ₁₈ngauri Muṋe washu o vha o fara ṋowa dza vhasadzi vhoṱhe muṱani wa Abimelekhe a tshi lifhedzela Sara musadzi wa Abrahamu.