GENESI 18

₁Abrahamu o vha a tshi dzula tsini ha miri mihulu ya Mamuri. Muṅwe musi ó dzula muṋangoni wa dennde yawe masiari tshivhangalala, Muṋe washu a ḓisumbedza ene.

₂Abrahamu a tshi posa maṱo a vhona vhanna vhararu vho ima henefho tsini. A ri u vha vhona a mbo ḓi ṱavhanya a takuwa muṋangoni wa dennde yawe a yo vha ṱanganedza, a gwadama. ₃A ri, “Muṋe wa zwoṱhe, arali vha tshi ntakalela vha songo mphira. ₄Nga vha litshe hu ḓiswe maḓinyana vha ṱambe milenzhe, vha awele murunzini hoyu. ₅Nga vha litshe ndi vha wanele zwiḽiwanyana, vha netuluwe, vha konou fhira zwavho. Hufha vho no ḓi swika ha mulanda wavho.”

Vhone vha fhindula vha ri, “Ndi zwone, ita zwine wa amba.”

₆Ndi hone Abrahamu a tshi gidimela ha Sara denndeni, a ri, “Ṱavhanyani ni dzhie vhukhopfu vhutete ha ndilo tharu, ni suke ni bike mikonde ya vhurotho.” ₇A gidimela sambini ḽawe, a nanga ṋamana thethe yavhuḓi, a i ṋea phuli yawe, uyo a mbo ḓi ṱavhanya u i lugisa. ₈Abrahamu a ḓisa mukhaha wa makheṱhe na wa luvhisi na iḽa ṋama yo bikwaho, a zwi vhea phanḓa havho. Musi vha tshi khou ḽa ene a ima tsini navho murunzini a tshi khou vha ṋekedza.

₉Vhone vha vhudzisa vha ri, “Musadzi wau Sara u ngafhi?” Ene a fhindula a ri, “U denndeni.” ₁₀Muṅwe wavho a ri, “Ndi ḓo dovha nda vhuya mwakani nga tshifhinga tshenetshi; ndi ḓo wana musadzi wau Sara e na ṅwana wa mutukana.”

Zwino Sara o vha e murahu ha Abrahamu muṋangoni wa dennde a tshi khou thetshelesa. ₁₁Abrahamu na Sara vho vha vho no ḓi vha vha maḓuvha, miṅwaha yavho yo no ḓi vhala, Sara o no pfuka miṅwaha ya u beba vhana. ₁₂Sara a ḓisetshela nge a humbula a ri, “Hufha ndo no kegula, na munna wanga o no kalaha, ndi nga dovha nda tama munna naa?”

₁₃Muṋe washu a vhudzisa Abrahamu a ri, “Ndi mini Sara o sea a ri, ‘Vhukuma ndi nga wana ṅwana zwino ndo no kegula naa?’ ₁₄Hu na maḓembe ane a nga kunda Yahavee naa? Ndi ḓo vhuya mwakani nga tshifhinga tsho tiwaho, nda wana Sara e na ṅwana wa mutukana.”

₁₅Sara o vha o farwa nga nyofho, ndi zwe a zwifha a ri, “A tho ngo sea.” Hone Muṋe washu a ri, “Wo sea.”

₁₆Musi vhaḽa vhanna vha tshi vho takuwa vha tshi ṱuwa, Abrahamu a vha fhelekedza, vha swika hune vha kona u vhona Sodoma thungo ya fhasi. ₁₇Zwenezwo Muṋe washu a ri, “Ndi nga dzumbela Abrahamu zwine nda ṱoḓa u zwi ita naa? ₁₈Hufha a tshi ḓo vha lushaka luhulu lwa maanḓa, tshakha dzoṱhe dza ḽifhasi dzi tshi ḓo wana mashudu ngae. ₁₉Ndo mu nanga uri a kone u laya vhana vhawe na vhaḓuhulu uri vha tshimbile nḓilani yanga, vha ite zwi re zwone zwi ntakadzaho, uri Abrahamu ndi mu itele zwoṱhe zwe nda mu fulufhedzisa.”

₂₀Muṋe washu a ri, “Mukosi wa u pomoka Sodoma na Gomora wo no hulela; vhutshinyi havho ho no tou ṋaṋa; ₂₁litshani ndi tse ndi yo vhona arali zwine vha ita zwo vhifha u fana na mukosi we wa swika kha Nṋe. Arali zwi songo ralo ndi ḓo zwi ḓivha.”

₂₂Muṋe washu a sala henefho o ima na Abrahamu, vhaḽa vhanna vhavhili vha ṱuwa vha livha Sodoma. ₂₃Ndi hone Abrahamu a tshi sendela tsini ha Muṋe washu a ri, “U tshi kumba vhavhi u ḓo kumba na vhavhuya naa? ₂₄Arali afho muḓini hu na vhavhuya vha 50? U ḓo u kumba woṱhe, wa si u khathutshele u tshi itela vhavhuya vha 50 vha re ngomu hawo naa? ₂₅U nga si tou ralo wa lozwa vhavhuya na vhavhi, vhavhuya na vhavhi wa vha ita zwi fanaho! Hufha u muhaṱuli wa shango ḽoṱhe, u nga ri u tshi haṱula wa khakha?”

₂₆Muṋe washu a ri, “Arali nda wana vhavhuya vha 50 muḓini wa Sodoma, ndi ḓo u khathutshela woṱhe ndi tshi itela vhenevho.”

₂₇Abrahamu a dovha a amba a ri, “Vhunga zwino ndo luma mbilu nda amba na Muṋe wa zwoṱhe, hone ndi si tshithu ndi tshi tou vha buse na milora, ₂₈zwino kha vhavhuya arali ho ṱahela vhaṱanu uri vha vhe 50? U ḓo lozwa muḓi woṱhe nge ha ṱahela avho vhaṱanu naa?”

Muṋe washu a fhindula a ri, “Arali nda wana vha 45 ndi nga si u lozwe.”

₂₉Abrahamu a dovha hafhu a amba na Muṋe washu a ri, “Zwino arali ha wanala hu na vha 40?” Muṋe washu a ri, “Ndi ḓo u khathutshela ndi tshi itela avho vha 40.”

₃₀Abrahamu a ri, “Muṋe wa zwoṱhe a songo sinyuwa, nga a nnditshe ndi ambe. Zwino arali ha wanala hu na vha 30?” Muṋe washu a ri, “Ndi nga si zwi ite arali nda wana hu na vha 30.”

₃₁Abrahamu a ri, “Vhunga ndo no ḓi luma mbilu nda amba na Muṋe wa zwoṱhe – zwino arali ha tou wanala vha 20?” Muṋe washu a ri, “Ndi ḓo u khathutshela ndi tshi itela avho vha 20.”

₃₂Abrahamu a ri, “Ngavhe Muṋe wa zwoṱhe a sa sinyuwi, a tshi nnditsha nda tou amba holuno luthihi fhedzi – zwino arali ha wanala vha fumi fhedzi?”

Muṋe washu a ri, “Ndi ḓo u khathutshela ndi tshi itela vhenevho vha fumi.” ₃₃Musi Muṋe washu o fhedza u amba na Abrahamu, a ṱuwa, Abrahamu a humela hayani.