GENESI 11

₁Huno shango ḽoṱhe ḽo vha ḽi na luambo luthihi na maambele a no fana. ₂Huno musi vhathu vha tshi ṱutshela vhubvaḓuvha vha wana mudavhi shangoni ḽa Shiniari, vha dzula hone. ₃Vha vhudzana vha ri, “Iḓani ri forome zwidina ri zwi fhise zwavhuḓi!” Vha fhaṱa nga zwidina vha litsha matombo, vha shuma nga tshikonṱiri vha litsha matope. ₄Vha ri, “Iḓani, nga ri ḓifhaṱele muḓi u re na mutsheṱo u no guma nga makole, ri vhe na bvumo, ri si tsha ḓo balangana na ḽifhasi ḽoṱhe!”

₅Huno Muṋe washu a tsela fhasi u ḓa u ṱola uyo muḓi na mutsheṱo we vhathu vha vha vha tshi khou u fhaṱa. ₆Muṋe washu a ri, “Khezwi, vhoṱhe ndi lushaka luthihi, vha amba luambo luthihi; ndi hone vha tshi tou thoma mishumo yavho! A hu tshee na tshine vha ḓo ri u dzudzanya uri vha tshi ite, tsha vha kunda. ₇Iḓani ri tsele fhasi ri yo piringanya luambo lwavho, uri vha tshi amba vha si tsha pfana!”

₈Ndi hone Muṋe washu a tshi vha balanganya na ḽifhasi vha tshi bva henefho, uyo muḓi vha si tsha u fhaṱa. ₉Ndi zwe wa pfi Babele, nge Muṋe washu a piringanya luambo lwa ḽifhasi ḽoṱhe henefho. U bva henefho Muṋe washu a vha balanganya na ḽifhasi ḽoṱhe.

₁₀Vhaḓuhulu vha Semu ngevha: Musi ho no fhela miṅwaha mivhili tshee muḓalo wa maḓi wa fhira, Semu ó no ḓi vha na miṅwaha ya ḓana, a konou vha khotsi a Ariphakhadi. ₁₁Musi o no vha khotsi a Ariphakhadi, a dovha a tshila miṅwaha ya 500, a beba vhaṅwe vhana vha vhatuka na vha vhasidzana.

₁₂Musi Ariphakhadi o no vha na miṅwaha ya 35 a vha khotsi a Shela. ₁₃Musi o no beba Shela, a dovha a tshila miṅwaha ya 403, a beba vhaṅwe vhana vha vhatuka na vha vhasidzana.

₁₄Musi Shela o no vha na miṅwaha ya 30 a vha khotsi a Ebere. ₁₅Musi o no beba Ebere, a dovha a tshila miṅwaha ya 403, a beba vhaṅwe vhana vha vhatuka na vha vhasidzana.

₁₆Musi Ebere o no vha na miṅwaha ya 34, a vha khotsi a Phelege. ₁₇Musi o no beba Phelege, a dovha a tshila miṅwaha ya 430, a vha na vhaṅwe vhana vha vhatuka na vha vhasidzana.

₁₈Musi Phelege o no vha na miṅwaha ya 30, a vha khotsi a Reu. ₁₉Musi o no beba Reu, a dovha a tshila miṅwaha ya 209, a vha na vhaṅwe vhana vha vhatuka na vha vhasidzana.

₂₀Musi Reu o no vha na miṅwaha ya 32, a vha khotsi a Serugu. ₂₁Musi o no beba Serugu, a dovha a tshila miṅwaha ya 207, a beba vhaṅwe vhana vha vhatuka na vha vhasidzana.

₂₂Musi Serugu o no vha na miṅwaha ya 30, a vha khotsi a Nahoro. ₂₃Musi o no beba Nahoro, a dovha a tshila miṅwaha ya 200, a vha na vhaṅwe vhana vha vhatuka na vha vhasidzana.

₂₄Musi Nahoro o no vha na miṅwaha ya 29, a vha khotsi a Thera. ₂₅Musi o no beba Thera, a dovha a tshila miṅwaha ya 119, a vha na vhaṅwe vhana vha vhatukana vha vhasidzana.

₂₆Musi Thera o no vha na miṅwaha ya 70, a vha khotsi a Abramu na Nahoro na Harani.

₂₇Vhaḓuhulu vha Thera ngevha: Thera o vha khotsi a Abramu na Nahoro na Harani, Harani a vha khotsi a Loto. ₂₈Harani o fela Uru wa Vhakhaladia, shangoni ḽe a bebwa khaḽo. Izwo ndi musi khotsi awe Thera a tshi kha ḓi tshila. ₂₉Abramu na Nahoro vhuvhili havho vha dzea vhasadzi. Musadzi wa Abramu o vha a tshi pfi Sarai, wa Nahoro a tshi pfi Milikha; o vha e ṅwananyana wa Harani khotsi a Milikha na Isikha. ₃₀Huno Sarai o vha e muumba, a si na ṅwana.

₃₁Thera a dzhia ṅwana wawe Abramu na muḓuhulu wawe Loto ṅwana wa Harani, na Sarai mazwale wawe musadzi wa Abramu, vha pfuluwa Uru wa Vhakhaladia vha livha Kanana. Huno musi vha tshi swika Harani vha mbo ḓi dzula hone. ₃₂Thera o tshila miṅwaha ya 205, a fela Harani.