GENESI 12

₁Muṋe washu o amba na Abramu a ri, “Pfuluwa shangoni ḽa hau, u ṱutshele vhathu vha hau na muṱa wa khotsi au, u pfulutshele shangoni ḽine nda ḓo u sumbedza. ₂Ndi ḓo u ita lushaka luhulu, nda u shudufhadza; ndi ḓo hudza dzina ḽau; u ḓo ḓisela vhathu mashudu! ₃Ndi ḓo shudufhadza vhane vha u shudufhadza; ane a vhuya a u sema, ndi ḓo mu teketela; tshakha dzoṱhe dza ḽifhasi dzi ḓo wana mashudu nga iwe.”

₄Ndi hone Abramu a tshi pfuluwa nga he Muṋe washu a mu vhudza; Loto a ṱuwa nae. Abramu a tshi pfuluwa Harani o vha e na miṅwaha ya 75. ₅O ṱuwa na musadzi wawe Sarai na Loto ṅwana wa murathu wawe na thundu yoṱhe ye vha vha vhe nayo, na phuli dze vha dzi wana Harani, vha takuwa vha livha shangoni ḽa Kanana, vha vhuya vha swika.

₆Abramu a buḓekanya shango a vhuya a swika fhethu ha muri muhulu wa More muḓini wa Shikheme. O wana Vhakanana vha tshi kha ḓi dzula shangoni iḽo, ₇hone Muṋe washu a ḓa ha Abramu a ri, “Shango heḽi ndi ḓo ḽi ṋea vhana vhau.” Henefho a fhaṱela Mune washu we a ḓa khae aḽiṱari. ₈U bva henefho a tshimbila o livha zwivhangani zwi re vhubvaḓuvha ha Bethele, a akha dennde yawe, Bethele o hu sumbela vhukovhela, Ai o hu sumbela vhubvaḓuvha. Henefho a fhaṱela Muṋe washu aḽiṱari, a mu rabela. ₉Ndi hone Abramu a tshi takuwa a tshimbila o livha tshipembe.

₁₀Huno ha wa nḓala shangoni iḽo, Abramu a tsela Egipita a yo dzula hone tshifhinganyana, nge nḓala ya vha i khulu. ₁₁Musi a tshi ṱoḓou dzhena Egipita, a vhudza musadzi wawe Sarai a ri, “Ndi a ḓivha uri no naka; ₁₂musi Vhaegipita vha tshi ni vhona vha ḓo ri, ‘Hoyu ndi musadzi wawe,’ vha mmbulaha, inwi vha ni litsha na tshila. ₁₃Inwi ni vha vhudze uri ni khaladzi anga, ndi hone vha tshi ḓo mpfara zwavhuḓi vha tshi itela inwi, vha nnditsha nda tshila vha tshi itela inwi.”

₁₄Musi Abramu a tshi swika Egipita, Vhaegipita vha vhona uri Sarai ndi musadzi wa lunako vhukuma. ₁₅Musi magota a Farao vha tshi vhona Sarai, vha mu khoḓa vha tshi vhudza Farao, Sarai a dzhiwa a iswa pfamoni ya Farao. ₁₆Farao a tonda Abramu a tshi itela Sarai, a mu fha nngu na kholomo na donngi dza mboho na dza tsadzi, na phuli dza vhanna na dza vhasadzi, na dzigamela.

₁₇Huno Muṋe washu a ḓisela Farao na muṱa wawe vhulwadze vhu ofhisaho nga mulandu wa Sarai musadzi wa Abramu. ₁₈Ndi hone Farao a tshi vhidzisa Abramu. A mu vhudzisa a ri, “No nnyita zwithu-ḓe? Ndi mini ni songo mmbudza uri ndi musadzi waṋu? ₁₉Ndi mini no ri ndi khaladzi aṋu, nda vhuya nda mu dzhia nda mu ita musadzi wanga? Zwino-ha, musadzi waṋu ngoyu! Mu dzhieni ni ṱuwe!” ₂₀Ndi hone Farao a tshi ruma vhalanda vhawe uri vha fhelekedze Abramu na musadzi wawe na zwoṱhe zwe a vha e nazwo.