ESRA 6

₁Ndi hone khosi Dariosi a tshi bvisa ndaela, vha funyungudza kha maṅwalwa a mafhungo a kale o vhulungwaho mbulungeloni dza Babele. ₂Ha wanala luṅwalo muḓini wa Ekhebathana vunduni ḽa Media, khalwo ho vha ho ṅwalwa hezwino:

“Ndaela ya khosi. ₃Nga ṅwaha wa u thoma wa muvhuso wa khosi Khoreshe, Khoreshe o bvisa ndaela i no amba nga thembele ya Mudzimu i re Jerusalema, a ri thembele nga i fhaṱiwe hu vhe fhethu hune ha ṋekedzwa zwiṱhavhelo, miteo yayo nga i tewe. Vhulapfu ha thembele u ya nṱha ho fanela u vha mithara dza 30, vhuphara i vhe mithara dza 30. ₄Mbondo dzi fhaṱiwe nga maalo mararu a matombo hu kone u ingwa ḽialo ḽithihi ḽa matanda. Tshinyalelo i bvisiwe kha gwama ḽa musanda. ₅Midzio ya musuku na siliva ya nnḓu ya Mudzimu, ye Nebukhadnetsara a i hwala thembeleni ya Jerusalema a i isa Babele, i humiselwe vhudzuloni hayo thembeleni ya Jerusalema; nga i dzule nḓuni ya Mudzimu.”

₆“Zwino-ha, Thathenai, iwe muvhusi wa Seli-ha-Yufuratha, na Shethara Boznai na inwi magota a havho a vundu ḽeneḽo, litshani havhaḽa vhathu. ₇Ni songo dzhenelela kha mushumo wa thembele heyo ya Mudzimu. Litshani muvhusi wa Majuda na vhahulwane vha Majuda vha vuse heyo nnḓu ya Mudzimu he ya vha yo ima hone. ₈Tshiṅwe hafhu, ndi khou bvisa ndaela ya zwine na fanela u itela vhahulwane havho vha Majuda vha tshi fhaṱa nnḓu heyo ya Mudzimu. Tshinyalelo ya vhanna havho i bvisiwe yoṱhe zwi tshi bva kha gwama ḽa musanda, zwi tshi bva kha tshelede ya Seli-ha-Yufuratha, uri mushumo hoyo u si ime. ₉Zwoṱhe zwine zwa ṱoḓea – mboho, thutha, ngwana dza nduna dza zwiṱhavhelo zwi fhiselwaho Mudzimu wa ṱaḓulu, na goroi na muṋo na waini na mapfura, zwine zwa ṱoḓiwa nga vhotshifhe vha Jerusalema – vho fanela u fhiwa nga misi zwi sa vhuyi zwa ṱahela. ₁₀Izwo zwo fanela u itwa uri vha kone u ṋekedza Mudzimu wa ṱaḓulu zwiṱhavhelo zwi mu takadzaho, vha rabele uri zwi nakele khosi na vhana vhayo vha vhatuka.

₁₁“Ndi dovha nda bvisa ndaela ya uri arali muṅwe a nyadza ndaela iyi, hu ḓo ṱomolwa phuphu ya thanda nḓuni yawe, ene a takulelwa nṱha, a runzhelelwa khayo. Nga mulandu wonoyo, nnḓu yawe i ḓo phusukanywa ya itwa thulwi ya mathukhwi. ₁₂Ngavhe Mudzimu we a ita uri dzina ḽawe ḽi dzule henefho a tshi tekula khosi ifhio na ifhio kana lushaka lune lwa imisa tshanḓa lwa shandukisa ndaela hei kana lwa thutha thembele heyo Jerusalema. Ho amba nṋe Dariosi! Zwoṱhe kha zwi vuledzwe nga vhuronwane!”

₁₃Zwino nga ndaela ya khosi Dariosi, Thathenai muvhusi wa Seli-ha-Yufuratha, na Shethara Boznai na vhashumisani navho vha tevhedza iyo ndaela nga vhuronwane. ₁₄Ndi hone vhahulwane vha Majuda vha tshi fhaṱa vha tshi ya phanḓa zwa tshimbila zwavhuḓi. Vho vha vha tshi ṱuṱuwedzwa nga Hagai muporofita na Zakaria ṅwana wa Ido. Vha fhedza u fhaṱa thembele vha tshi tevhedza ndaela ya Mudzimu wa Israele na ndaela dza Khoreshe na Dariosi na Arathakhesese mahosi a Pheresia. ₁₅Thembele iyo yo fhela u fhaṱwa nga ḓuvha ḽa vhuraru ḽa ṅwedzi wa Adara, nga ṅwaha wa vhuṱanu na vhuthihi wa khosi Dariosi.

₁₆Ndi hone vhathu vha Israele – vhotshifhe na Vhalivi na mathubwa oṱhe – vha tshi ita vhuṱambo ha u hangula nnḓu ya Mudzimu nga dakalo. ₁₇Vha tshi hangula iyo nnḓu ya Mudzimu vho ṋekedza mboho dza ḓana na thutha dza 200 na ngwana dza nduna dza 400, vha ṋekedza na mbudzi dza 12 tsha vha tshipfumelo tsha vhutshinyi ha Vhaisraele vhoṱhe. Tsinde ḽiṅwe na ḽiṅwe ḽa Vhaisraele ḽa bviselwa mbudzi. ₁₈Vha vhumba vhotshifhe nga u khethekana havho na Vhalivi nga zwigwada zwavho uri vha shumele Mudzimu Jerusalema hu tshi tevhedzwa zwo ṅwalwaho Buguni ya Mushe.

₁₉Nga ḓuvha ḽa 14 ḽa ṅwedzi wa u thoma, mathubwa vha ita vhuṱambo ha Paseka. ₂₀Vhotshifhe na Vhalivi vho vha vho ḓiṱanzwa tshika vha tshi tevhedza maitele a u ḓikumulula. Vhalivi vha ṱhavha ngwana ya Paseka vha tshi ṱhavhela mathubwa oṱhe na vha havho vhotshifhe na vhone vhaṋe. ₂₁Ndi hone Vhaisraele vho vhuyaho vhuthubwani vha tshi i ḽa, khathihi na vhoṱhe vhe vha ḓikhetha vha si tevhedze maitele a dzitshika a vhannḓa vhahura vhavho, uri vha ṱoḓe Muṋe washu Mudzimu wa Israele. ₂₂Vho ita vhuṱambo ha Vhurotho vhu si na mbilisa maḓuvha maṱanu na mavhili vho takala, ngauri Muṋe washu o vha o vha ḓadza dakalo nga u shandukisa kuhumbulele kwa khosi ya Ashuru, zwe a vha farisa kha mushumo wa u fhaṱa nnḓu ya Mudzimu, Mudzimu wa Israele.