ESRA 7

₁Musi izwo zwo no fhira, musi hu tshi vhusa Arathakhesese khosi ya Pheresia, ho vha hu na munna a no pfi Esra ṅwana wa Seraya, wa Azaria, wa Hilikia, ₂wa Shalumi, wa Tsadoko, wa Ahitubu, ₃wa Amaria, wa Azaria, wa Mirayotho, ₄wa Zerakhia, wa Uzi, wa Buki, ₅wa Abishua, wa Finiasi, wa Eliasara, wa Aroni tshifhe muhulu. ₆Uyo Esra o vha a tshi bva Babele. O vha e mufunzi ane a ḓivha zwavhuḓi mulayo we Muṋe washu Mudzimu wa Israele a u ṋea Mushe. Khosi yo vha yo mu ṋea zwoṱhe zwe a humbela, ngauri Muṋe washu Mudzimu wawe o vha o mu ṋea mashudu. ₇Vhaṅwe Vhaisraele, vhotshifhe na Vhalivi na vhaimbi na vhalindi vha khoro na vhashumi vha thembeleni, na vhone vha gonya Jerusalema vha tshi bva Babele nga ṅwaha wa vhuṱanu na vhuvhili wa Arathakhesese.

₈Esra a swika Jerusalema nga ṅwedzi wa vhuṱanu wa ṅwaha wa vhuṱanu na vhuvhili wa iyo khosi. ₉O takuwa Babele a fara lwendo nga ḓuvha ḽa u ranga ḽa ṅwedzi wa u ranga, a swika Jerusalema nga ḓuvha ḽa u ranga ḽa ṅwedzi wa vhuṱanu, ngauri tshanḓa tsha vhuthu tsha Mudzimu wawe tsho vha tshi nae. ₁₀Ndi uri Esra o vha o ḓikumedza zwa u guda na u tevhedza mulayo wa Muṋe washu, na u funza ndaela dzawo na ndayo dzawo kha ḽa Israele.

₁₁Ngolu luṅwalo lwe khosi Arathakhesese a ṋea Esra ane a vha tshifhe na mufunzi, munna we a vha a tshi ḓivha milayo na ndaela dze Muṋe washu a ṋea Vhaisraele.

₁₂“Luṅwalo ulu lu bva kha Arathakhesese, khosi ya mahosi, lu ya ha Esra ane a vha tshifhe, mufunzi wa mulayo wa Mudzimu wa makoleni. Kha ḽi lale!

₁₃“Zwino ndi a ḓivhadza uri Vhaisraele vhoṱhe vha re muvhusoni wanga, na vhone vhotshifhe na Vhalivi, vhane vha funa u ya Jerusalema na iwe, vha nga ḓi ya. ₁₄U khou rumiwa nga khosi na vhaeletshedzi vhayo vhaṱanu na vhavhili uri u yo ṱola Juda na Jerusalema u tshi tevhedza Mulayo wa Mudzimu wau, une wa u ḓivha. ₁₅Hafhu u ṱuwe na siliva na musuku zwe khosi na vhaeletshedzi vhayo vha zwi bvisa nga u tou funa havho vha zwi ṋea Mudzimu wa Israele a no dzula Jerusalema. ₁₆U dzhie na siliva yoṱhe na musuku zwine wa nga zwi wana shangoni ḽa Babele, khathihi na nduvho ine vhathu na vhotshifhe vha thembele ya Mudzimu wavho i re Jerusalema vha tou ṋea nga u funa havho.

₁₇“Tshelede iyo ni renge ngayo dzimboho na dzithutha na ngwana dza nduna, khathihi na nduvho dzadzo dza thoro na nduvho dza zwinwiwa, u zwi ṋekedze kha aḽiṱari ya thembele ya Mudzimu wau i re Jerusalema. ₁₈Iwe na Majuda vha hau ni nga kona u ita zwine na vhona zwi zwa khwiṋe nga siliva na musuku zwo salaho, ni tshi tevhedza zwine Mudzimu waṋu a zwi funa. ₁₉Swikisani ha Mudzimu wa Jerusalema zwithu zwoṱhe zwe na kumedzwa zwa u luvha Mudzimu thembeleni yawe. ₂₀Zwiṅwe zwine zwa ṱoḓea thembeleni ya Mudzimu waṋu ni nga zwi wana kha thundu ya musanda.

₂₁“Zwino nṋe khosi Arathakhesese, ndi khou vhudza vhafaragwama vhoṱhe vha Seli-ha-Yufuratha uri zwoṱhe zwine tshifhe Esra mufunzi wa mulayo wa Mudzimu wa makoleni a ni humbela, ni mu ṋee nga vhuronwane, ₂₂zwi vhuye zwi gume kha khilogiramu dza 3 400 dza siliva na khilogiramu dza 16 000 dza goroi na litha dza 2 000 dza waini na litha dza 2 000 dza mapfura a muolivi na muṋo woṱhe une wa ṱoḓea. ₂₃Zwoṱhe zwe Mudzimu wa makoleni a ri zwi itiwe, nga zwi itelwe thembele ya Mudzimu wa ṱaḓulu nga vhuronwane, uri a si sinyutshele khosi na vhana vhayo. ₂₄Nahone ni ḓivhe uri vhotshifhe na Vhalivi na vhaimbi na vhalindakhoro na vhashumi vha thembeleni na vhaṅwe vhashumi vha nḓuni heyo ya Mudzimu, a ni na maanḓa a u vha thelisa muthelo na sengosengo na mutendelo.

₂₅“Nahone iwe Esra, vhunga u na vhuṱali vhu no bva ha Mudzimu wau, vhea vhavhusi na vhahaṱuli vha vhuse Majuda vhoṱhe vha Seli-ha-Yufuratha nga u fulufhedzea, vhoṱhe vhane vha ḓivha mulayo wa Mudzimu wau. Vhane vha si u ḓivhe u vha funze. ₂₆Ane a si thetshelese mulayo wa Mudzimu wau na mulayo wa khosi u ḓo lifhedzwa nga tshiṱuhu: u ḓo vhulawa kana a thathiwa kana a dzhielwa thundu kana a hoṋelwa dzhele.”

₂₇Esra a ri, “Nga hu rendwe Muṋe washu Mudzimu wa vhokhotsi ashu! O zwi longa mbiluni ya khosi uri i tonde nnḓu ya Muṋe washu i re Jerusalema nga u rali. ₂₈O ita uri ndi takalelwe nga khosi na vhaeletshedzi vhawe na magota oṱhe a khosi a maanḓa. Ndo vha na nungo, nda kuvhanganya vharangaphanḓa vha Israele uri vha gonye Jerusalema na nṋe, nge tshanḓa tsha Muṋe washu Mudzimu wanga tsha vha tshi na nṋe.”