EKISODA 33

₁Muṋe washu a vhudza Mushe a ri, “Ṱuwani hafha fhethu, iwe na vhathu vhe wa vha pfulusa Egipita, ni ye shangoni ḽe nda fulufhedzisa uri ndi ḓo ḽi ṋea Abrahamu na Isaka na Jakopo na vhaḓuhulu vhavho. ₂Ndi ḓo ruma muruṅwa a ni ranga phanḓa nda thatha Vhakanana na Vhaamori na Vhahithi na Vhapherisi na Vhahivi na Vhajebusi. ₃Ni khou ya shangoni ḽi elaho mukhaha na ṋotshi. Hone Nṋe a thi nga ṱuwi na inwi ngauri ni vhathu vha tshipimbi, ndi nga ḓo ni lozwa nḓilani.”

₄Vhathu vha tshi pfa hezwo, vha thoma u lila, vha si tsha ambara nungu. ₅Muṋe washu o vha o laya Mushe uri a vha vhudze a ri, “Ni vhathu vha tshipimbi. Arali nda ṱuwa na inwi naho tsha tou vha tshifhinganyana zwatsho, ndi nga ni lozwa tshoṱhe. Zwino bvulani nungu dzaṋu, ndi hone ndi tshi ḓo vhona zwine nda ḓo ni ita.” ₆Vhaisraele tshee vha ṱuwa thavhani ya Horebe, a vho ngo tsha ambara nungu.

₇Hoṱhe he Vhaisraele vha ṱoka mishasha, Mushe o dzhia dennde khethwa a i akha kulenyana na mishasha. Yo vha i tshi pfi dennde ya u ṱangana na Muṋe washu. Muṅwe na muṅwe we a vha a tshi ṱoḓa u vhudzisa Muṋe washu tshiṅwe, o vha a tshi bva a ya khayo. ₈Musi Mushe a tshi bva a tshi ya hone, vhathu vho vha vha tshi takuwa vha ima muṋangoni wa dennde dzavho vha sedza Mushe a vhuya a dzhena khayo. ₉Musi Mushe o no dzhena ngomu, phuphu ya gole yo vha i tshi tsela fhasi ya ima muṋangoni wa dennde, Muṋe washu a amba na Mushe e kha iḽo gole. ₁₀Vhathu vha tshi tou vhona phuphu ya gole i muṋangoni wa dennde, vho vha vha tshi gwadama miṋangoni ya dennde dzavho. ₁₁Muṋe washu o vha a tshi amba na Mushe vho livhana zwifhaṱuwo, unga muthu a tshi amba na khonani yawe, Mushe a konou humela mishashani. Hone muṱhannga we a vha a tshi mu farisa, ene Joshua ṅwana wa Nunu, a ḓi sala denndeni.

₁₂Mushe a amba na Muṋe washu a ri, “Ndi ngoho uri wo mmbudza uri ndi endedze vhathu ndi vha ise shangoni heḽiḽa, hone a wo ngo mmbudza uri u ḓo nthuma na nnyi. Hufha wo ri wo nnanga ndi vhe muḓinḓa wau, wa ri u a ntakalela. ₁₃Arali nangoho u tshi ntakalela, mmbudze zwe wa dzudzanya, uri ndi u ḓivhe ndi ḓi dzula ndi tshi ita zwine zwa u takadza. U elelwe na uri wo nanga lushaka holu uri lu vhe lwau.”

₁₄Muṋe washu a ri, “Ndi ṱuwe na iwe Nṋe muṋe uri ndi u rudze mbilu?”

₁₅Mushe a fhindula a ri, “Arali wa sa ṱuwa na riṋe, u songo tenda ri tshi ṱuwa fhano fhethu. ₁₆Zwi ḓo vhonala hani uri u a ri takalela nṋe na vhathu vhau arali wa sa ṱuwa na riṋe? Arali wa vha na riṋe zwi ḓo sumbedza phambano yashu na tshakha dziṅwe dzi re fhano fhasi.”

₁₇Muṋe washu a vhudza Mushe a ri, “Ndi ḓo ita zwenezwo zwe wa nkhumbela, ngauri ndi a u ḓivha zwavhuḓivhuḓi nahone ndi a u takalela.”

₁₈Ndi hone Mushe a tshi humbela a ri, “Ndi humbela uri u ntsumbedze lupenyo lwau lu kombodzaho.”

₁₉Muṋe washu a fhindula a ri, “Ndi ḓo ita uri lupenyo lwanga lwoṱhe lu fhire phanḓa hau nda bula dzina ḽanga ḽa Yahavee u tshi zwi pfa. Ndi khathutshela ane nda funa, nda pfela vhuṱungu ane nda funa. ₂₀Tshifhaṱuwo tshanga u nga si kone u tshi vhona; muthu a mmbona a nga si tsha dovha a tshila. ₂₁Hone hafha tsini hanga hu na fhethu hune wa nga ima nṱha ha tombo. ₂₂Musi lupenyo lwanga lu tshi fhira, ndi ḓo u longa bakoni ḽa tombo nda u tsireledza nga tshanḓa tshanga u swika ndi tshi fhira. ₂₃Ndi hone ndi tshi ḓo bvisa tshanḓa tshanga wa mmbona ndo u furalela, hone tshifhaṱuwo tshanga a tshi vhonwi.”