Mbohwana ya musuku na u hangwelwa ha Vhaisraele (32 – 34)
Mbohwana ya musuku
1Musi vhathu vha tshi vhona uri Mushe o no dzulesa thavhani, ha tsha vhuya, vha kuvhanganela Aroni vha mu vhudza vha ri, “Uyo munna Mushe we a ri pfulusa Egipita a ri ḓivhi uri o welwa nga mini, vhone nga vha ri itele mudzimu une wa ḓo ri endedza.”
2Aroni a vha vhudza a ri, “Bvulani zwiṅina zwa musuku zwa vhasadzi vhaṋu na vhana vhaṋu vha vhatuka na vha vhasidzana zwe vha ambara, ni zwi ḓise ngeno ha nṋe.” 3Ndi hone vhathu vha tshi bvula zwiṅina zwavho zwa musuku, vha zwi ḓisa ha Aroni. 4Ene a dzhia izwo zwiṅina a zwi ṋokisa nga mulilo, a fula musuku wa ita lubomo, a vhumba mboho ya musuku. Vhathu vha ri, “Israele, ngoyu mudzimu wau we a u pfulusa Egipita.”
5Ndi hone Aroni a tshi fhaṱa aḽiṱari phanḓa ha mboho ya musuku a ḓivhadza a ri, “Matshelo hu ḓo vha na vhuṱambo ha u hulisa Muṋe washu.” 6Ḽi tshi tsha nga matshelo vha ḓisa zwifuwo zwine zwa ḓo fhiswa zwa vha tshiṱhavhelo, zwiṅwe zwa vha zwa u ḽa zwa vha zwa nduvho ya u konana na Mudzimu. Vhathu vha dzula fhasi vhuṱamboni, vha ḽa vha nwa vha takuwa vha tshina zwa vhuḓabaḓaba.
7Ndi hone Muṋe washu a tshi amba na Mushe a ri, “Ṱavhanya u hume u tsele fhasi ngauri vhathu vhau vhe wa vha pfulusa Egipita vho tshinya, vho nndandula. 8Vho no ḓi ṱutshela nḓila ye nda vha laya uri vha fare yone, vho vhumba mboho nga musuku wo ṋokiswaho, vha i luvha, vha i ṋekedza zwiṱhavhelo. Vha ri ndi yone mudzimu wavho we a vha pfulusa Egipita. 9Ndi a ḓivha uri vhathu avha vha na tshipimbi. 10Zwino u songo linga u nthivhela. Ndo vha sinyutshela, ndi ṱoḓa u vha lozwa. Litsha ndi dzhie iwe na vhaḓuhulu vhau ndi ni ite lushaka luhulu.”
11Hone Mushe a luvhelela Muṋe washu Mudzimu wawe a ri, “Muṋe washu, ndi mini u tshi sinyutshela vhathu vhau vhe wa vha pfulusa Egipita wó angaladza tshanḓa tshau tsha maanḓa? 12Kani u ṱoḓa Vhaegipita vha tshi ri, ‘Koṱo, o vha itela vhukwila a tshi vha pfulusa; o itela uri a vha vhulahele dzithavhani, a vha lozwe tshoṱhe fhano shangoni’? Kanda mbiti dzau dzi ofhisaho. Vha humele, u songo ḓisela vhathu vhau khombo. 13Edzou elelwa vhaḓinḓa vhau Abrahamu na Isaka na Jakopo, vhe wa vha anela nga Iwe muṋe, wa vha fulufhedzisa wa ri, ‘Vhana vhaṋu ndi ḓo vha andisa vha nga ṋaledzi dza lutomboni, shango ḽoṱhe ḽe nda fulufhedzisa ndi ḓo ḽi ṋea vhaḓuhulu vhaṋu ḽa vha ḽavho lini na lini.’ ” 14Ndi hone Muṋe washu a tshi rembulusa mbilu yawe, a si tsha ḓisela vhathu vhawe khombo ye a ri u ṱoḓa u vha ḓisela yone.
15Mushe a huma a tsa thavha o fara maḓaba mavhili a milayo, o ṅwalwa masia oṱhe, nga phanḓa na nga murahu. 16Maḓaba ayo o vha o vhaḓwa nga Mudzimu, na u ṅwalwa o ṅwalwa nga Mudzimu o tou tsheṱa ayo maḓaba.
17Joshua a pfa vhathu vha tshi khou ṱavha mukosi, a vhudza Mushe a ri, “Hu pfala mukosi wa nndwa ngei mishashani.”
18Mushe a fhindula a ri,
“Hoyo mukosi a si muḓalo wa vho kundaho,
a si u lila ha vho kundwaho hoyo mukosi;
ndi pfa mukosi wa luimbo lwa vha re vhuṱamboni.”
19Musi Mushe a tshi swika tsini ha mishasha, a tshi vhona mbohwana na vhathu vha tshi khou tshina, a sinyuwa zwihulu. A laṱa aḽa maḓaba e a vha o a fara, a pwashekana henefho tsindeni ḽa thavha. 20A dzhia iḽa mboho ye vha vha vho i vhumba, a i fhisa a i kuya ya ita luvhanda, a lu hasha nṱha ha maḓi, a a nwisa Vhaisraele. 21Mushe a vhudzisa Aroni a ri, “Vhathu avha vho ni itani ni tshi vhuya na vha ovhisa mulandu mungafha?”
22Aroni a fhindula a ri, “Vha songo ntsinyutshela, muṋe wanga. Vha a ḓivha uri vhathu avha vho tshingamela hani vhuvhini. 23Vho mmbudza uri ndi vha itele mudzimu une wa ḓo vha endedza, vha ri, ‘A ri ḓivhi uri uyo Mushe we a ri pfulusa Egipita o welwa nga mini.’ 24Nṋe nda vha vhudza nda ri, ‘A re na nungu dza musuku ndi nnyi?’ Vhone vha bvula vha ḓisa ha nṋe. Nṋe nda posa muliloni, ha bvelela mboho yenei!”
25Mushe a vhona uri Aroni o ita uri vhathu vha si tsha langea, vha vho ḓiita matsilu maswina avho a tshi zwi vhona. 26Ndi hone a tshi ima khoroni ya mishasha a ṱavha mukosi a ri, “Ane a ima na Muṋe washu nga a ḓe fhano!” Ndi hone Vhalivi vhoṱhe vha tshi kuvhangana khae. 27Mushe a vha vhudza a ri, “Muṋe washu Mudzimu wa Israele u khou vhudza muṅwe na muṅwe waṋu uri a fare pfumo ḽawe, a tshimbile na mishasha yoṱhe u bva khoroni heino u swika kha iṅwe, a vhulahe muṅwe na muṅwe ane a mu fara, a songo khathutshela na ṅwana wa khotsi awe kana khonani dzawe kana vhahura vhawe.”
28Vhalivi vha tenda, vha vhulaha vhanna vhane vha nga swika 3 000 musi wonoyo. 29Mushe a vhudza Vhalivi a ri, “Ṋamusi no ḓikumedza na vha vhotshifhe vha u shumela Muṋe washu nga u vhulaha vhana vhaṋu vha vhatuka na vhana vha vhokhotsi aṋu, zwenezwo Muṋe washu o ni ṋea mashudu.”
30Nga matshelo Mushe a amba na vhathu a ri, “No ovha mulandu muhulu. Huno zwino ndi ḓo gonya thavha nda humela ha Muṋe washu; khamusi a nga ni hangwela mulandu waṋu.” 31Ndi hone Mushe a tshi humela ha Muṋe washu a swika a ri, “Vhathu havha vho ovha mulandu muhulu. Vho ḓivhumbela mudzimu nga musuku. 32A u vha hangweli zwavho naa? Hone arali u sa vha hangweli, izwo thutha dzina ḽanga buguni ye wa ṅwala madzina a vhathu vhau.”
33Muṋe washu a fhindula a ri, “Madzina ane nda ḓo a thutha buguni yanga ndi a avho vho nkhakhelaho. 34Zwino ṱuwa u endedze vhathu u vha ise he nda u vhudza. Muruṅwa wanga u ḓo u ranga phanḓa, hone hu khou ḓa tshifhinga tshine nda ḓo lifhedza mulandu wa vhathu havha.”
35Ndi hone Muṋe washu a tshi ḓisela vhathu dwadze nge vha kombetshedza Aroni uri a vhumbe mboho ya musuku.
