EKISODA 34

₁Muṋe washu a vhudza Mushe a ri, “Vhaḓa maḓaba mavhili a matombo ane a fana na a u thoma, Nṋe ndi ḓo ṅwala khao maipfi eneaḽa e a vha e kha aḽa a u thoma, e iwe wa a pwashekanya. ₂Matshelo ḽi tshi tou tsha u ḓilugise, u gonye thavha ya Sinai, u ḓo ṱangana na Nṋe henefho muṱumbani wayo. ₃U songo gonya na muthu, hu songo vhonala muthu e kha thavha, na nngu na kholomo dzi songo fula tsindeni ḽa thavha.”

₄Ndi hone Mushe a tshi vhaḓa maṅwe maḓaba mavhili a matombo, nga matshelo ḽi tshi tou tsha a a hwala a gonya nao thavhani ya Sinai, sa zwe Muṋe washu a mu laya.

₅Muṋe washu a tsela fhasi e kha gole, a ima nae henefho, a bula dzina ḽawe ḽa Yahavee. ₆Muṋe washu a fhira phanḓa hawe a ḓivhadza a ri, “Nṋe Yahavee, Nṋe Yahavee, ndi Mudzimu ane a vha na tshilidzi na khathutshelo, a thi fheli mbilu, ndi na vhuthu vhuhulu, ndi a fulufhedzea. ₇Ndi dzula ndi na lufuno ha vhuya ha fhira mirafho na mirafho, nda hangwela vhathu milandu yavho na vhutshinyi na vhuvhi havho, hone a thi litshi u lifhedza milandu yavho na kha vhana na vhaḓuhulu, ha vhuya ha fhira murafho wa vhuraru na wa vhuṋa.”

₈Mushe a ṱavhanya a gwadama fhasi a luvha. ₉Mushe a ri, “Muṋe wa zwoṱhe, arali nangoho u tshi ntakalela ndi u humbela uri u ṱuwe na riṋe. Vhathu havha vha na tshipimbi, hone ri hangwele milandu yashu na vhuvhi hashu, u ri ṱanganedze ri vhe vhathu vhau.”

₁₀Muṋe washu a amba na Mushe a ri, “Zwino ndi vhofha mulanga na lushaka lwau lwoṱhe. Ndi ḓo ita zwimangadzo vha tshi zwi vhona, vha vhona zwi sa athu vhuya zwa itwa huṅwe fhethu fhano fhasi kha dziṅwe tshakha. Vhathu vhoṱhe vhane wa dzula navho vha ḓo vhona mishumo yanga; ndi ḓo u itela tshithu tshi ofhisaho. ₁₁Thetshelesa milayo ine nda u ṋea ṋamusi. Ndi ḓo thatha Vhaamori na Vhakanana na Vhahithi na Vhapherisi na Vhahivi na Vhajebusi vha ni shavha. ₁₂Ni songo vhuya na vhofha mulanga na vhathu vha shango ḽine na khou ya khaḽo, ngauri itsho tshi nga ḓo vha tshikwekwe tshine tsha ḓo ni fasha. ₁₃Inwi ni thuthekanye aḽiṱari dzavho, ni pwashe matombo avho a zwitungulo, zwiga zwa Ashera mudzimu wavho wa musadzi ni zwi reme.

₁₄“Ni songo luvha muṅwe mudzimu, ngauri Nṋe Yahavee ndi pfi Thivhangiswi, ndi Mudzimu a sa vhangiswi. ₁₅Ni songo vhuya na vhofha mulanga na vhathu vha heḽo shango, ngauri musi vha tshi luvha midzimu yavho ya vhuaḓa, vha tshi i ṋekedza zwiṱhavhelo, vha nga ḓo ni vhidza uri ni baḓekane navho, na vho ḓo ḽa zwiḽiwa zwine vha zwi sumela midzimu yavho. ₁₆Vhana vhaṋu vha nga ḓo dzea vhasadzi havho vha vhatsinda, vha vha ita uri vha ntshandukele, vha luvhe midzimu yavho ya vhuaḓa.

₁₇“Ni songo fula midzimu ya tsimbi na i luvha.

₁₈“Dzulani ni tshi ita vhuṱambo ha Vhurotho vhu si na mbilisa. Nga ṅwedzi wa Avivi ni ḽe vhurotho vhu si na mbilisa ni fhedze maḓuvha maṱanu na mavhili, sa zwe nda ni laya, ngauri no pfuluwa Egipita nga ṅwedzi wonoyo.

₁₉“Tanzhe ḽiṅwe na ḽiṅwe ḽa ṅwana wa mutuka na tshifuwo tsha tshiduna tsha kholomo kana nngu ndi zwanga. ₂₀Hone donngi iṅwe na iṅwe ya tanzhe ni i rengulule nga ngwana. Arali na sa i rengulula, ni i vunḓe mutsinga. Ni rengulule vhana vhaṋu vhoṱhe vha vhatuka. Hu songo vha na ane a ḓa phanḓa hanga a songo fara tshithu.

₂₁“Ni na maḓuvha maṱanu na ḽithihi ane na nga shuma mishumo yaṋu ngao, hone nga ḓuvha ḽa vhuṱanu na vhuvhili ni songo shuma, na nga tshifhinga tsha u lima kana tsha u kaṋa ni songo shuma.

₂₂“Ni ḓi ita vhuṱambo ha Dzivhege musi ni tshi thoma u kaṋa goroi yaṋu ya u ranga; ni ḓi ita vhuṱambo ha Mavhuyahaya tshifhefho musi ni tshi kaṋa zwa masimuni.

₂₃“Vhanna vha haṋu vhoṱhe vha ḓe vha nnduvhe luraru nga ṅwaha, Nṋe Yahavee, Mudzimu wa Israele. ₂₄Musi ndo no thatha dzitshakha u swikani haṋu, ndo no engedza shango ḽaṋu, a hu nga vhi na ane a ḓo emula shango ḽaṋu tshifhinga tsha honoho vhuṱambo vhuraru.

₂₅“Musi ni tshi nṱhavhela tshifuwo ni songo ṋekedza vhurotho ho itwaho nga mbilisa. Tshifuwo tshine na tshi ṱhavhela vhuṱambo ha Paseka ni songo vhea muraḓo watsho ufhio na ufhio u swika ḽa matshelo.

₂₆“Ṅwaha muṅwe na muṅwe ni dzhie zwa u thoma zwe na zwi kaṋa masimuni ni zwi ḓise nḓuni ya Yahavee.

“Ni songo bika ngwana kana mbudzana nga mukhaha wa mme ayo.”

₂₇Muṋe washu a vhudza Mushe a ri, “Ṅwala maipfi haya, ngauri mulanga une nda khou u vhofha na iwe na Vhaisraele wo tewa nṱha hao.” ₂₈Mushe a dzula henefho na Muṋe washu a fhedza maḓuvha a 40 na vhusiku hao, a sa ḽi tshithu, a sa nwi tshithu. Mushe a ṅwala maipfi a mulanga kha ayo maḓaba, yone Milayo ya fumi.

₂₉Mushe a tshi tsa thavhani ya Sinai ó fara Milayo ya fumi, tshifhaṱuwo tshawe tsha vhonala tshi tshi khou penya nge a vha a tshi khou amba na Muṋe washu, hone ene o vha a sa zwi ḓivhi. ₃₀Aroni na vhathu vhoṱhe vha sedza Mushe vha vhona a tshi khou penya, vha ofha u sendela tsini hawe. ₃₁Huno Mushe a vha vhidza, Aroni na vharangaphanḓa vhoṱhe vha vhathu vha ya khae, Mushe a amba navho. ₃₂Ndi hone Vhaisraele vhoṱhe vha tshi kuvhangana ha Mushe, ene a vha ṋea milayo yoṱhe ye a ṋewa nga Muṋe washu thavhani ya Sinai. ₃₃Musi Mushe o fhedza u amba navho, a khurumela lupila. ₃₄Mushe a tshi dzhena denndeni ya u ṱangana na Muṋe washu uri a ambe na Muṋe washu, o vha a tshi khurumula lupila. Musi a tshi bvela nnḓa o vha a tshi vhudza Vhaisraele zwoṱhe zwe a laiwa uri a zwi ambe, ₃₅vhone vha ḓi vhona tshifhaṱuwo tshawe tshi tshi khou penya. Ene a dovha a khurumela luḽa lupila u swika a tshi dovha u vhuelela u amba na Muṋe washu.