EKISODA 31

₁Muṋe washu a amba na Mushe a ri, ₂“Ndo nanga Betsalele, ṅwana wa Uri muḓuhulu wa Huru, ane a bva kha tsinde ḽa Juda, ₃nahone ndo mu ḓadza Muya wanga. Ndo mu ṋea ṱhalukanyo na vhutsila na vhukoni ha mushumo muṅwe na muṅwe wa u ita makolo – ₄wa u ita dzipulane dza zwa vhutsila na u zwi fhoma musuku na siliva na musinaseṱha; ₅wa u tsheṱa nungu dza u ṱama; wa u vhaḓa thanda; na mushumo muṅwe na muṅwe wa zwa vhutsila. ₆Ndo nanga na Oholiaba ṅwana wa Ahisamakha, a no bva kha tsinde ḽa Dani, uri a shume nae. Nda dovha nda ṋea vhatsila vhoṱhe vhukoni vhuhulu, uri vha kone u ita zwoṱhe zwe nda ri zwi itwe: ₇dennde ya u ṱangana na Nṋe na mbulungelo i re na milayo na tshitibo tshayo na thundu yoṱhe ya dennde, ₈na ḓafula na thundu dzaḽo na tshivheambone tsha musuku u songo vangiwaho na thundu yatsho yoṱhe, na aḽiṱari ya u fhisela zwioro, ₉na aḽiṱari ya u fhisela zwiṱhavhelo na thundu dzayo dzoṱhe na sambelo na tshiraho tshaḽo, ₁₀na zwiambaro zwa maṱeleṱele zwa tshifhe Aroni na vhana vhawe zwine vha zwi ambara musi vha tshi shuma mushumo wa vhutshifhe, ₁₁na mapfura a u ḓodza na zwioro zwi nukhelelaho u ḓifha zwa fhethu hukhethwa. Vha tshi ita zwithu hezwo vha zwi ite vha tshi tevhedza vhukuma zwe nda u laya.”

₁₂Muṋe washu a vhudza Mushe ₁₃uri a vhudze Vhaisraele a ri, “Vhulungani Sabatha, ḓuvha ḽanga ḽa u awela, ngauri ndi tshiga vhukati hanga na inwi tsha misi yoṱhe i ḓaho, tshi no sumbedza uri Nṋe Yahavee ndo ni ita vhathu vhanga. ₁₄No fanela u vhulunga ḓuvha ḽa u awela ngauri ndi ḽikhethwa. Ane a si ḽi vhulunge, a shuma nga ḓuvha ḽeneḽo, a vhulawe, a songo tsha vhalwa kha lushaka. ₁₅Ni na maḓuvha maṱanu na ḽithihi a u shuma mishumo yaṋu, hone ḓuvha ḽa vhuṱanu na vhuvhili ndi ḓuvha ḽa u awela tshoṱhe, ḽo kumedzwa Nṋe Yahavee. Ane a vhuya a shuma nga heḽo ḓuvha a vhulawe. ₁₆Vhaisraele vha vhulunge heḽo ḓuvha zwi tshi ya nga mirafho na mirafho, ḽi vhe tshiga tsha mulanga. ₁₇Ndi tshiga tsha lini na lini vhukati ha Vhaisraele na Nṋe, ngauri Nṋe Yahavee ndo ita ḽiṱaḓulu na ḽifhasi nga maḓuvha maṱanu na ḽithihi, nga ḓuvha ḽa vhuṱanu na vhuvhili nda litsha u shuma nda awela.”

₁₈Musi Mudzimu o fhedza u amba na Mushe thavhani ya Sinai, a mu ṋea maḓaba mavhili a matombo e Mudzimu Ene muṋe a vha o ṅwala milayo khao.