EKISODA 30

₁“U ite aḽiṱari ya u fhisela zwioro, u i ite nga thanda ya muunga. ₂Vhunavha na vhuphara vhu eḓane, vhunavha i vhe hafumitha, vhuphara i vhe hafumitha, vhulapfu u ya nṱha i vhe mitha. Ṋanga dzayo dzi vhe tshipiḓa tshithihi nayo. ₃Nga nṱha hayo na matungo ayo u mona nayo na ṋanga dzayo, zwi fhomiwe nga musuku u songo vangiwaho, i ṱamiwe nga lubomo lwa musuku u mona nayo. ₄U ṱumetshedze mikungelo mivhili ya musuku khayo fhasi ha lubomo masia ayo mavhili o fhambanaho, iyo ndi ya u ṱoma thanda dzine ya hwalwa ngayo. ₅Idzo thanda u dzi ite nga thanda ya muunga, u dzi fhome nga musuku. ₆Iyo aḽiṱari u i vhee phanḓa ha lupila lune lwa nembelela phanḓa ha mbulungelo i re na milayo, u livhana na tshitibo tshine tsha tiba mbulungelo i re na milayo, fhethu hune nda ḓo ṱangana na iwe. ₇Henefho Aroni o fanela u fhisa zwioro matsheloni maṅwe na maṅwe musi a tshi ḓa u lugisa mbone. ₈A ḓi ralo musi a tshi ḓa u funga mbone nga madekwana. Nṋe Yahavee ni ḓi nndubisela nduvho ya zwioro, zwi tshi ya nga mirafho na mirafho. ₉Kha aḽiṱari heyo u songo ṋekedza zwioro zwi songo tiwaho nga Yahavee; hu songo ṋekedzwa tshiṱhavhelo tshi fhiswaho kana nduvho ya mbeu nahone u songo tevhulela nduvho ya waini khayo. ₁₀Aroni a ite maitele a u pfumelwa luthihi nga ṅwaha kha ṋanga dza aḽiṱari nga malofha a tshiṱhavhelo tsha u ni pfumelela vhutshinyi. Izwo zwi itwe ṅwaha muṅwe na muṅwe. Ni ite nga u ralo zwi tshi ya nga mirafho nga mirafho. Heyo aḽiṱari ndi khethwa-khethwa, i kumedzwe Nṋe Yahavee.”

₁₁Muṋe washu a amba na Mushe a ri, ₁₂“Musi u tshi vhala Vhaisraele, munna muṅwe na muṅwe a bvise tshipfumelo tsha vhutshilo hawe tshi ṋewe Nṋe, uri a si welwe nga khombo musi hu tshi vhaliwa vhathu. ₁₃Muṅwe na muṅwe a re mbaloni iyo a bvise tshelede i ṱoḓeaho, a bvise giramu ṱhanu na nthihi dza siliva hu tshi tevhedzwa muelo wo tiwaho wa thembele, hezwo zwi ṋekedzwe Nṋe. ₁₄Munna muṅwe na muṅwe ane a vhaliwa, wa miṅwaha ya 20 na u fhira, a bvise tshelede yeneyo. ₁₅Mupfumi a songo bvisa i fhiraho iyo, na mushai a songo bvisa ṱhukhu kha iyo musi vha tshi nṋea itsho tshipfumelo tsha vhutshilo havho. ₁₆U kuvhanganye iyo tshelede i tshi bva kha Vhaisraele i shumiswe u londola dennde ya u ṱangana na Nṋe. Muthelo uyo u ḓo vha tshipfumelo tsha vhutshilo havho, Nṋe Yahavee nda ḓo konou elelwa u vha tsireledza.”

₁₇Muṋe washu a amba na Mushe a ri, ₁₈“Ita sambelo ḽa musinaseṱha ḽi vhe na tshiraho tsha musinaseṱha. U ḽi vhee vhukati ha dennde ya u ṱangana na Nṋe na aḽiṱari, u shele maḓi ngomu haḽo. ₁₉Aroni na vhana vhawe vha ṱambe zwanḓa zwavho na milenzhe nga ayo maḓi. ₂₀Vha ṱambe vha sa athu dzhena denndeni kana vha sa athu sendela tsini ha aḽiṱari u ṋekedza nduvho i fhiswaho. Ndi hone vha sa ḓo fa. ₂₁Vho fanela u ṱamba zwanḓa zwavho na milenzhe yavho, uri vha si fe. Hoyo ndi mulayo une wa fanela u vhulungwa nga vhone na vhaḓuhulu vhavho zwi tshi ya nga mirafho na mirafho.”

₂₂Muṋe washu a amba na Mushe a ri, ₂₃“Dzhia zwilungi zwi fhiraho zwoṱhe, khilogiramu ṱhanu na nthihi dza mire ya tshiluḓi, khilogiramu tharu dza khinamoni ine ya nukhelela u ḓifha, khilogiramu tharu dza musengele u nukhelelaho ₂₄na khilogiramu ṱhanu na nthihi dza khasia, zwoṱhe zwó kaliwa nga mielo i tendelwaho. U zwi ṱanganye na ḽitha nṋa dza mapfura a muolivi, ₂₅u ite mapfura makhethwa a u ḓodza, o ṱanganywa zwavhuḓi na zwioro nga kuvangele kwa muvangi makone. ₂₆Ayo mapfura a ḓodze dennde ya u ṱangana na Nṋe na mbulungelo i re na milayo, ₂₇na ḓafula na thundu dzaḽo dzoṱhe, na tshivheambone na thundu dzatsho dzoṱhe, na aḽiṱari ya u fhisela zwioro, ₂₈na aḽiṱari ya u fhisela zwiṱhavhelo na thundu dzayo dzoṱhe, na sambelo na tshiraho tshaḽo. ₂₉Izwo zwithu u zwi kumedze Nṋe, ndi hone zwi tshi ḓo vha zwikhethwakhethwa, na tshine tsha zwi kwama tshi ḓo vha tshikhethwa. ₃₀U ḓodze Aroni na vhana vhawe, u vha vhumbe vhotshifhe vhane vha shumela Nṋe. ₃₁U vhudze Vhaisraele uri haya ndi mapfura anga makhethwa a u ḓodza zwi tshi ya nga mirafho na mirafho. ₃₂A songo ḓodza vhathu zwavho nahone u songo ita muṅwe muvango une wa fana nawo. One ndi makhethwa, ni a sedze e makhethwa. ₃₃Ane a vhuya a ita maṅwe ane a fana nao, kana a a ḓodza muṅwe muthu ane a si vhe tshifhe, ha tsha ḓo vhaliwa na vhathu vhanga.”

₃₄Muṋe washu a amba na Mushe a ri, “Dzhia mielo i eḓanaho ya zwilungi zwi ḓifhaho, ṋonzhe na onikha na galabanumu na zwioro zwi songo vangiwaho. ₃₅Izwo u ite ngazwo zwioro, zwi vangiwe nga kuvangele kwa muvangi makone, u zwi lunge muṋo uri zwi dzule zwo kuna zwi zwikhethwa. ₃₆Tshipiḓa tshazwo u tshi kuye tshi vhe luvhanda, u lu ise denndeni ya hune nda ḓo ṱangana na iwe, u lu vhee phanḓa ha mbulungelo i re na milayo. Izwo zwioro ni zwi sedze zwi zwikhethwakhethwa. ₃₇Ni songo ḓiitela zwioro zwa muvango une wa nga wonoyo. Zwi sedzeni sa zwithu zwikhethwa zwo kumedzwaho Nṋe. ₃₈Arali muṅwe a ḓiitela tshiḓolo tshine tsha nga tshenetsho, ha tsha ḓo vhaliwa na vhathu vhanga.”