EKISODA 29

₁“Khea maitele ane wa fanela u a tevhela musi u tshi vha kumedza uri vha ntshumele vhe vhotshifhe. Dzhia mbohwana nthihi na thutha mbili dzi si na luvhadzi, ₂na vhurotho vhu si na mbilisa, na khekhe dzi si na mbilisa dzo vangiwaho mapfura na makokisi a si na mbilisa o shashiwaho nga mapfura zwi tshi itwa nga vhukhopfu havhuḓi ha goroi. ₃U zwi longe mufaroni u zwi ṋekedze zwi mufaroni; u zwi ṋekedze khathihi na mbohwana na thutha mbili.

₄“U ḓise Aroni na vhana vhawe muṋangoni wa dennde ya u ṱangana na Nṋe, vha ṱambe muvhili nga maḓi. ₅U dzhie zwiambaro, Aroni u mu ambadze hemmbe na khanzu ya bannda ya u pakata, na yone bannda ya u pakata na tshipilakhana, u mu vhofhe nga muvhofho wo lukiwaho wa bannda ya u pakata. ₆U mu ambadze muthini ṱhohoni, u vhofhelele khare khethwa khawo. ₇Zwenezwo u dzhie mapfura u a shululele ṱhohoni yawe, u ralo hu vhe u mu ta.

₈“Wo no fhedza u ḓise vhana vhawe u vha ambadze hemmbe. ₉U vha vhofhe khundu nga mivhofho, u vha ambadze na mithini ṱhohoni. Vha ḓo vha vho vhumbwa vhotshifhe nga ndaela ya lini na lini. Aroni na vhana vhawe u vha ambadze nga u ralo.

₁₀“U ḓise mboho phanḓa ha dennde ya u ṱangana na Nṋe. Aroni na vhana vhawe vha vhee zwanḓa zwavho ṱhohoni yayo. ₁₁U ṱhavhe phulu yeneyo henefho phanḓa hanga muṋangoni wa dennde ya u ṱangana na Nṋe. ₁₂U dzhie maṅwe malofha ayo u a ṋange nga munwe u a ḓodze ṋanga dza aḽiṱari. Wo no fhedza u shululele malofha o salaho fhasi ha aḽiṱari. ₁₃U dzhie mapfura oṱhe ane a pila miraḓo ya ngomu na phudwane ya tshivhindi na tswio mbili na mapfura adzo o dzi pilaho, u zwi fhise kha aḽiṱari. ₁₄Ṋama ya mboho na mukumba wayo na vhutoko hayo, u zwi fhisele nnḓa ha mushasha, ngauri ndi nduvho i no ṋetshedzelwa u hangwela vhotshifhe vhutshinyi havho.

₁₅“Wo no fhedza u dzhie thutha nthihi. Aroni na vhana vhawe vha vhee zwanḓa zwavho kha ṱhoho yayo. ₁₆U ṱhavhe iyo thutha, u dzhie malofha ayo u a shululele nnḓa u mona na aḽiṱari. ₁₇Wo no fhedza u tshetshekanye iyo thutha nga zwiendanungo, u ṱanzwe miraḓo yayo ya nga ngomu na milenzhe yayo u zwi vhee nṱha ha ṱhoho na zwiṅwe zwipiḓa. ₁₈Zwenezwo u konou fhisa thutha yoṱhe kha aḽiṱari. Heyo i ḓo vha nduvho i fhiswaho, u nukhelela hayo hu ḓo takadza Nṋe Yahavee. Tshi ḓo vha tshiṱhavhelo tshi fhiswaho tsha u nkhulisa.

₁₉“Wo no fhedza u dzhie iḽa thutha iṅwe. Aroni na vhana vhawe vha vhee zwanḓa zwavho kha ṱhoho yayo. ₂₀U ṱhavhe iyo thutha, u dzhie maṅwe malofha ayo u a ḓodze kha nḓevhe ya Aroni ya tshauḽa, na kha nḓevhe dza vhana vhawe dza tshauḽa na kha magunwe a zwanḓa zwavho zwauḽa na kha magunwe a ṋayo dzavho dza tshauḽa, maṅwe malofha o salaho u a shululele nnḓa u mona na aḽiṱari. ₂₁U dzhie maṅwe malofha o salaho nṱha ha aḽiṱari khathihi na mapfura, u handulule Aroni ngao na zwiambaro zwawe, u handulule na vhana vhawe na zwiambaro zwavho uri ene na zwiambaro zwawe na vhana vhawe na zwiambaro zwavho zwi vhe zwo kumedzwa Nṋe.

₂₂“U dzhie mapfura a thutha kha zwipiḓa zwi re na mapfura: mutshila na mapfura ane a pila miraḓo ya nga ngomu na phudwane ya tshivhindi na tswio mbili na mapfura ane a dzi pila na tshizwa tshauḽa, ngauri iyo ndi yone thutha ya u vha ambadza. ₂₃U dzhie mukonde wa vhurotho na khekhe yo itwaho nga mapfura na kokisi, zwi tshi bva mufaroni wa vhurotho vhu si na mbilisa ho ṋekedzwaho Nṋe Yahavee, ₂₄zwoṱhe u zwi vhee zwanḓani zwa Aroni na zwa vhana vhawe, u vha vhudze vha zwi ṋekedze Nṋe nga u zwi imisela nṱha. ₂₅Zwo no ralo u ḓo zwi dzhia khavho wa zwi fhisa kha aḽiṱari, nṱha ha tshiṱhavhelo tshi fhiswaho, zwi tshi nukhelela lwa u ntakadza. Hetsho tshi ḓo vha tshiṱhavhelo tshi fhiswaho tsha u nkhulisa.

₂₆“U dzhie tshiakha tsha thutha ya u vhumba Aroni, u tshi dzungudze phanḓa ha Nṋe Yahavee i vhe nduvho i imiselwaho nṱha; wonoyo u ḓo vha mukovhe wau. ₂₇U nkumedze tshiakha tsha thutha ye ya ṱhavhiwa musi Aroni na vhana vhawe vha tshi vhumbwa vhotshifhe: tshiakha tshe tsha imiselwa nṱha na tshizwa tshe tsha ṋekedzwa. ₂₈Uyo u vhe musumo wa lini na lini une Vhaisraele vha fanela u bvisa vha ṋea Aroni na vhana vhawe. Ndi uri uyo ndi musumo une Vhaisraele vha fanela u bvisa wa vha wa nga musi vha tshi ṋekedza nduvho dzavho dza u konana na Nṋe.

₂₉“Zwiambaro zwa Aroni zwa vhutshifhe zwi ṋewe vhaḓuhulu vhawe musi a tshi fa, vha zwi ambare musi vha tshi ḓodziwa, vha tshi vhumbwa vhotshifhe. ₃₀Ṅwana wa Aroni ane a ḓo sala a tshi vha tshifhe ene o no fa, a dzhena denndeni ya u ṱangana na Nṋe uri a shume Hukhethwa, o fanela u zwi ambara maḓuvha maṱanu na mavhili.

₃₁“U dzhie thutha ya u vha vhumba, u bike ṋama yayo fhethu hukhethwa. ₃₂Aroni na vhana vhawe vha ḽe ṋama ya iyo thutha na vhurotho vhu re mufaroni, vhe muṋangoni wa dennde ya u ṱangana na Nṋe. ₃₃Vha ḽe zwe zwa ṋekedzwa zwa vha tshipfumelo tshavho musi vha tshi vhumbwa vhotshifhe, vha tshi kumedzwa Mudzimu. Hone muthu muṅwe a si tshifhe a songo zwi ḽa, ngauri ndi zwikhethwa. ₃₄Arali ha sala ṋama ya thutha ya u vhumba vhotshifhe kana vhurotho, ḽa vhuya ḽa tsha, zwenezwo zwo salaho u zwi fhise. Zwi songo ḽiwa ngauri ndi zwikhethwa. ₃₅Aroni na vhana vhawe, vhukumakuma u vha ite zwenezwo zwe nda u laya, u fhedze maḓuvha maṱanu na mavhili u tshi vha vhumba vhotshifhe.

₃₆“Ḓuvha ḽiṅwe na ḽiṅwe ḽa hayo maḓuvha u ṋekedze tshiṱhavhelo tsha mboho tshi vhe tshipfumelo tsha vhutshinyi. U tshi ṋekedza tshiṱhavhelo tshine tsha vha tshipfumelo tsha vhutshinyi u ḓo vha u tshi khou kumulula aḽiṱari. Zwenezwo u i ḓodze nga mapfura a muolivi i vhe khethwa. ₃₇U ite nga u ralo ḓuvha ḽiṅwe na ḽiṅwe hu vhuye hu fhele maḓuvha maṱanu na mavhili. Zwenezwo aḽiṱari i ḓo vha i khethwa tshoṱhe; tshine tsha vhuya tsha i kwama, na tshone tshi vho ḓo vha tshiila.

₃₈“Zwine wa fanela u zwi ṋekedza aḽiṱarini ngezwi: ngwana mbili dza ṅwaha muthihi ḓuvha ḽiṅwe na ḽiṅwe u ya ho ya. ₃₉Ngwana ya u thoma u i ṋekedze nga matsheloni, iṅwe u i ṋekedze nga madekwana. ₄₀Ngwana ya u thoma u i ṋekedze na khilogiramu na hafu ya vhukhopfu vhusekene ha goroi ho vangwa na litha nthihi ya mapfura a muolivi a songo vangwaho. U tevhule litha nthihi ya waini i vhe nduvho. ₄₁Ngwana ya vhuvhili u i ṋekedze nga madekwana, u i ṋekedze na vhukhopfu na mapfura a muolivi na waini zwi no eḓana na zwa nga matsheloni. Heyo ndi nduvho i fhiswaho ine ya itelwa u hulisa Nṋe Yahavee, i tshi nukhelela i a ntakadza. ₄₂Heyo nduvho i fhiswaho i dzule i tshi ṋekedzwa nga mirafho na mirafho, muṋangoni wa dennde ya u ṱangana na Nṋe hune nda vha hone. Ndi hone hune nda ḓo ṱangana na iwe nda amba na iwe.

₄₃“Henefho ndi ḓo ṱangana na Vhaisraele, lupenyo lwanga lu kombodzaho lu ḓo ita uri afho fhethu hu vhe hukhethwa. ₄₄Ndi ḓo ita uri dennde ya u ṱangana na Nṋe na aḽiṱari zwi vhe zwikhethwa, Aroni na vhana vhawe ndi ḓo ḓikhethela vhone vha ntshumela vhe vhotshifhe. ₄₅Ndi ḓo dzula na Vhaisraele, nda vha Mudzimu wavho. ₄₆Ndi hone vha tshi ḓo zwi ḓivha uri ndi Nṋe Yahavee Mudzimu wavho we a vha pfulusa Egipita uri ndi kone u dzula navho. Ndi Nṋe Yahavee Mudzimu wavho.