EKISODA 2

₁Ho vha hu na munna wa tsinde ḽa Livi we a vha o dzea musadzi wa Mulivi. ₂Musadzi a vhifha muvhilini a beba ṅwana wa mutukana. Nga u vhona lunako lwa uyo ṅwana, a mu dzumba miṅwedzi miraru. ₃Musi a si tsha kona u mu dzumba, a mu wanela tshirundu tsha ṱhanga, a tshi fhoma nga tshigonṱiri, a longa uyo ṅwana ngomu hatsho, a tshi vhea vhukati ha ṱhanga lumemeni lwa mulambo. ₄Khaladzi a ṅwana a ima kule u vhona tshine tsha nga itea khae. ₅Huno ṅwananyana wa Farao a tsela mulamboni u yo ṱamba, vhananyana vhane vha mu shumela vhone vha tshi khou tshimbila khunzikhunzini ya mulambo. A vhona tshirundu vhukati ha ṱhanga, a ruma mushumi wawe wa musidzana uri a yo tshi dzhia. ₆Ene muṋe a vula a sedza, a vhona ṅwana wa mutukana a tshi khou lila; a mu pfela vhuṱungu. A ri, “Hoyu ndi ṅwana wa muṅwe wa Vhaheberu.”

₇Ndi hone khaladzi a uyo ṅwana a tshi vhudzisa ṅwananyana wa Farao a ri, “Ndi yo vha ṱoḓela muleli kha vhasadzi vha Vhaheberu ane a ḓo vha mamisela uyu ṅwana naa?”

₈Ṅwananyana wa Farao a mu fhindula a ri, “Ndi zwone, tshimbilani!” Musidzana uyo a ya a vhuya na mme a ṅwana vhukuma. ₉Ṅwananyana wa Farao a mu vhudza a ri, “Nga vha ṱuwe na ṅwana hoyu vha mmamisele ene a vhuye a thanye. Nṋe ndi ḓo vha pfufha.” Ndi hone uyo musadzi a tshi dzhia uyo ṅwana a yo mu lela. ₁₀Musi uyo ṅwana o no thanya, a mu isa ha ṅwananyana wa Farao, a vha ṅwana wawe. A ri u pfi Mushe nge a ri, “Ndo mu ṋula maḓini.”

₁₁Musi Mushe o no vha munna, a tshimbila a tshi dalela vhathu vha hawe, a vhona vha tshi konḓiselwa vhutshilo, zwa mu ḽisa mbilu. A vhona Muegipita a tshi khou rwa Muheberu wa hawe. ₁₂A livha-livha a vhona hu si na muthu, a mbo ḓi vhulaha Muegipita a mu dzumba muṱavhani.

₁₃Nga matshelo a vhuya, a wana Vhaheberu vhavhili vha tshi khou lwa. A vhudzisa o levhaho a ri, “Ni rwelani wa haṋu?” ₁₄Uyo munna a fhindula a ri, “No vhewa nga nnyi uri ni vhe muvhusi na muhaṱuli washu? Kani ni ṱoḓa u mmbulaha-vho unga uḽa Muegipita?” Mushe a farwa nga nyofho. A elekanya a ri, “Vhukumakuma zwe nda ita zwi vho ḓivhiwa.”

₁₅Musi Farao a tshi pfa mafhungo ayo a linga uri Mushe a vhulawe, hone Mushe a shavha Farao a livha shangoni ḽa Midiani. A swika a dzula fhasi tsini ha iṅwe bidzi. ₁₆Huno tshifhe wa Midiani o vha e na vhananyana vhaṱanu na vhavhili. Vha ḓa u ka maḓi uri vha ḓadze mikungwa nngu dza khotsi avho dzi nwe. ₁₇Ha swika vhalisa vha vha thatha, hone Mushe a vha lamulela a nwisa nngu dzavho.

₁₈Musi vha tshi humela ha khotsi avho Reuele, a vha vhudzisa a ri, “Khezwi ṋamusi no ṱavhanya u vhuya?” ₁₉Vhone vha fhindula vha ri, “Muṅwe Muegipita o ri lamulela kha vhalisa, a ita na u ri kela maḓi a nwisa sambi ḽa nngu.” ₂₀A vhudzisa vhananyana vhawe a ri, “Zwino u ngafhi? No mu sielani henengei? Iyani ni mu vhidze a ḓe a ḽe na riṋe.”

₂₁Ndi hone Mushe a tshi vho tenda u dzula na uyo munna, Reuele a mu ṋea ṅwananyana wawe Tsiphora a vha musadzi wawe. ₂₂Tsiphora a beba ṅwana wa mutukana, Mushe a ri u pfi Gerisoni (Ndi mueni), nge a ri, “Ndi mutsinda shangoni ḽisili.”

₂₃Hó no fhela miṅwaha minzhi, khosi ya Egipita ya fa. Vhaisraele vho vha vha tshi khou ḓi gomela vhupulini, vha ṱavha mukosi uri Mudzimu a vha farise. Tshililo tshavho tsha swika ha Mudzimu. ₂₄Mudzimu a pfa u gomela havho, a humbula mulanga wawe we a vhofha na Abrahamu na Isaka na Jakopo. ₂₅Mudzimu a sedza u tambula ha Vhaisraele, zwa mu dina.