EKISODA 3

₁Mushe o vha a tshi khou lisa sambi ḽa nngu dza Jethero makhulu wawe, tshifhe wa Midiani. O khada sambi ḽawe ḽa nngu a buḓekanya phanga, a swika Horebe, thavhani ya Mudzimu. ₂Henefho Muruṅwa wa Muṋe washu a ḓisumbedza ene nga tshivhumbeo tsha khavhu ya mulilo, a tshi khou duga ngomu ha tshiṱaka. Mushe a sedza, a vhona tshiṱaka tshi no khou duga, hone tshi sa swi. ₃Mushe a ri, “Kha ndi sendele ndi sedze bono heḽi ḽi kanukisaho, ndi vhone uri ndi mini tshiṱaka tshi sa swi.”

₄Zwino Muṋe washu a mu vhona a tshi sendela uri a sedze, Mudzimu a mu vhidzelela e vhukati ha tshiṱaka a ri, “Mushe, Mushe!” Ene a fhindula a ri, “Ndi fhano!” ₅Mudzimu a ri, “U songo sendela tsini. Bvula navhula dzau, fhethu he wa ima hone ndi mavu makhethwa. ₆Ndi Nṋe Mudzimu wa vhokhotsi au, Mudzimu wa Abrahamu, Mudzimu wa Isaka, Mudzimu wa Jakopo.” Mushe a tshi pfa zwenezwo a khurumela, ngauri o vha a tshi ofha u sedza Mudzimu.

₇Muṋe washu a ri, “Vhukuma ndo vhona u tambudzwa ha vhathu vhanga ngei Egipita. Ndo pfa tshililo tshavho vha tshi ṱavha mukosi nga mulandu wa vhashumisi vhavho. Vhukuma ndi ḓivha u tambula havho. ₈Ndo tsa uri ndi vha lamulele zwanḓani zwa Vhaegipita, ndi vha pfuluse shangoni ḽeneḽo ndi vha ise shangoni ḽa manona ḽo aṱamaho, shango ḽi elaho mukhaha na ṋotshi, haya ha Vhakanana na Vhahithi na Vhaamori na Vhapherisi na Vhahivi na Vhajebusi. ₉Zwino tshililo tsha Vhaisraele tsho swika ha Nṋe, ndo vhona uri Vhaegipita vha vha kandeledza hani. ₁₀Zwenezwo iḓa, ndi u ruma ha Farao u yo pfulusa Vhaisraele vhathu vhanga shangoni ḽa Egipita.”

₁₁Mushe a vhudzisa Mudzimu a ri, “Ndi nṋe nnyi ane nda nga ya ha Farao nda pfulusa Vhaisraele shangoni ḽa Egipita?” ₁₂Mudzimu a ri, “Ndi ḓo vha na iwe, tshiga tshine wa ḓo ḓivha ngatsho uri ndi Nṋe ndo u rumaho ngetshi: u ḓo ri wo no pfulusa vhathu Egipita, na ṋekedza Mudzimu nduvho thavhani heino.”

₁₃Ndi hone Mushe a tshi vhudzisa Mudzimu a ri, “Zwino ndi ḓo takuwa nda ya ha Vhaisraele nda vha vhudza nda ri, ‘Mudzimu wa vhokhotsi aṋu o nthuma ha inwi.’ Huno arali vha mmbudzisa vha ri u pfi nnyi, ndi ḓo vha fhindula mini?” ₁₄Mudzimu a fhindula Mushe a ri, “Ndi ane nda vha Ene.” A dovha a ri, “U vhudze Vhaisraele u ri, ‘arehone ndi Ene o nthumaho ha inwi.’ ”

₁₅Mudzimu a dovha a vhudza Mushe a ri, “U vhudze Vhaisraele u ri, ‘Yahavee Mudzimu wa vhokhotsi aṋu, Mudzimu wa Abrahamu, Mudzimu wa Isaka, Mudzimu wa Jakopo, o nthuma ha inwi.’ Heḽi ndi ḽone dzina ḽanga misi yoṱhe; mirafho yoṱhe i ḓaho yo fanela u nthabela ngaḽo.”

₁₆Mudzimu a tshi isa phanḓa a ri, “Iyo kuvhanganya vhahulwane vha Israele u vha vhudze u ri, ‘Yahavee Mudzimu wa vhokhotsi aṋu o ḓisumbedza nṋe, Ene Mudzimu wa Abrahamu na Isaka na Jakopo. O mmbudza a ri: Vhukuma ndo ni sedza nda vhona zwoṱhe zwine Vhaegipita vha ni ita. ₁₇Zwino-ha, ndo elekanya u ni pfulusa shangoni ḽa Egipita hune na khou kandeledzwa, nda ni isa shangoni ḽa Vhakanana na Vhahithi na Vhaamori na Vhapherisi na Vhahivi na Vhajebusi, shango ḽi elaho mukhaha na ṋotshi.’ ₁₈Vha ḓo thetshelesa maipfi au. U ṱuwe na vhahulwane vha Israele ni ye ha khosi ya Egipita ni mu vhudze ni ri, ‘Yahavee Mudzimu wa Vhaheberu o ḓa u ṱangana na riṋe. Zwino nga vha ri tendele ri fare lwendo lwa maḓuvha mararu ri ye phangani ri yo ṋekedza Yahavee Mudzimu washu zwiṱhavhelo.’ ₁₉A vha Nṋe ndi a ḓivha uri khosi ya Egipita a nga si ni tendele ni tshi ṱuwa arali a sa tou kombetshedzwa. ₂₀Ndi ḓo sumbedza maanḓa anga, nda lifhedza Egipita nga zwimangadzo zwoṱhe zwine nda ḓo zwi shuma henengei. Ndi hone Farao a tshi ḓo konou ni litsha na ṱuwa.

₂₁“Ndi ḓo ita uri Vhaegipita vha tonde vhathu havho uri musi ni tshi pfuluwa, ni si ṱuwe ni si na tshe na fara. ₂₂Musadzi muṅwe na muṅwe u ḓo humbela muhura wawe na musadzi ane a dzula nḓuni yawe, a humbela vhulungu na siliva na musuku na zwiambaro. Izwo ni zwi ambadze vhana vhaṋu vha vhatuka na vhasidzana, u ralo hu ḓo vha u ṱangula Vhaegipita.”