EKISODA 1

₁Ngea madzina a vhana vha Israele vha vhatuka vhe vha ya Egipita na Jakopo, muṅwe na muṅwe na muṱa wawe. ₂Ndi Rubeni na Simioni na Livi na Juda, ₃na Isakhara na Zebuloni na Benyamini, ₄na Dani na Nafuthali na Gadi na Ashere. ₅Vha lutsinga lwa Jakopo vhoṱhe vho ṱangana vho vha vhe vhathu vha 70. Josefa ene o vha o no ḓi vha Egipita.

₆Huno ngavhuya Josefa a fa; na vhana vha khotsi awe vha vhatuka, na vhoṱhe vha murafho wonoyo, vha fa. ₇Hone vhaḓuhulu vha Israele vha vha na vhana vha anda vha tshi ya vha ḓadza shango.

₈Huno kha ḽa Egipita ha thoma u vhusa khosi ntswa ye ya vha i sa ḓivhi tshithu nga Josefa. ₉Iyo khosi ya vhudza vhalanda vhayo ya ri, “Vhonani, avha vhathu vha Vhaisraele vho no andesa, vha na maanḓa, vha vho ri fhira. ₁₀Kha ri vha lukele tshimbevha uri vha si tsha dovha vha andesa, vha sa ḓo ri hu tshi vuwa nndwa vha ima na maswina ashu, vha lwa na riṋe vha ponyoka vha shavha fhano shangoni ḽino.”

₁₁Zwenezwo vha vhea vhalangaphuli uri vha lange Vhaisraele vha vha kandeledze nga mishumo i lemelaho. Ndi zwe vha fhaṱela Farao miḓi ya maḓulu ya Phithomu na Ramisese. ₁₂Hone Vhaegipita vha tshi ḓi ṋaṋa u vha kandeledza, vhone vha ḓi ṋaṋa u anda vha ḓadza shango, Vhaegipita vha thoma u ofha Vhaisraele, ₁₃vha vha farisa tsha u konḓa, ₁₄vha vha konḓisela vhutshilo nga u vha shumisa mishumo i konḓaho ya vumba na zwidina na mishumo yoṱhe ya masimuni; vha vha lemedza kha mushumo muṅwe na muṅwe.

₁₅Ndi hone khosi ya Egipita i tshi amba na vhadzadzefhadzi vha Vhaheberu. Muṅwe o vha a tshi pfi Shifira muṅwe a tshi pfi Phua. ₁₆A vha vhudza a ri, “Musi ni tshi dzadzefhadza vhasadzi vha Vhaheberu ni sedze uri ho bebwa mbeu-ḓe. Arali ha bebiwa mutukana, ni mu vhulahe, arali ha bebiwa musidzana ni mu litshe a tshile.” ₁₇Hone vhadzadzefhadzi vho vha vha tshi ofha Mudzimu, vha nyadza ndaela ya khosi ya Egipita, vha litsha vhatukana vha tshila.

₁₈Ndi hone khosi ya Egipita i tshi vhidzisa vhadzadzefhadzi, ya vha vhudzisa ya ri, “No itelani ni tshi litsha vhatukana vha tshila?” ₁₉Vhone vha fhindula Farao vha ri, “Vhasadzi vha Vhaheberu a vha ngi vhasadzi vha Vhaegipita, vha na nungo; vha ṱavhanya u vhofholowa mudzadzefhadzi a sa athu swika khavho.”

₂₀Avho vhadzadzefhadzi Mudzimu a vha tonda. Vhathu vhone vha ḓi anda vha tshi ya, vha vha na maanḓa mahulu. ₂₁Vhunga vhadzadzefhadzi vho vha vha tshi ofha Mudzimu, Ene a vha ṋea miṱa yavho.

₂₂Ndi hone Farao a tshi laya vhalanda vhawe vhoṱhe a ri, “Vhatukana vhoṱhe vhane vha bebiwa nga Vhaheberu ni vha pose mulamboni, hone vhasidzana ni vha litshe vha tshile.”