Dambudzo ḽa vhuṱanu na vhuraru: Nzie dza magerere
1Ndi hone Muṋe washu a tshi amba na Mushe a ri, “Takuwa u ye ha Farao, ngauri ndi Nṋe we nda konḓisa mbilu yawe na dza magota awe uri ndi ite zwiga hezwi zwanga khavho, 2uri u kone u vhudza vhana vhau na vhaḓuhulu zwe nda shonisa Vhaegipita na zwiga zwe nda vha ofhisa ngazwo, uri noṱhe ni ḓivhe uri ndi Nṋe Yahavee.”
3Zwenezwo Mushe na Aroni vha ṱuwa vha ya ha Farao, vha mu vhudza vha ri, “Yahavee Mudzimu wa Vhaheberu u ri, ‘U ḓo hana u nnduvha u swika lini? Litsha vhathu vhanga vha ṱuwe vha yo nṋekedza tshiṱhavhelo. 4Arali wa hana vhathu vhanga vha tshi ṱuwa, izwo matshelo ndi ḓo ḓisa nzie dza magerere shangoni ḽau. 5Dzi ḓo tou phapha fhasi dza ita guma lune na mavu a si tsha ḓo vhonala. Dzi ḓo gunedza zwe zwa ni salela, zwoṱhe zwi songo fhedzwaho nga tshifhango; dzi ḓo ḽa miri yaṋu yoṱhe ine ya mela masimuni. 6Dzi ḓo ḓadza nnḓu dzau na dza magota au na dza Vhaegipita vhoṱhe. Zwi ḓo vha zwine vhokhotsi aṋu na vhomakhulukuku waṋu vha sa athu zwi vhona tshee vha dzula shangoni ḽino u swika zwino.’ ” Mushe a rembuluwa a ṱuwa ha Farao. 7Magota a Farao a mu vhudza a ri, “Uyu munna u ḓo ri ṱulela khombo u swika lini? Kha vha litshe vhanna avha vha ṱuwe vha yo ṋekedza Yahavee Mudzimu wavho tshiṱhavhelo. A vha zwi vhoni uri Egipita zwino ḽi vho ṱoḓou lovha tshoṱhe?”
8Ndi hone Mushe na Aroni vha tshi humiselwa ha Farao, a vha vhudza a ri, “Ṱuwani zwaṋu ni yo ṋekedza Yahavee Mudzimu waṋu tshiṱhavhelo. Hone hu ṱuwa vhafhio?” 9Mushe a fhindula a ri, “Ri ḓo ṱuwa na vhaṱhannga vhashu na vhakalaha vhashu. Ri ḓo ṱuwa na vhana vhashu vha vhatuka na vhasidzana na nngu dzashu na kholomo dzashu, ngauri ri yo itela Yahavee vhuṱambo.” 10Farao a vha goḓa a ri, “Ngavhe Yahavee a tshi vha na inwi arali nda vhuya nda ni litsha na ṱuwa na vhasadzi vhaṋu na vhana vhaṋu! Zwi khagala uri ndi vhukwila. 11Zwi sa itwi ndi zwenezwo! Nga hu ṱuwe vhanna fhedzi vha yo ṋekedza Yahavee tshiṱhavhelo, hufha no vha ni tshi khou ṱoḓa zwenezwo.” Ha ri u ambiwa zwenezwo vha mbo pandelwa phanḓa ha Farao.
12Ndi hone Muṋe washu a tshi vhudza Mushe a ri, “Angaladza tshanḓa tshau u sumbe shango ḽa Egipita, hu ḓe magerere a tshoṱhele shango ḽa Egipita a ḽe zwimela zwaḽo zwoṱhe, zwoṱhe zwo siwaho nga tshifhango.” 13Mushe a angaladza lubaḓa lwawe a sumba shango ḽa Egipita, Muṋe washu a ḓisa muya wa vhubvaḓuvha shangoni, wa tita masiari eneo oṱhe na vhusiku. Nga matsheloni uyo muya wa vhubvaḓuvha wa vha wo no ḓisa magerere.
14Magerere a ṱanganya shango ḽoṱhe ḽa Egipita, a kavha vhuponi hoṱhe ha Egipita. O vha o andesa, e lutsinga lu sa athu vhuya lwa vhonwa, nahone lune lwa si tsha ḓo dovha lwa vhonwa. 15A phapha fhasi mavu a vhuya a tou swifhala ngao, a ḽa zwimela zwoṱhe zwa shango na mitshelo yoṱhe ya miri ye ya vha yo siwa nga tshifhango. Ho vha hu songo tsha sala vhudala kha muri kana tshimela masimuni kha ḽoṱhe ḽa Egipita.
16Farao a ṱavhanya a vhidzisa Mushe na Aroni, a ri, “Ndo khakhela Yahavee Mudzimu waṋu, nda khakhela na inwi. 17Nkhangweleni vhuvhi hanga, holuno luthihi fhedzi, ni rabele Yahavee Mudzimu waṋu a ntsudzulusela bulayo heḽi nandi!”
18Ndi hone Mushe a tshi ṱuwa ha Farao a yo rabela Muṋe washu. 19Muṋe washu a ḓisa muya u no bva vhukovhela wa fhunga wa vhuya wa vho tou vusa maanḓa, wa hwala magerere wa a isa Lwanzheni lwa Dziṱhanga. A ho ngo vhuya ha sala na nzie na nthihi shangoni ḽoṱhe ḽa Egipita. 20Hone Muṋe washu a ita uri Farao a dovhe a ite tshipimbi, a si tende Vhaisraele vha tshi ṱuwa.
Dambudzo ḽa vhuṱanu na vhuṋa: Swiswi
21Ndi hone Muṋe washu a tshi amba na Mushe a ri, “Angaladza tshanḓa tshau tshi sumbe ṱaḓulu, hu ḓe swiswi ḽi tibe shango ḽa Egipita, swiswi ḽine muthu a nga a sa ḽi fara nga tshanḓa.” 22Mushe a angaladza tshanḓa tshawe a sumba ṱaḓulu, ha fhela maḓuvha mararu swiswi ḽo tou bodo shangoni ḽoṱhe ḽa Egipita.
23Ho vha hu si na muthu ane a kona u vhona muṅwe kana u tshimbila, ha vhuya ha fhela maḓuvha mararu, hone hune ha dzula Vhaisraele ho vha hu na tshedza.
24Farao a vhidzisa Mushe, a ri, “Iyani u ṋekedza Yahavee tshiṱhavhelo, hone nngu na kholomo dzi sale fhano. Vhana vhaṋu na vhone ni ṱuwe navho.”
25Mushe a fhindula a ri, “Kani-ha vhone vha ḓo ri ṋea zwifuwo zwa tshiṱhavhelo na nduvho i fhiswaho zwine ra ḓo ṋekedza Yahavee Mudzimu washu? 26Na zwifuwo zwashu ro fanela u ṱuwa nazwo, a ho ngo fanela u sala na kholomo na nthihi, ro fanela u luvha Yahavee Mudzimu washu nga zwifuwo zwashu, riṋe vhaṋe a ri ḓivhi tshiṱhavhelo tshine ra ḓo ṋekedza Yahavee, zwi ḓo vhonwa ro no swika afho fhethu.”
27Hone Muṋe washu a ita uri Farao a vhe na tshipimbi, a si tsha tenda vha tshi ṱuwa. 28Farao a vhudza Mushe a ri, “Ṱuwani maṱoni anga! Ni vhone! Ndi songo tsha ni vhona, musi une nda dovha nda ni vhona ni ḓo fa!” 29Mushe a fhindula a ri, “Vho amba zwone, a vha tsha ḓo dovha vha mmbona.”
