EKISODA 11

₁Muṋe washu a vhudza Mushe a ri, “Ho sala bulayo ḽithihi fhedzi ḽine nda ḓo ḽi ḓisela Farao na ḽa Egipita. Hó no itea zwenezwo u ḓo ni litsha na ṱuwa tshoṱhe. Vhukuma u ḓo tou ni pandamedza! ₂Laya vhathu uri munna muṅwe na muṅwe na musadzi muṅwe na muṅwe a humbele muhura wawe nungu dza siliva na musuku.” ₃Muṋe washu a ita uri Vhaegipita vha hulise Vhaisraele, Mushe ene a vha na bvumo ḽihulu shangoni ḽa Egipita, vhukuma magota a Farao na vhathu vhoṱhe vho vha vha tshi vhona Mushe e muthu muhulwane.

₄Mushe a ri, “Muṋe washu u ri, ‘Vhukati ha vhusiku ndi ḓo buḓekanya shango ḽa Egipita. ₅Matanzhe oṱhe a vhathu vha Egipita a ḓo fa, u thoma nga tanzhe ḽa Farao u guma nga tanzhe ḽa musadzi wa phuli a kuyaho goroi, na matanzhe oṱhe a kholomo. ₆Shangoni ḽoṱhe ḽa Egipita hu ḓo vha na mukosi u sa athu pfiwa, nahone a u tsha ḓo dovha wa pfiwa. ₇Hone kha Vhaisraele, muthu kana tshifuwo, na mmbwa zwayo a i nga vhuyi ya vha huvha, uri ni ḓivhe uri Nṋe Yahavee ndi ṱalula Vhaegipita kha Vhaisraele.’ ₈Ndi hone magota aṋu haya oṱhe a tshi ḓo ḓa ha nṋe vha gwadama phanḓa hanga vha ri: Ṱuwa, iwe na vhathu vhau vhoṱhe! Ho no itea izwo ndi ḓo ṱuwa.” Mushe a ṱuwa ha Farao o sinyuwa zwihulu.

₉Ndi hone Muṋe washu a tshi amba na Mushe a ri, “Farao a nga si ni thethelese; izwo zwi ḓo ita uri ndi ite maḓembe manzhi shangoni ḽa Egipita.” ₁₀Maḓembe oṱhe hayo Mushe na Aroni vho a ita Farao a tshi zwi vhona. Hone Muṋe washu a ita uri Farao a vhe na tshipimbi, a si litshe Vhaisraele vha tshi ṱuwa shangoni ḽawe.