EKISODA 9

₁Ndi hone Muṋe washu a tshi vhudza Mushe a ri, “Iya ha Farao u mu vhudze u ri, ‘Ngea mafhungo a Yahavee Mudzimu wa Vhaheberu, u ri: Litsha vhathu vhanga vha ṱuwe vha yo nnduvha. ₂Arali wa hana vha tshi ṱuwa wa dovha wa vha fareledza, ₃tshanḓa tsha Yahavee tshi ḓo rwa zwifuwo zwau mafuloni, bere na donngi na gamela na kholomo na nngu zwi ḓo welwa nga dwadze dza fa dzoṱhe. ₄Yahavee u ḓo ṱalula zwifuwo zwa Israele na zwa Egipita: zwine zwa vha zwa Vhaisraele a hu nga vhi na tshithihi tshine tsha ḓo fa. ₅Yahavee o no vhea tshikhathi, u ri matshelo u ḓo ḓisa khombo heyo shangoni ḽoṱhe.’ ”

₆Nga matshelo Muṋe washu a ita zwe a amba, zwifuwo zwoṱhe zwa Vhaegipita zwa fa, hone zwa Vhaisraele ha si fe na tshithihi. ₇Farao a londolosa, a wana uri ndi ngoho: ho vha hu si na tshifuwo tsha Vhaisraele na tshithihi tsho faho. Naho zwo ralo, Farao a dovha a ita tshipimbi, a si tende vhathu vha tshi ṱuwa.

₈Muṋe washu a amba na Mushe na Aroni a ri, “Putani milora i si gathi nga zwanḓa i tshi bva ṋanḓoni, Mushe a i hashe muyani Farao a tshi zwi vhona. ₉I ḓo balangana ya nga buse shangoni ḽoṱhe ḽa Egipita, hoṱhe-hoṱhe shangoni ḽa Egipita i ḓo ḓisa zwitshimbili zwine zwa bvisa zwilonda zwi re na vhulwa kha vhathu na zwifuwo.” ₁₀Ndi hone vha tshi dzhia milora ṋanḓoni, vha ima phanḓa ha Farao, Mushe a i hasha muyani. Ya ḓisa zwitshimbili kha vhathu na zwifuwo zwa bvisa zwilonda zwi re na vhulwa, ₁₁ṅanga dza si tsha kona u livhana na Mushe nge mivhili yadzo ya vha yo phapha zwitshimbili unga Vhaegipita vhoṱhe. ₁₂Hone Muṋe washu a ita uri Farao a vhe na tshipimbi, a hana u vha thetshelesa, sa zwe Muṋe washu a vha o dzula o amba.

₁₃Ndi hone Muṋe washu a tshi vhudza Mushe a ri, “Fhindutshela ha Farao, u mu vhudze u ri, ‘Yahavee Mudzimu wa Vhaheberu u ri: Litsha vhathu vhanga vha ṱuwe vha yo nṋekedza nduvho. ₁₄Holuno ndi ḓo ḓisa khombo dzanga dzoṱhe dzi wele kha iwe na magota au na vhalanda vhau, dza tou vhaisa mbilu yau, uri u zwi ḓivhe uri a hu na muṅwe ane a nga Nṋe ḽifhasi ḽoṱhe. ₁₅Ngavhe ndi angaladze tshanḓa tshanga ndi rwe iwe na vhalanda vhau nga dwadze, no vha ni tshi ḓo vha no lozwiwa tshoṱhe ni si tsheeho fhano shangoni. ₁₆Hone ndo ni litsha na tshila ndi tshi itela uri ni vhone maanḓa anga na uri bvumo ḽanga ḽi pfale ḽifhasi ḽoṱhe. ₁₇Naho zwo ralo u kha ḓi ita tshipimbi, u dzivhisa vhathu vhanga vha tshi ṱuwa. ₁₈Zwenezwo, matshelo nga tshifhinga tshenetshi ndi ḓo nisa ḓumbu ḽa tshifhango tshi sa athu vhuya tsha vhonwa Egipita tshee ḽa tewa. ₁₉Zwino ita uri zwifuwo zwau na zwoṱhe zwi re zwau zwi re nnḓa zwi khude. Vhathu na zwifuwo na zwoṱhe zwi re nnḓa, zwi siho nḓuni, tshifhango tshi ḓo zwi nela zwa fa.’ ”

₂₀Maṅwe magota a Farao a tshenuswa nga zwe Muṋe washu a amba, vha ḓisa phuli dzavho na zwifuwo zwavho nḓuni, ₂₁hone vhe vha si londe zwe Muṋe washu a amba vha litsha dziphuli dzavho na zwifuwo zwavho nnḓa.

₂₂Muṋe washu a vhudza Mushe a ri, “Angaladza tshanḓa tshau tshi livhe ṱaḓulu uri tshifhango tshi nele shango ḽoṱhe ḽa Egipita, tshi nele vhathu na zwifuwo na zwoṱhe zwine zwa mela masimuni shangoni ḽa Egipita.” ₂₃Mushe a angaladza lubaḓa lwawe lwa livha ṱaḓulu, Muṋe washu a vhea mutsindo, a nisa tshifhango, lupenyo lwa rwa ḽifhasi. Muṋe washu a nisela shango ḽa Egipita tshifhango. ₂₄Tshifhango tsha wa, lupenyo lu tshi khou vhaimedza vhukati hatsho, ha vha na ḓumbu ḽihulu ḽa tshifhango tshi sa athu vhuya tsha vhonwa kha ḽa Egipita tshee vha thoma u vha lushaka. ₂₅Shangoni ḽoṱhe ḽa Egipita tshifhango tsha rwa zwithu zwoṱhe zwi re nnḓa, vhathu na zwifuwo. Tsha rwa zwimela zwoṱhe zwi re masimuni, tsha fhanzekanya miri yoṱhe i re ḓakani. ₂₆He ha si we tshifhango ndi shangoni ḽa Gosheni fhedzi hune ha dzula Vhaisraele.

₂₇Farao a vhidzisa Mushe na Aroni a ri, “Ndi a tenda uri ndi na mulandu. Yahavee u ita zwi re zwone, nṋe na vhalanda vhanga ri khou ita zwi si zwone. ₂₈Rabela Yahavee a imise mibvumo na tshifhango. Ndi ḓo ni litsha na ṱuwa, a ni tsha ḓo dovha na dzula fhano.”

₂₉Mushe a mu fhindula a ri, “Ndi tshi tou bva fhano muḓini ndi ḓo imisa zwanḓa zwanga zwa livha ha Yahavee. Mibvumo i ḓo ima, tshifhango tsha si tsha wa, uri vha ḓivhe uri ḽifhasi ndi ḽa Yahavee. ₃₀Hone a vha vhone na magota avho, ndi a zwi ḓivha zwavhuḓi uri a vha athu swika hune vha ofha Yahavee Mudzimu washu.”

₃₁Muḓali na baḽi zwo tshinyadzwa, nge baḽi ya vha i tshi khou shela thoro, muḓali u tshi khou ṱuma lurere. ₃₂Hone a ho ngo vha na goroi yo tshinyalaho ngauri yone i vhibvela murahu.

₃₃Mushe a ṱuwa ha Farao a bvela nnḓa ha muḓi. A takusela zwanḓa zwawe ha Muṋe washu, mibvumo na tshifhango zwa ima, mvula ya si tsha dovha ya na. ₃₄Musi Farao a tshi vhona uri mvula na tshifhango na mibvumo zwo ima, a dovha a ita vhuvhi. A dovha a ita tshipimbi, ene na magota awe. ₃₅Farao a vha na tshipimbi, a si tende Vhaisraele vha tshi ṱuwa, sa zwe Muṋe washu a dzula o zwi amba nga mulomo wa Mushe.