ESTERE 3

₁Ngavhuya ho no fhira izwo, khosi Serekesese a hulisa Hamani a mu ṋea tshiimo tshi no fhira tsha vhaḓivhalea vhoṱhe. Hamani o vha e ṅwana wa Hamidatha, wa lutsinga lwa Agaga. ₂Khosi ya laya uri magota oṱhe ane a i shumela vha hulise Hamani nga u mu gwadamela. Hone Maradokai a si gwadame a tshi mu hulisa. ₃Vhaṅwe vhakoma vha khosi vha mu vhudzisa uri ndi mini a tshi nyadza ndaela ya khosi. ₄Misi yoṱhe vha ḓi amba nae, hone ene a hana. Maradokai a ri, “Nṋe ndi Mujuda, ndi nga si kone u gwadamela Hamani.” Vhone vha vhudza Hamani ayo mafhungo, vha tshi ṱoḓa u vhona arali a tshi nga konḓelela kutshilele kwa Maradokai. ₅Hamani a tou duga nga mbiti a tshi vhona uri Maradokai a nga si mu hulise nga u mu gwadamela. ₆A tshi pfa uri Maradokai ndi Mujuda, a elekanya uri a nga si tou vhulaha Maradokai e eṱhe. A luka vhunwa ha u vhulaha Majuda vhoṱhe vha re muvhusoni woṱhe wa Serekesese.

₇Nga ṅwaha wa 12 wa muvhuso wa khosi Serekesese, nga ṅwedzi wa u ranga, ṅwedzi wa Nisani, Hamani a ri hu itwe madeṅwa (o vha a tshi pfi “phurimi”) uri hu wanale ḓuvha na ṅwedzi wo teaho uri a kone u bveledza tshimbevha tshawe. Deṅwa ḽa wela kha ḓuvha ḽa 13 ḽa ṅwedzi wa 12, ṅwedzi wa Adara.

₈Ndi hone Hamani a tshi vhudza khosi Serekesese a ri, “Hu na luṅwe lushaka lwo balanganaho na dzitshakha madzinguni oṱhe a muvhuso wavho, lune lwa si fune u vangana na vhaṅwe. Maitele avho o fhambana na a dziṅwe tshakha dzoṱhe, nahone vha nyadza milayo ya khosi. A zwo ngo fanela vhamusanda vha tshi zwi konḓelela. ₉Arali thovhele a tshi zwi pfesesa, nga a bvise ndaela ya uri vha vhulawe. Arali vha ita nga u ralo, ndi tou amba ndo khwaṱhisa uri ndi ḓo konou dzhia khilogiramu dza siliva dzine dza fhira 340 000 nda ṋekedza vhafaratshikwama uri vha i vhulunge mbulungeloni ya musanda.”

₁₀Khosi ya bvula rinngi ye ya vha i tshi kandisa ndaela uri dzi vhe dza muvhuso, a i ṋea swina ḽa Mujuda, Hamani ṅwana wa Hamedatha, wa lutsinga lwa Agaga. ₁₁Khosi ya mu vhudza ya ri, “Tshelede ndi yaṋu, vhathu vha iteni zwine na funa.”

₁₂Zwenezwo nga ḓuvha ḽa 13 ḽa ṅwedzi wa u ranga Hamani a vhidza vhaṅwaleli vha khosi a vha vhudza ndaela iyo, ya pfi i ṱalutshedzelwe kha nyambo dzoṱhe na kuṅwalele kwa muvhuso muṅwe na muṅwe, uri zwi rumelwe ha vhavhusi vhoṱhe na magota na vhaḓivhalea. Nḓivhadzo iyo ya ṅwalwa nga dzina ḽa khosi Serekesese, ya kandiswa nga rinngi yawe. ₁₃Ha rumiwa vhagidimi vha isa iyo nḓivhadzo madzinguni oṱhe a muvhuso. Iyo nḓivhadzo yo ri, nga ḓuvha ḽithihi fhedzi, ḽa 13 ḽa Adara, Majuda vhoṱhe, vhahulwane na vhaṱuku, vhasadzi na vhana, vha vhulawe. Vho vha vho fanela u vhulawa vha sa khathutshelwi, vha tou lozwiwa vha ṱangulwe na thundu yavho. ₁₄Ha pfi hu ṅwalwe kopi dza iyo ndaela; dzi iswe madzinguni oṱhe, uri vhoṱhe vha vhe vho ḓilugisa musi ḓuvha iḽo ḽi tshi swika.

₁₅Khosi ya laya uri nḓivhadzo iyo i ḓivhadzwe vhathu vhoṱhe musanda wa Shushani, ha rumiwa vhagidimi madzinguni vha isa ayo mafhungo. Khosi na Hamani vha dzula fhasi vha ḓinwela waini, ngeno muḓini wa Shushani hu na vilinga.