Estere a tshi vha mufumakadzi
1Ngavhuya musi mbiti dza khosi Serekesese dzo no dzika, a elelwa Vashthi na zwe uyo musadzi a ita na zwe a itwa. 2Vhaṅwe vhaeletshedzi vha khosi vhane vha vha vhadzulatsini vha ḓisa muhumbulo hoyu vha ri, “Ndi mini thovhele vha sa londolosi vha ḓiwanela vhasidzana vho nakaho vha sa athu ḓivha munna? 3Thovhele nga vha vhee magota madzinguni oṱhe a muvhuso wavho, vha vha vhudze vha ḓise vhasidzana havho vhoṱhe vhudzuloni ha vhasadzi fhano musanda wa Shushani. Vha ite uri vha londolwe nga Hegai, khombe ya musanda, ane a langa vhasadzi vhavho, avho vhasidzana vha nakiswe. 4Zwenezwo vha dzhie musidzana ane a vha takadzesa a vhe mufumakadzi vhudzuloni ha Vashthi.”
Khosi ya vhona uri iyo ndi nyeletshedzo yavhuḓi, ya ita zwenezwo.
5Henefho musanda Shushani ho vha hu tshi dzula Mujuda we a vha a tshi pfi Maradokai ṅwana wa Jairi, ene o vha e wa tsinde ḽa Benyamini, e wa lutsinga lwa Kishi na Shimei. 6Zwiḽa Nebukhadnetsara khosi ya Babele a tshi hwala khosi Jehoyakhini wa Juda a tshi mu isa vhuthubwani a tshi bva Jerusalema e na tshigwada tsha mathubwa, vhomakhulu vha Maradokai vho vha vhe na vhenevho. 7Munna uyo o vha e na muzwala a no pfi Estere, dzina ḽawe ḽa Tshiheberu ḽi tshi pfi Hadasa; o vha e musidzana wa lunako, e na tshivhumbeo tshavhuḓi. Vhabebi vhawe vho ri u fa, Maradokai a mu dzhia a mu alusa sa ṅwana wawe.
8Musi khosi o no bvisa nḓivhadzo yawe ntswa, ha ḓiswa vhasidzana vhanzhi musanda wa Shushani, ha dzhiwa na Estere. Na ene a iswa pfamoni ya musanda a tshi khou londolwa nga Hegai, we a vha a tshi langa vhudzulo ha vhasadzi. 9Hegai a vhona Estere a tshi mu takadza, a mu ita nga vhuthu. A mbo ḓi ṱavhanya a mu ṋea zwiḓolo zwa u mu nakisa na zwiḽiwa zwavhuḓi. A mu vhea fhethu ho nakesaho hafho vhudzuloni ha vhasadzi, a nanga vhasidzana vhaṱanu na vhavhili vho tou nanguludzwa pfamoni ya musanda uri vha mu shumele.
10Zwino Maradokai a eletshedza Estere uri a songo vhuya a bula uri u Mujuda, nazwino ene a si zwi ambe. 11Misi yoṱhe Maradokai o vha a tshi yo ima khoroni ya vhudzulo ha vhasadzi uri a pfe mutakalo wa Estere, na zwe zwa vha zwi tshi khou itea khae.
12Musi tshifhinga tsha uri musidzana a ye ha khosi Serekesese tshi tshi vho swika, a thoma a fhedza ṅwaha a tshi khou tevhedza maitele a u ḓinakisa o vhetshelwaho vhasadzi, a tshi fhedza miṅwedzi miṱanu na muthihi a tshi khou ḓola mapfura a u mu nakisa, a dovha a fhedza miṅwedzi miṱanu na muthihi a tshi khou ḓola zwiḓolo zwi nukhelelaho. 13Musi a tshi bva vhudzuloni ha vhasadzi a tshi ya pfamoni ya musanda o vha a tshi ambara tshine a tou funa. 14O vha a tshi ya nga madekwana, ḽi tshi tsha nga matsheloni a iswa huṅwe hune ha dzula vhasadzi, a londolwa nga Shaashigasi, khombe ine ya langa vhasadzi vha khosi vha dziphuli. Musidzana uyo o vha a si tsha dovha a humela ha khosi arali khosi i songo mu takalela a tou mu vhidzisa nga dzina ḽawe.
15Ha swika tshifhinga tsha Estere tsha uri a ye ha khosi. Estere, ṅwananyana wa Abihaili, o vha e muzwala wa Maradokai. Maradokai o mu alusa sa ṅwana wawe. Estere o vha a tshi tamiwa nga vhoṱhe vhe vha mu vhona. Musi tshifhinga tshawe tshi tshi swika, a ambara zwenezwiḽa zwe a eletshedzwa nga Hegai, khombe ine ya langa vhudzulo ha vhasadzi. 16Estere a dzhiwa a iswa ha khosi Serekesese pfamoni ya musanda nga ṅwedzi wa fumi, ṅwedzi wa Thebethe, nga ṅwaha wa vhuṱanu na vhuvhili wa Serekesese. 17Zwino khosi a mu funa u fhira vhasidzana vhoṱhe, a mu takalela, a mu tama u fhira vhaṅwe vhoṱhe. A dzhia khare ya vhuhosi a mu ambadza ṱhohoni, a mu ita mufumakadzi vhudzuloni ha Vashthi. 18Ndi hone khosi a tshi itela Estere vhuṱambo vhuhulu, a vhidza vhaḓivhalea vhawe vhoṱhe na magota. A ḓivhadza uri vhathu vha hangwelwe mithelo muvhusoni wawe woṱhe, a kovhela vhathu zwifhiwa zwo fanelaho khosi.
Maradokai a tshi tshidza khosi
19Musi vhasidzana vha tshi kuvhanganyiwa lwa vhuvhili, Maradokai o vha o no vha muhaṱuli khoroni ya musanda. 20A vha Estere, ene o vha a sa athu bula uri ndi Mujuda. Maradokai o vha o mu vhudza uri a songo vhuya a zwi vhudza muthu, ene a mu thetshelesa kha hezwo, sa zwe a mu thetshelesa a tshi kha ḓi vha muṱuku zwiḽa a tshi mu alusa.
21Tshifhinga tsha musi Maradokai o no vha muṅwe wa vhahulwane khoroni ya musanda, Bigithana na Thereshe, magota mavhili vhe vha vha vha tshi linda muṋango, vha sinyuwa, vha langana nga tshiphiri uri vha vhulahe khosi Serekesese. 22Maradokai a zwi pfa, a vhudza mufumakadzi Estere, uyo a vhudza khosi zwe Maradokai a zwi wana. 23Mafhungo ayo a ṱoḓeseswa, ha wanala uri ndi ngoho, magota ayo mavhili a iswa thamboni. Mafhungo ayo oṱhe a ṅwalwa buguni dza muvhuso khosi i tshi zwi vhona.
