ESTERE 4

₁Musi Maradokai a tshi pfa zwoṱhe zwo itwaho, a kherukanya zwiambaro zwawe nga u ṱungufhala, a ambara madzanganda, a ḓihasha milora ṱhohoni, a buḓekanya muḓi a tshi khou zhamba lwa u ṱungufhadza, ₂a vhuya a swika muṋangoni wa pfamo. Ho ngo dzhena pfamoni ngauri ho vha hu sa tendelwi muthu o ambaraho madzanganda a tshi dzhena. ₃Hoṱhe-hoṱhe madzinguni he ha ḓivhadzwa ndaela ya khosi, Majuda vho vha vha tshi khou ṱavha mukosi, vha tshi ḓidzima zwiḽiwa, vha tshi lila vha tshi tou ongolela, vhanzhi vhavho vha ambara madzanganda, vha vhumbuluwa milorani.

₄Vhashumi vha Estere vha vhasidzana na dzikhombe vha mu vhudza zwe Maradokai a ita, zwa mu dina nga maanḓa. A ruma muḓinḓa a isa zwiambaro ha Maradokai uri a ambare a bvule madzanganda, hone Maradokai a zwi landula. ₅Ndi hone a tshi vhidza Hathakhi, muṅwe wa khombe dza pfamoni we a vhewa nga khosi uri a vhe mushumi wawe, a mu vhudza uri a ye ha Maradokai a mu vhudzise uri ho tshinyalani. ₆Hathakhi a ya ha Maradokai tshikweani tsha muḓi muṋangoni wa pfamo, ₇Maradokai a mu vhudza zwoṱhe zwe zwa mu wela na uri Hamani o fulufhedzisa u dzhenisa tshelede nngafhani mbulungeloni ya musanda arali Majuda vhoṱhe vha vhulawa. ₈A ṋea Hathakhi kopi ya ndaela yo ṅwalwaho Shushani, i tshi ri Majuda vha lozwiwe. Maradokai a ri Hathakhi a ise luṅwalo ulwo ha Estere, a mu ṱalutshedze lwone, uri Estere a yo luvhelela ha khosi, a mu humbele a khathutshele vhathu vha hawe. ₉Hathakhi a vhudza Estere mafhungo a Maradokai, ₁₀Estere a mu vhudza uri a humise malaedzwa ha Maradokai a ri, ₁₁“Arali muthu wa munna kana wa musadzi a dzhena muṱani wa nga ngomu a yo amba na khosi á songo vhidzwa, onoyo muthu o fanela u vhulawa. Hoyo ndi mulayo, vhathu vhoṱhe u bva kha vhaeletshedzi vha khosi u swika kha vhathu vha re madzinguni, vha a zwi ḓivha. Hu na nḓila nthihi fhedzi ya u suvha uyo mulayo: Arali khosi a ṋekedza muthu luḓo lwawe lwa musuku, ha vhulawi. Huno ho no ḓi fhela ṅwedzi vhothovhele vha sa mmbidzi.”

₁₂Musi Maradokai a tshi pfa mafhungo a no bva ha Estere, ₁₃a isa malaedzwa ha Estere a u mu laya a ri, “Ni songo humbula uri maṅwe Majuda a tshi vhulawa inwi ni ḓo ponyoka nge na vha pfamoni ya musanda. ₁₄Arali na fhumula musi zwo rali, hu ḓo ḓi vha na iṅwe nḓila ine Majuda vha ḓo fariswa ngayo vha tshidzwa, hone inwi ni ḓo fa, ha vha hu hone muṱa wa khotsi aṋu wo fhela. Khamusi ni tshi itwa mufumakadzi no vha ni tshi itelwa musi wa zwo raliho, zwi ḓihwa nga nnyi?”

₁₅Estere a isa phindulo heino ha Maradokai a ri, ₁₆“Nga vha kuvhanganye Majuda vhoṱhe vha re muḓini wa Shushani, vha ḓidzime zwiḽiwa, vha nthabelele. Vha fhedze maḓuvha mararu vha sa ḽi tshithu vha sa nwi tshithu na vhusiku. Nṋe na vhashumi vhanga vha vhasidzana ri ḓo ita-vho nga u ralo. Musi ro no ita hezwo, ndi ḓo ya ha khosi, naho mulayo u sa tendi. Arali nda lovha, ndi ḓo ḓi lovha zwanga.”

₁₇Ndi hone Maradokai a tshi ṱuwa, a ita zwoṱhe zwe Estere a mu vhudza.