2 SAMUELE 7

₁Musi khosi Dafita o no dzula pfamoni yawe, Muṋe washu ó no mu awedza a si tsha dinwa nga maswina awe oṱhe o mu tangaho, ₂a vhudza muporofita Nathani a ri, “Vha vhona zwi zwone naa nṋe ndi tshi dzula pfamoni yo ṱamiwaho nga mikedara, mbulungelo ya mulanga ya Mudzimu yone i tshi dzula denndeni?”

₃Nathani a fhindula khosi a ri, “Zwine vha zwi humbula mbiluni yavho nga vha zwi ite, Muṋe washu u navho.”

₄Vhusiku honoho ipfi ḽa Muṋe washu ḽa ḓa ha Nathani ḽa ri, ₅“Tshimbila u yo vhudza muḓinḓa wanga Dafita u ri, ‘Yahavee u ri: Ndi iwe une wa ḓo mphaṱela nnḓu nda dzula ngomu hayo naa? ₆Tshee nda pfulusa Vhaisraele Egipita, na ṋamusi, a thi athu vhuya nda dzula ngomu nḓuni. Ndo tendeleka ndi tshi bva fhano ndi tshi ya fhaḽa ndi tshi dzula denndeni. ₇Hoṱhe he nda tshimbila na Vhaisraele ndo no vhuya nda sola muṅwe wa vharangaphanḓa vhavho we nda mu laya uri a lise vhathu vhanga Vhaisraele naa? Kani-ha ndo vhuya nda ri: Ndi mini u songo mphaṱela nnḓu nga mikedara?’

₈“Zwino-ha, vhudza muḓinḓa wanga Dafita u ri, ‘Yahavee Mulangazwoṱhe u ri: Ndo u wana pfuloni u tshi khou lisa sambi ḽa nngu, nda u ita murangaphanḓa wa vhathu vhanga Vhaisraele. ₉Ndo ḓi vha na iwe hoṱhe he wa ya, nda vhulaha maswina au oṱhe a si tsha u dina. Zwino ndi ḓo ita uri u vhe na bvumo, unga ḽa one mahosi mahulu a ḽifhasi. ₁₀Vhathu vhanga Vhaisraele ndi ḓo vha ṋea vhudzulo, nda vha ṱavha uri vha vhe na haya hune ha vha havho, vha si tsha dinwa nga muthu. Vhavhi a vha tsha ḓo dovha vha vha kandeledza unga kale, ₁₁tshee nda vhea vharangaphanḓa vha vhathu vhanga Vhaisraele. Ndi ḓo ita uri u awele, maswina au oṱhe a si tsha u dina. Ndi a u ḓivhadza uri ndi Nṋe ane nda ḓo fhaṱela iwe nnḓu: ₁₂Musi u tshi fa, wa yo awela na vhokhotsi au, ndi ḓo ita uri muṅwe ṅwana wau a vhe khosi, ṅwana wa malofha au, nda khwaṱhisa muvhuso wawe. ₁₃Ndi ene ane a ḓo fhaṱela dzina ḽanga nnḓu, nda khwaṱhisa muvhuso wawe lini na lini. ₁₄Ndi ḓo vha khotsi awe, ene a vha ṅwana wanga. Musi a tshi khakha, ndi ḓo mu rwa unga khotsi a tshi rwa ṅwana wawe a tshi mu laya. ₁₅Huno a thi nga litshi u mu funa unga ndo litsha u funa Saulo, we nda mu sudzulusa uri iwe u kone u vha khosi. ₁₆Nnḓu yau ya vhuhosi na muvhuso wau zwi ḓo dzula zwi hone ndi tshi zwi vhona, khuluṋoni yau i ḓo khwaṱha lini na lini.’ ”

₁₇Nathani a swikisa ha Dafita maipfi oṱhe – zwoṱhe zwe Muṋe washu a mu dzumbululela.

₁₈Khosi Dafita a dzhena denndeni, a dzula phanḓa ha Muṋe washu, a rabela a ri, “Muṋe wa zwoṱhe Muṋe washu, ndi nṋe nnyi, muṱa wanga ndi mini, zwe wa vhuya wa ntswikisa hafhano? ₁₉Zwa tou nga wo vhona zwi songo eḓana, Muṋe wa zwoṱhe Muṋe washu, wa vhuya wa tou amba na zwa misi i ḓaho zwa nnḓu yanga ya vhuhosi. Yawee Muṋe wa zwoṱhe Muṋe washu, muthu zwawe a no nga nṋe a nga fulufhedziswa zwo raloho naa?

₂₀“Ndi nga kha ḓi u vhudza mini Muṋe wa zwoṱhe Muṋe washu? Hufha u tshi nnḓivha, ndi muḓinḓa wau. ₂₁Zwithu hezwo zwihulu wo zwi ita u tshi khunyeledza zwe wa dzula wo mpfulufhedzisa nga u funa hau, wa zwi dzumbululela nṋe. ₂₂Yawee Muṋe wa zwoṱhe Muṋe washu, u muhuluhulu! A hu na ane a nga Iwe. Ro zwi pfa nga dzashu nḓevhe ra zwi vhona: Mudzimu ndi Iwe u woṱhe. ₂₃Lushaka lune lwa nga vhathu vhau Vhaisraele ndi lufhio? Ndi lwone lushaka lu lwoṱhe fhano fhasi lwe Iwe Mudzimu wa ya u lu tshidza lwa vha lwau, dzina ḽau ḽa ḓivhiwa ḽa vha na bvumo, wa ita zwithu zwihulu zwi ofhisaho nga u thatha tshakha na midzimu yadzo dza shavha vhathu vhau, vhe wa vha lamulela Egipita. ₂₄Wo ita uri vhathu vhau Vhaisraele vha vhe vhau lini na lini, Iwe Muṋe washu wa vha Mudzimu wavho.

₂₅“Zwino-ha, Mudzimu Muṋe washu, khunyeledza zwe wa fulufhedzisa u tshi amba nṋe na nnḓu yanga, zwi vhe zwa lini na lini. Ita nga he wa fulufhedzisa, ₂₆uri bvumo ḽau ḽi vhe ḽihulu lini na lini. Ndi hone vhathu vha tshi ḓo ri, ‘Yahavee Mulangazwoṱhe ndi Mudzimu wa Israele!’ Ndi hone nnḓu yanga nṋe muḓinḓa wau Dafita i tshi ḓo pfumba u tshi zwi vhona. ₂₇Muṋe washu Mulangazwoṱhe Mudzimu wa Israele, izwo wo zwi dzumbululela nṋe muḓinḓa wau zwiḽa u tshi ri, ‘Nṋe ndi ḓo u fhaṱela nnḓu.’ Ndi zwe nda wana nungo dza u swikisa thabelo iyi ha Iwe.

₂₈“Muṋe wa zwoṱhe Muṋe washu, ndi Iwe Mudzimu! Maipfi au a a fulufhedzea, wo mpfulufhedzisa izwi zwivhuya. ₂₉Zwino ngavhe zwi tshi u takadza u shudufhadza nnḓu yanga, uri u ḓi dzula u tshi ri vhona, ngauri Iwe Muṋe wa zwoṱhe Muṋe washu wo amba wa shudufhadza nnḓu yanga, na zwino ri ḓo vha na mashudu lini na lini.”