2 SAMUELE 8

₁Ngavhuya Dafita a kunda Vhafilista, a vha luvhisa tshoṱhe a vha dzhiela muvhuso.

₂Dafita a kunda na Vhamuaba. Mathubwa a a ladza fhasi, kha vhararu vhaṅwe na vhaṅwe a vhulaha vhavhili a sia muthihi a tshila. Vhamuaba vha vha vhalanda vha Dafita vha thela muthelo.

₃Zwino Dafita a kunda Hadada Ezere khosi ya Tsoba, ṅwana wa Rehobo, musi Hadada Ezere a tshi khou ya uri a dovhe a luvhise shango u navha na mulambo wa Yufuratha. ₄Dafita a thuba vhanameli vha bere dza nndwa vha 1 700 na vhahali vha 20 000 vha tshimbilaho nga milenzhe. A sia bere dzi no lingana u kokodza gariki dza ḓana, dziṅwe dzoṱhe a dzi holefhadza.

₅Musi Vhaaramu vha Damasko vha tshi ḓa u phalala Hadada Ezere khosi ya Tsoba, Dafita a vhulaha vha 22 000 vhavho. ₆A vhea mmbi muvhusoni wa Vhaaramu vha Damasko, Vhaaramu vha mu luvha vha thela muthelo. Muṋe washu a ita uri Dafita a kunde hoṱhe he a ya.

₇Dafita a dzhia zwiṱangu zwa musuku zwa magota a Hadada Ezere, a zwi isa Jerusalema. ₈A dzhia na musinaseṱha munzhi miḓini ya Teba na Berothai, ye ya vha i tshi vhuswa nga Hadada Ezere.

₉Musi Thoi khosi ya Hamathi a tshi pfa upfi Dafita o kunda mmbi yoṱhe ya Hadada Ezere, ₁₀a ruma ṅwana wawe Joramu u yo resha khosi Dafita, na u mu fhululedza zwe a kunda Hadada Ezere, ngauri Hadada Ezere o vha a tshi ṱolou lwa na Thoi. Joramu a isela Dafita nduvho dza siliva na musuku na musinaseṱha. ₁₁Khosi Dafita a kumedza Muṋe washu idzo nduvho, sa zwe a ita nga siliva na musuku zwi no bva kha tshakha dzoṱhe dze a dzi kunda, ₁₂dza Vhaaramu na Vhamuaba na Vhaamoni na Vhafilista na Vhaamaleke. Dafita a kumedza na zwe a ṱangula Hadada Ezere khosi ya Tsoba, ṅwana wa Rehobo.

₁₃Dafita a vha na bvumo musi a tshi vhuya u vhulaha Vhaedomo vha 18 000 Govhani ḽa Muṋo. ₁₄Dafita a vhea mmbi kha ḽa Edomo ḽoṱhe, Vhaedomo vhoṱhe vha luvha Dafita. Muṋe washu a ita uri Dafita a kunde hoṱhe hune a ya.

₁₅Dafita o vhusa ḽoṱhe ḽa Israele, misi yoṱhe a tshi tevhedza mulayo, a tshi tonda lushaka lwawe lwoṱhe. ₁₆Mulangammbi o vha e Juaba ṅwana wa Tseruya, Jehoshafati ṅwana wa Ahiludu o vha e tshanḓa tsha khosi, ₁₇Tsadoko ṅwana wa Ahitubu na Ahimelekhe ṅwana wa Abiathara vho vha vhe vhotshifhe, Seraya e muṅwaleli wa khosi, ₁₈Benaya ṅwana wa Jehoyada e mulangi wa vhalindi vha Dafita, vhana vha Dafita vhe vhotshifhe vha musanda.