2 SAMUELE 6

₁Dafita a dovha a kuvhanganya vhanna vho nangwaho vha tshi bva kha Vhaisraele, vho ṱangana vha vha 30 000. ₂Dafita na vhanna vhawe vhoṱhe vha takuwa vha ya Baala kha ḽa Juda u yo dzhia mbulungelo ya mulanga ya Mudzimu ine ya pfi ndi ya Muṋe washu Mulangazwoṱhe ane khuluṋoni yawe ya vha vhakherube vha re nṱha ha mbulungelo. ₃Vha i bvisa hayani ha Abinadaba muvhunduni vha i takula vha i vhea kha gariki ntswa. Uza na Ahio, vhana vha Abinadaba vho vha vha tshi khou endedza iyo gariki ₄ye ya vha yo hwala mbulungelo ya Mudzimu, Ahio a tshi khou tshimbila phanḓa hayo, ₅Dafita na Vhaisraele vhoṱhe vha tshi khou tshina, vha tshi imba nga nungo dzavho dzoṱhe phanḓa ha Muṋe washu, hu tshi lila haripa na mbila na mirumba na madende na tshele.

₆Musi vha tshi swika luvhanḓeni lwa u fhulela lwa Nakhoni, phulu dza khukhulwa, Uza a isa tshanḓa a tika mbulungelo ya mulanga ya Mudzimu. ₇Muṋe washu a sinyutshela Uza nge a ita lunyadzo, zwenezwo Mudzimu a mbo ḓi mu vhulaha a fela henefho tsini ha mbulungelo ya mulanga ya Mudzimu. ₈Dafita a sinyuwa nge Muṋe washu a tou fhandula Uza, na ṋamusi fhethu henefho hu pfi Pheretse Uza.

₉Dafita a pfa a tshi ofha Muṋe washu musi wonoyo a ri, “Mbulungelo ya mulanga ya Mudzimu i nga ḓa kha nṋe hani?” ₁₀Dafita a si tsha funa u ṱuwa na mbulungelo ya mulanga ya Muṋe washu a i isa Muḓini wa Dafita. A mbo ḓi i pambusa a i isa muṱani ya Obede Edomo, a no bva muḓini wa Gathi. ₁₁Mbulungelo ya mulanga ya Muṋe washu ya dzula muṱani wa Obede Edomo wa Gathi ya fhedza miṅwedzi miraru, Muṋe washu a shudufhadza Obede Edomo na muṱa wawe woṱhe.

₁₂Zwino khosi Dafita a pfa upfi, “Muṋe washu o shudufhadza muṱa wa Obede Edomo na zwoṱhe zwine a vha nazwo nge a dzula na mbulungelo ya mulanga ya Mudzimu.” Ndi hone Dafita a tshi ṱuwa a yo dzhia mbulungelo ya mulanga ya Mudzimu muṱani wa Obede Edomo a i isa Muḓini wa Dafita hu tshi khou pembelwa. ₁₃Musi vho hwalaho mbulungelo ya mulanga ya Muṋe washu vho tshimbila maga maṱanu na ḽithihi, Dafita a ṋekedza tshiṱhavhelo tsha mboho na ṋamana yo nonaho. ₁₄Dafita a pembela nga nungo dzawe dzoṱhe phanḓa ha Muṋe washu ó ambara luvhemba lwa u pakata lwa lukhaha. ₁₅Dafita na Vhaisraele vhoṱhe vha ḓisa mbulungelo ya mulanga ya Muṋe washu Jerusalema vha tshi khou ṱavha mukosi nga dakalo, hu tshi lila phalaphala.

₁₆Musi mbulungelo ya mulanga ya Muṋe washu i tshi dzhena Muḓini wa Dafita, Mikhala ṅwananyana wa Saulo a ṱodzimela nga fasiṱere, a vhona khosi Dafita a tshi tou fhufha a tshi pembela phanḓa ha Muṋe washu, a mu nyadza mbiluni yawe.

₁₇Vha ḓisa mbulungelo ya mulanga ya Muṋe washu, vha i vhea vhudzuloni hayo ngomu denndeni ye Dafita a i akhela, Dafita a ṋekedza Muṋe washu nduvho dzi fhiswaho na dza u konana na Mudzimu. ₁₈Musi o no fhedza u ṋekedza nduvho dzi fhiswaho na dza u konana na Mudzimu, a shudufhadza vhathu nga dzina ḽa Muṋe washu Mulangazwoṱhe. ₁₉Ndi hone muṅwe na muṅwe we a vha e kha gogo ḽa Vhaisraele Dafita a tshi mu ṋea mukonde wa vhurotho na mpale wa dzideithi na mpale wa nḓirivhe, vhoṱhe vhanna na vhasadzi. Vhathu vhoṱhe vha balangana vha ya mahayani avho.

₂₀Musi Dafita a tshi vhuelela hayani u yo shudufhadza muṱa wawe, Mikhala ṅwananyana wa Saulo a bva u yo mu ṱanganedza a ri, “Khosi ya Israele yo ḓiṱalula ṋamusi, yo ḓiṱana sa tsilu i tshi vhonwa nga phuli dza vhasidzana dza vhalanda vhayo!”

₂₁Dafita a fhindula a ri, “Ndo vha ndi tshi khou pembela phanḓa ha Muṋe washu we a nnanga a litsha khotsi aṋu kana muṅwe a no bva nḓuni yavho, a nta uri ndi vhuse vhathu vha Muṋe washu Vhaisraele, nahone ndi ḓo ḓi pembelela Muṋe washu. ₂₂Ndi kha ḓi ḓo kalula, ndi ḓo vhona ndi si tshithu, hone ndi ḓo huliswa nga vhasidzana havho vha dziphuli vhane na vha amba.”

₂₃Mikhala ṅwananyana wa Saulo a vhuya a fa a si na ṅwana.