2 SAMUELE 22

“Muṋe washu ndi bako ḽanga,

ndi vhushavhelo hanga,

ndi Mulamuleli wanga.

₃Mudzimu wanga ndi tombo ḽanga,

Ene ane nda khuda ngae,

ndi Ene tshiṱangu tshanga,

pfumo ḽi nndwelaho.

Ndo ḓitika ngae,

ndi dzhavhelo ḽanga,

ndi Mutshidzi wanga, u ntshidza kha vhanna vha tshiṱuhu.

₄Muṋe washu ndo ḓi mu vhidzelela ndó welwa nga maswina,

a ntshidza, nga hu khoḓwe Ene.

₅“Ndo vha ndo kumbiwa nga magabelo a lufu,

ndó khakhedzwa nga tshirulu tsha ndozwo.

₆Ndo vha ndo tandedzwa nga mambule a tshalo,

ndó livhana na milavhu ya lufu,

₇nda ḓi vhidzelela Muṋe washu ndó khakhedzwa,

Mudzimu wanga nda mu ṱavhela mukosi,

Ene a pfa ipfi ḽanga e pfamoni yawe,

mukosi wanga wa swika nḓevheni dzawe.

₈“Zwenezwo shango ḽa dzinginyea ḽa tetemela,

miteo ya ḽiṱaḓulu ya tseka-tseka, ya tetemela ó sinyuwa.

₉Ningoni dzawe ha duba vhutsi,

mulomoni wawe ha bva khavhu dza vhuhali,

a pfela masimbe a mulilo fhasi.

₁₀Lutombo a lu peta a tsela fhasi,

fhasi ha ṋayo dzawe hú na swiswi ḽitswu-ḽitswu,

₁₁a fhufha ó namela mukherube,

a vhonala o tengama nga phapha dza muya,

₁₂a dzhia swiswi a fuka ḽone,

thumba yawe e makole matswu a mvula,

₁₃phanḓa hawe he vhenge, vhenge,

makole a shulula masimbe,

₁₄Muṋe washu a ritha mubvumo ṱaḓulu he ngindii,

Waṱaḓuluṱaḓulu a mbo ṱahisa ipfi ḽawe,

₁₅a posa misevhe yawe a vha balanganya,

a thathabisa nḓadzi dzawe vha shavha vhó ḓaḓa.

₁₆Zwenezwo miedzi ya lwanzhe ya sala nnḓa,

miteo ya ḽifhasi ya sala khagala u tshi vha kaidza

Iwe Muṋe washu,

hu tshi tita muya u bvaho ningoni dzau.

₁₇“Muṋe washu a onyolosa tshanḓa e ngei ṱaḓulu,

a ntakula a nṋula mikumbelani,

₁₈a nndamukisa zwanḓani zwa swina ḽanga ḽa maanḓa na vha mmbengaho,

ngauri nṋe ndo vha ndi nga si vha kone.

₁₉Vho nnzhongondedza ndó welwa nga zwo vhifhaho,

fhedzi nda tou fa Muṋe washu,

₂₀Ene a nṋula vhukati havho.

O ntshidza ngauri u a mpfuna.

₂₁“Muṋe washu o mpfufha

nga zwo fanelaho a no fulufhedzea,

a nṋea zwo fanelaho a si na mulandu,

₂₂ngauri ndo tevhedza nḓila dza Muṋe washu,

a tho ngo tenda vhuvhi vhu tshi mphandekanya na Mudzimu wanga.

₂₃Milayo yawe yoṱhe a i ṱuwi mbiluni yanga,

zwe a laya a tho ngo zwi sendedza kule.

₂₄Ene muṋe o vhona ndi sa solisei,

tshanga ho ḓi vha u ofha u khakha.

₂₅Ndi zwe Muṋe washu a mpfufha nga zwo fanelaho a no fulufhedzea,

nge a vhona ndi si na mulandu.

₂₆“Vha vhuthu

Iwe u ḓi vha ita-vho nga vhuthu;

a sa solisei u mu pfufha nga zwi sa solisei;

₂₇vha mbilu dzo ṱambaho vha wana

na Iwe u na mbilu tshena,

hone vhadziavhumbulu vha wana u swina.

₂₈Iwe u tshidza vha ḓiṱukufhadzaho,

wa ṱukufhadza vha u ḓihudza.

₂₉“Muṋe washu,

ndi Iwe luvhone lwanga,

wa pandela swiswi ḽo ntibaho, Iwe Mudzimu wanga.

₃₀Ndí na Iwe ndi wela mmbi nga pfumo,

ndí na Mudzimu wanga ndi fhufha mitsheṱo.

₃₁Ndi Ene Mudzimu a sa khakhi,

ḽine a amba ḽi ḓi wanala ḽi ngoho.

Ndi Ene tshiṱangu tsha vhoṱhe vhane vha khuda ngae.

₃₂Nṋa hone Mudzimu ndi nnyi arali e si Ene Muṋe washu?

Bako ḽa vhudzumbamo hashu ndi nnyi

arali e si Mudzimu washu?

₃₃Ndi Ene Mudzimu we a nnyambadza nungo,

nda tshimbila ndi sa khukhulwi.

₃₄U mpha luvhilo lwa phala,

na nṱha ha thavha a thi khukhulwi.

₃₅Zwanḓa zwanga u zwi gudisa nndwa,

zwa khwaṱha nda akha vhura ha tsimbi tswuku.

₃₆“U tshidzwa nga Iwe

ndi tshone tshiṱangu tshanga,

wa pfa thabelo yanga wa mpha vhuhulwane.

₃₇Ṋayo dzanga wo dzi ṋea vhukando

nda sa redzemuwe.

₃₈Maswina anga ndo a pandamedza nda a fhedza,

nda si vha humele vha sa athu fhela vhoṱhe.

₃₉Ndo vha kuyekanya tshoṱhe nda vha kandekanya nga ṋayo dzanga.

₄₀Wo mpha maanḓa a u dzhena nndwa,

maswina anga wa a susumedza fhasi ha ṋayo dzanga.

₄₁Wo ita uri maswina anga a mphe zwitiko,

nda fhedza vhoṱhe vhe vha vha vha tshi mmbenga.

₄₂Vho ṱavha mukosi vha shaya mulamuleli,

vha vhidzelela Muṋe washu a si vha aravhe,

₄₃nda vha phusukanya sa mavu,

nda vha kudza nnḓa vha nga lurofhe nḓilani.

₄₄“Wo nndamukisa

vha hashu vha tshi mmvutshela,

wa ntsireledza nda vha ṱhoho ya tshakha,

nda luvhiwa na nga vhane nda si vha ḓivhe.

₄₅Vhatsinda vho ḓa vha khotha,

vho ri u mpfa vha thetshelesa,

₄₆vha kulea miraḓo,

vha bva mitsheṱoni yavho vha tshi tou khura nga nyofho.

₄₇“Muṋe washu u a tshila!

Nga hu rendwe Ene bako ḽanga,

nga hu huliswe Ene Mudzimu wanga,

Ene tombo ḽine nda shavhela khaḽo.

₄₈Ndi Mudzimu we a mpha maanḓa a u ḓilifhedzela,

tshakha a dzi ita vhalanda vhanga,

₄₉a nndamukisa zwanḓani zwa vha mmbengaho.

Ndi Iwe we wa nṋea vhuhulwane nda fhira maswina anga,

vhalevhi vha tshi mmvutshela wa ntshidza.

₅₀Muṋe washu,

ndi zwine nda ḓo u renda vhukati ha dzitshakha,

ndi ḓo renda dzina ḽau nga luimbo.

₅₁Khosi ye wa i ta wa i sumbedza lufuno lu sa dzinginyei,

ya kunda maswina tshoṱhe –

ene Dafita na vhaḓuhulu vhawe, zwino na lini na lini.”