2 SAMUELE 23

₁Maipfi a Dafita a u fhedzisela ngea, o ri:

₈Madzina a vhahali vha Dafita vha bvumo ngea: Wa u thoma o vha e Ishbaali wa mutupo wa Hakhimoni, we a vha e ene murangaphanḓa wa Vhararu; o vhuya a lwa na vhanna vha 800 nga pfumo a vha vhulaha vhoṱhe nndwani nthihi.

₉Wa vhuvhili wa avho vhararu vha bvumo ndi Eliasara ṅwana wa Dodo, wa mutupo wa Ahoho. Muṅwe musi Vhafilista vho vha vho kuvhanganela u bva pfumo, ene na Dafita vha vha thoma. Vhaisraele vha humela murahu, ₁₀hone ene a ima a si sudzuluwe, a lwa na Vhafilista u swika tshanḓa tshawe tshi tshi farwa nga nyamurali tsha omelela banga tsha si tsha kona u ḽi litsha. Muṋe washu a ṋea Vhaisraele gundo ḽihulu musi uyo. Ngavhuya Vhaisraele vha humela he Eliasara a vha e hone, vha tou ḓa u ṱangula zwitumbu zwa maswina.

₁₁Wa vhuraru wa avho vhararu vha bvumo o vha e Shama ṅwana wa Agee wa Harari. Vhafilista vho vha vho kuvhangana Lehi, he ha vha hu na tsimu ya eregisi. Vhaisraele vha shavha Vhafilista, ₁₂hone Shama a ima a si sudzuluwe henefho tsimuni, a i tsireledza, a vhulaha Vhafilista. Musi uyo Muṋe washu a ṋea Vhaisraele gundo ḽihulu.

₁₃Muṅwe musi nga tshifhinga tsha khaṋo, vhaṅwe vhararu kha vha 30 vha re vharangaphanḓa, vha tsela ha Dafita bakoni ḽa Adulamu, zwenezwo ho vha ho ḓa tshigwada tsha Vhafilista tsha ṱoka mishasha govhani ḽa Refaimi. ₁₄Tshifhinga tshenetsho Dafita o vha e vhudzumbamoni hawe thavhani, tshigwada tsha Vhafilista tshi Betlehema. ₁₅Dafita a pfa o farwa nga ḓora a tou fhihamelwa a ri, “Ngavhe muṅwe a tshi nkela maḓi a u nwa a no bva bidzini i re tsini na khoro ya Betlehema!” ₁₆Vhanna avho vhararu vha vhuhali vha ḓifunga vha fhira vhukati ha mishasha ya Vhafilista, vha ka maḓi bidzini i re tsini na khoro ya Betlehema, vha a hwala vha a isa ha Dafita. Hone Dafita a hana u nwa ayo maḓi, a tou a tevhulela Muṋe washu ya vha nduvho, ₁₇a ri, “Yawee Muṋe washu, maḓi haya ndi nga a nwa hani? Zwi nga tou nga ndi khou nwa malofha a avha vhanna vhe vha ḓifunga vha tshi ya vha a ka!” Dafita a si nwe ayo maḓi.

Uho ndi vhuhali ha avho vhanna vhararu vha bvumo.

₁₈Abishai murathu wa Juaba ṅwana wa Tseruya, o vha e ene murangaphanḓa wa Vha-30 vha bvumo. O vhuya a lwa na vhanna vha 300 e eṱhe a vha vhulaha, a vha na bvumo kha Vha-30. ₁₉O vha ene wa bvumo ḽihulu kha Vha-30, a vha ene murangaphanḓa wavho, hone o vha a si na bvumo ḽi no nga ḽa Vhararu.

₂₀Muṅwe muhali wa bvumo o vha e Benaya ṅwana wa Jehoyada wa Kabutsiele; ndi kanzhi a tshi sumbedza vhuhali hawe, hu tshi katelwa na vhahali vhavhili vha Muaba, vhana vha Ariele, vhe a vha vhulaha. O vhuya a tsela dindini musi wa gabugu a vhulaha ndau. ₂₁O vhulaha na Muegipita, munna wa muswonḓa we a vha o fara pfumo. Benaya a kovhola uyo Muegipita nga mugopi, a mu zhuvhulela pfumo, a mu vhulaha ngaḽo. ₂₂Uho ndi vhuhali ha Benaya ṅwana wa Jehoyada. O vha e na bvumo kha Vha-30. ₂₃O vha a tshi huliswa u fhira Vha-30, hone o vha a si na bvumo ḽi no nga ḽa Vhararu. Dafita a mu vhea uri a vhe muhulwane wa vhalindi vhawe.

₂₄Kha Vha-30 ho vha hu na: Asaele murathu wa Juaba, Elihanani ṅwana wa Dodo wa Betlehema, ₂₅Shama wa Harodo, Elika wa Harodo, ₂₆Heletse wa Phelete, Ira ṅwana wa Ikeshe wa Thekua, ₂₇Abiesere wa Anathotho, Mebunai wa Husha, ₂₈Tsalimoni wa Ahoho, Maharai wa Netofa, ₂₉Helebe ṅwana wa Baana wa Netofa, Ithai ṅwana wa Ribai wa Gibia kha ḽa Benyamini, ₃₀Benaya wa Phirathoni, Hidai wa magovhani wa Gaashi, ₃₁Abialiboni wa Araba, Asimavethe wa Bahurimu, ₃₂Eliaba wa Shaaliboni, Jasheni wa Gunu, Jonathani ₃₃ṅwana wa Shama wa Harari, Ahiamu ṅwana wa Sharara wa Harari, ₃₄Elifelete ṅwana wa Ahasibai wa Maakha, Eliamu ṅwana wa Ahithofele wa Gilo, ₃₅Hetsiro wa Kharamele, Paarai wa Arabu, ₃₆Igala ṅwana wa Nathani wa Tsoba, Bani wa Gadi, ₃₇Tseleke wa Amoni, Naharai wa Bierotho, muhwali wa zwihali zwa Juaba ṅwana wa Tseruya, ₃₈Ira wa Jathiri, Garebe wa Jathiri, ₃₉na Uria wa Muhithi.

Vhahali vhoṱhe vha bvumo vho ṱangana vho vha vhe 37.