2 SAMUELE 21

₁Dafita a tshee khosi ho vhuya ha wa nḓala ya fhedza miṅwaha miraru. Dafita a vhudzisa Muṋe washu, Muṋe washu a fhindula a ri, “Saulo na nnḓu yawe vha na mulandu wa vhupondi, vho vhulaha Vhagibioni.”

₂Khosi ya vhidzisa Vhagibioni ya amba navho. Vhagibioni vho vha vha si Vhaisraele, vho vha vhe tsalela dza Vhaamori vhe Vhaisraele vha fulufhedzisa nga muano uri vha nga si vha vhulahe, hone Saulo a linga u vha lozwa nge mbilu yawe ya vha i tshi swela Vhaisraele na Vhajuda. ₃Dafita a vhudzisa Vhagibioni a ri, “Ndi ni itele mini? Ndi nga lifha ngani uri ni kone u shudufhadza vhathu vha Muṋe washu?”

₄Vhagibioni vha mu fhindula vha ri, “A ri na pfanelo ya uri ri fhiwe siliva kana musuku nga Saulo kana nga nnḓu yawe, nahone a ri na pfanelo ya u vhulaha muṅwe Muisraele.”

Dafita a vhudzisa a ri, “Zwino ni ṱoḓa ndi tshi ni itela mini?”

₅Vhagibioni vha fhindula khosi vha ri, “Ho vha na munna we a ri lozwa, a ri itela vhunwa uri hu si sale na muthihi washu a tshi tshila kha ḽa Israele. ₆Nga vha ri kumedze vhaḓuhulu vhawe vhaṱanu na vhavhili vha vhanna ri vha vhulahe, ri vha ṱane phanḓa ha Muṋe washu ngei Gibia muḓini wa Saulo, we a vha o nangwa nga Muṋe washu uri a vhe khosi.”

Khosi ya fhindula ya ri, “Ndi ḓo ni kumedza vhone.”

₇Khosi ya khathutshela Miribaali ṅwana wa Jonathani, ṅwana wa Saulo, nge Dafita na Jonathani ṅwana wa Saulo vha vha vho anelana phanḓa ha Muṋe washu. ₈Huno khosi ya dzhia Arimoni na Miribaali, vhana vhavhili vha vhatuka vhe Ritsipha ṅwana wa Aya a vha bebela Saulo, a dzhia na vhana vhaṱanu vha vhatuka vha Mirabu ṅwananyana wa Saulo, vhe a vha o vha bebela Adriele ṅwana wa Barasilai, we a vha a tshi bva Mihola. ₉Dafita a vha kumedza Vhagibioni, vha vha vhulaha, vha vha ṱana tshikwarani phanḓa ha Muṋe washu. Vhoṱhe vhaṱanu na vhavhili vha fa, vhó vhulawa musi khaṋo ya bali i tshi thoma.

₁₀Ritsipha ṅwananyana wa Aya a dzhia madzanganda awe a u lila vhafu a a adza kha tombo. U bva tshee khaṋo ya thoma, mvula ya vhuya ya shuluwa i tshi bva ṱaḓulu ya na kha izwo zwitumbu, Ritsipha ho ngo vhuya a litsha zwiṋoni zwi tshi ḽa izwo zwitumbu masiari kana phukha dza ḓaka vhusiku. ₁₁Musi Dafita a tshi vhudzwa zwe zwa itwa nga Ritsipha ṅwananyana wa Aya, musadzi wa Saulo wa phuli, ₁₂a ya Giliadi a dzhia marambo a Saulo na a ṅwana wawe Jonathani kha vhadzulapo vha Jabeshe. Vhenevho vho vha vho a dzhia nga tshiphiri khoroni ya Bethe Shiani, he Vhafilista vha a nembeledza vhó no vhulaha Saulo thavhani dza Gilibua. ₁₃Dafita a dzhia marambo a Saulo na a ṅwana wawe Jonathani a ita na u kuvhanganya marambo a vhaḽa vhanna vhaṱanu na vhavhili vhe vha vhulawa vha ṱaniwa. ₁₄Vha swiṱa marambo a Saulo na a ṅwana wawe Jonathani tshaloni tsha Kishi khotsi a Saulo muḓini wa Tsela shangoni ḽa Benyamini, vha ita zwoṱhe zwe khosi ya vha laya. Ho no fhela zwenezwo, Mudzimu a fhindula thabelo dzavho dza u rabelela shango.

₁₅Ho vhuya ha vha na nndwa ya Vhafilista na Vhaisraele. Dafita a tsa na vhanna vhawe u yo lwa na Vhafilista, a swika he a neta. ₁₆Muṅwe munna wa muswonḓa we a vha a tshi pfi Ishibi Benobo o vha o fara pfumo ḽa musinaseṱha ḽe ḽa vha ḽi tshi nga lemela khilogiramu tharu na hafu, o kungela banga ḽiswa, a elekanya uri a nga vhulaha Dafita. ₁₇Hone Abishai ṅwana wa Tseruya a ḓa a lamulela Dafita, a lwa na uyo munna wa muswonḓa a mu vhulaha. Ndi hone vhanna vha Dafita vha tshi mu fulufhedzisa vha ri, “Vhone vha luvhone lwa Israele, vha songo dovha vha bva na riṋe pfumo, uri luvhone lwashu lu si dzime.”

₁₈Ngavhuya ha dohwa ha lwiwa na Vhafilista muḓini wa Gobo. Misi yeneyo Sibekhai wa Husha a vhulaha munna wa muswonḓa we a vha a tshi pfi Safu.

₁₉Ha dohwa hafhu ha lwiwa na Vhafilista henefho Gobo, Elihanani ṅwana wa Jairo wa Betlehema a vhulaha Goliada wa Gathi, we a vha e na pfumo ḽi re na mufhiṋi une wa eḓana na luṱanga lwa muhoṱi.

₂₀Ha dohwa hafhu ha lwiwa iṅwe nndwa Gathi. Henefho ho vha hu na munna wa muswonḓa mulapfulapfu. O vha e na minwe miṱanu na muthihi kha tshanḓa tshiṅwe na tshiṅwe na zwikunwane zwiṱanu na tshithihi kha lwayo luṅwe na luṅwe, zwoṱhe zwó ṱangana zwa ita 24. Na ene o vha e muḓuhulu wa Rafa. ₂₁O nyefula Vhaisraele, Jonathani ṅwana wa Shama mukomana wa Dafita a mbo mu vhulaha.

₂₂Havho vhaṋa vho vha vhe vhaḓuhulu vha Rafa wa Gathi, vho vhulawa nga Dafita na vhanna vhawe.