2 SAMUELE 19

₁Juaba a vhudzwa upfi, “Khosi i khou ṱavha mukosi, i khou lila Abisalomo.” ₂Musi wonoyo dakalo ḽa u takalela u kunda ḽa shanduka zwililo kha mmbi yoṱhe ya Dafita ngauri vho pfa hu tshi pfi, “Khosi yo ṱungufhalela ṅwana wayo.” ₃Musi wonoyo vhanna vha ṋengeledza vha dzhena muḓini unga vhanna vha re na ṱhoni vha tshi ṋengeledza vha dzhena vha nga vho shavha nndwani. ₄Khosi ya khurumela ya tou ṱavha mukosi ya ri, “Yawee, ṅwananga Abisalomo! Ṅwananga, ṅwananga, Abisalomo!”

₅Juaba a ya ha khosi a dzhena kamarani a ri, “Ṋamusi vho shonisa vhanna vhavho vhoṱhe vhane vha kha ḓi bva u vha tshidza vha tshidza na vhana vhavho vha vhatuka na vha vhasidzana, vha tshidza na vhafumakadzi vhavho na vhasadzi vhavho vha dziphuli. ₆Vhone vha funa vha vha vhengaho, vha vhenga vha vha funaho. Ṋamusi vho zwi sumbedza zwavhuḓivhuḓi uri vhalangammbi na vhanna vhavho a vha vha londi. Ndi khou zwi vhona uri vhone vho vha vha tshi ḓo takala ṋamusi arali Abisalomo a tshi khou tshila, riṋe roṱhe ro fa. ₇Zwino nga vha bve vha yo khuthadza vhanna vhavho. Nga Muṋe washu ndi ri arali vhone vha sa bvela nnḓa, a hu nga vhi na munna na muthihi ane a ḓo sala na vhone vhusiku vhuno. Hezwi zwi ḓo vha vhifhela u fhira khombo dzoṱhe dze dza vhuya dza vha wela u bva hanani havho u swika zwino.”

₈Ndi hone khosi i tshi vuwa ya yo dzula vhudzuloni hayo mafhoroni, vhanna vha vhudzwa upfi, “Khosi yo dzula mafhoroni,” vhoṱhe vha ḓa phanḓa hayo.

Vhaisraele vhone vho vha vho shavhela mahayani avho. ₉Kha matsinde oṱhe a Israele, vhathu vho vha vha tshi vho solana vha tshi ri, “Khosi yo ri tshidza zwanḓani zwa maswina, ndi yone ye ya ri lamulela zwanḓani zwa Vhafilista. Huno zwino yo shavha shango nga mulandu wa Abisalomo. ₁₀Abisalomo we ra mu vhumba uri a ri vhuse, o fela nndwani. Zwino ndi mini ni sa vhuyi na amba zwa u vhuisa khosi?”

₁₁Khosi Dafita a ruma muḓinḓa ha vhotshifhe Tsadoko na Abiathara a ri, “Vhudzisani vhahulwane vha Juda ni ri, ‘Ndi mini inwi ni tshi nga vha vha u fhedzisela u vhuedzedza khosi pfamoni yayo? Hufha zwine zwa khou ambiwa Israele ḽoṱhe zwo swika ha khosi pfamoni yayo! ₁₂Inwi ni mashaka anga, ri vhathihi, ri malofha mathihi. Zwino ndi mini ni tshi nga vha inwi vha u fhedzisela u vhuisa khosi?’ ₁₃Ni vhudze Amasa ni ri, ‘Kani a ri vhathihi? A ri malofha mathihi? Ngavhe Mudzimu a tshi nthwa a dovha arali u bva zwino nda sa ni ita mulangammbi wanga vhuimoni ha Juaba.’ ”

₁₄Dafita a tswa mbilu dza vhanna vhoṱhe vha Juda vha tou nga munna muthihi. Vha swikisa ipfi ha khosi vha ri, “Nga vha vhuye, vhone na vhanna vhavho vhoṱhe.”

₁₅Khosi ya vhuya, ya tshimbila ya swika Jorodani. Zwino vhanna vha Juda vho vha vho ḓa Giligala uri vha bve vha yo ṱanganedza khosi, vha i wedze Jorodani. ₁₆Shimei ṅwana wa Gera wa Benyamini, a no bva Bahurimu, a mbo ḓi ṱavhanya a tsa na vhanna vha Juda u yo ṱanganedza khosi Dafita. ₁₇O vha e na vha Benyamini vha tshigidi, khathihi na Tsiba, mulondoli wa muṱa wa Saulo, na vhana vhawe vha vhatuka vha 15 na vhashumi vha 20. Vha gidimela Jorodani vha dzhena maḓini khosi i tshi zwi vhona, ₁₈vha wela nga ḓambuwoni u yo dzhia muṱa wa khosi na u tonda khosi nga zwine ya funa.

Musi Shimei ṅwana wa Gera o wela Jorodani a wa a shuvhama phanḓa ha khosi ₁₉a ri, “Ngavhe muṋe wanga vha sa mpfari nga mbilu. Nga vha hangwe zwe nda tshinya musi we vha ṱuwa Jerusalema. Ngavhe thovhele vha tshi zwi bvisa mbiluni yavho. ₂₀Ndi a zwi ḓivha uri ndo tshinya hone ṋamusi ndo ḓa fhano nda vha wa u thoma wa nnḓu yoṱhe ya Josefa u ḓa nda ṱanganedza thovhele muṋe wanga.”

₂₁Ndi hone Abishai ṅwana wa Tseruya a tshi ri, “Shimei ho ngo fanela u vhulawa naa? Hufha o teketela we Muṋe washu a mu nanga uri a vhe khosi!”

₂₂Dafita a fhindula a ri, “A thi funi na u zwi pfa hezwo inwi vhana vha Tseruya! Ṋamusi ni vhavutsheli vhanga! Ṋamusi ho fanela u vhulawa muthu kha ḽa Israele naa? Nṋe a thi zwi ḓivhi uri ṋamusi ndi khosi ya Israele naa?” ₂₃Ndi hone khosi i tshi vhudza Shimei ya ri, “Ni nga si vhulawe.” Khosi ya dovha ya fulufhedzisa Shimei nga muano.

₂₄Miribaali muḓuhulu wa Saulo, na ene a yo ṱanganedza khosi. Tshi tsheetsho tshe khosi ya ṱuwa u swika i tshi vhuya nga mifhululu, Miribaali o vha a sa athu vhuya a ṱamba milenzhe kana a fhungudza ndebvu dzawe kana a kuvha zwiambaro zwawe. ₂₅Musi a tshi bva Jerusalema u ḓa u ṱanganedza khosi, khosi ya mu vhudzisa ya ri, “Miribaali, ndi mini ni songo shavha na nṋe?”

₂₆Miribaali a ri, “Thovhela muṋe wanga, vhunga ndi tshihole, ndo ri, ‘Donngi yanga i ḓo hweswa sala nda i namela uri ndi ṱuwe na khosi.’ Hone Tsiba mushumi wanga o mpheṱa. ₂₇O nnzwifhelela kha thovhele muṋe wanga. Hone thovhele muṋe wanga vha nga muruṅwa wa Mudzimu, nga vha ite zwine vha vhona zwo fanela. ₂₈Vhaḓuhulu vhoṱhe vha makhulu wanga wa tshinna ho vha hu si na tsho vha teaho arali hu si u vhulawa nga thovhele muṋe wanga, naho zwo ralo vho nkhathutshela nda vho ḽa ḓafulani ḽavho. Ndi nga dovha nda humbela u lilelwa nga mini nga thovhele?”

₂₉Khosi ya mu vhudza ya ri, “Mafhungo o fhela! Ndi ri inwi na Tsiba ni kovhekane masimu a Saulo.”

₃₀Miribaali a vhudza khosi a ri, “Nga vha litshe Tsiba a dzhie zwoṱhe, tenda thovhele muṋe wanga vho vhuela hayani vho takala!”

₃₁Barasilai wa Giliadi na ene a ḓa a tshi bva Rogelimu uri a wedze khosi Jorodani, a i fhelekedze a tshi bva henefho. ₃₂Zwino Barasilai o vha o no kalahesa, e na miṅwaha ya 80. O vha a tshi vhavhalela khosi zwiḽa i Mahanaimi, ngauri o vha o pfuma zwihulu. ₃₃Khosi ya amba na Barasilai ya ri, “Nga ri wele roṱhe ri yo dzula roṱhe Jerusalema, ndi ḓo vha vhavhalela.”

₃₄Huno Barasilai a fhindula khosi a ri, “Ndi kha ḓi ḓo tshila miṅwaha mingana, zwine nda vhuya nda ṱuwa na thovhele nda yo dzula Jerusalema? ₃₅Zwino ndi na makole a 80. Ndi kha ḓi vhuya nda thetshela tshi no ḓifha na tshi sa ḓifhi naa? Tshine nda ḽa kana nda nwa ndi kha ḓi tshi thetshela naa? Maipfi a vhaimbi ndi kha ḓi a pfa lini? Ndi nga tou vha muhwalo kha thovhele muṋe wanga. ₃₆Nga vha litshe ndi wedze thovhele mulambo ndi vha fhelekedze tshikhalanyana, hone thovhele vha kha ḓi ḓidinelani nga u mpfufha nga u rali? ₃₇Nga vha litshe ndi hume uri ndi fele muḓini wa hashu tsini ha tshalo tsha khotsi anga na mme anga. Huno ṅwananga Khimihamu ngoyu. Nga vha litshe a wele na thovhele muṋe wanga. Nga vha mu itele tshine vha tou funa.”

₃₈Khosi ya ri, “Khimihamu u ḓo wela seli na nṋe, ndi ḓo mu itela tshine vha tou funa. Na tshine vha funa ndi tshi vha itela ndi ḓo vha itela.”

₃₉Ndi hone vhathu vhoṱhe vha tshi wela Jorodani, na khosi ya wela seli. Khosi ya kuvhatedza Barasilai ya mu shudufhadza, Barasilai a humela hayani hawe. ₄₀Khosi ya wetshela Giligala, Khimihamu a wela nayo.

Mmbi yoṱhe ya Juda na tshipiḓa tsha mmbi ya Israele vho vha vho wedza khosi seli.

₄₁Hu si kale vhanna vhoṱhe vha Israele vha ya ha khosi vha ri, “Ndi mini mashaka ashu vhanna vha Juda vho tswa khosi vha ṱuwa nayo, vha i endedza na muṱa wayo ya wela Jorodani khathihi na vhanna vhayo vhoṱhe?”

₄₂Vhanna vhoṱhe vha Juda vha fhindula vhanna vha Israele vha ri, “Izwo ro zwi ita nge khosi ya vha shaka ḽashu ḽa tsini. Ndi mini zwi tshi ni sinyusa? Kani ro ḽeledza khosi? Ro vhuya ra dzhia tshithu tsha vha tshashu kani?”

₄₃Ndi hone vhanna vha Israele vha tshi fhindula vhanna vha Juda vha ri, “Riṋe ri na mikovhe ya fumi kha khosi, vhukuma Dafita ndi washu u fhira u vha waṋu. Zwino ndi mini ni tshi ri nyadza? A si riṋe vhe ra thoma u amba uri khosi nga i vhuye naa?”

Hone vhanna vha Juda vha fhindula nga vhuhali vhu no fhira ha vhanna vha Israele.