2 SAMUELE 18

₁Dafita a kuvhanganya vhanna vhawe, a vha khethekanya nga zwigwada zwa tshigidi na zwa ḓana, a vhea vhalangammbi vha izwo zwigwada. ₂A ruma mmbi ya bva nga zwigwada zwiraru, i na Juaba na murathu wa Juaba ane a pfi Abishai, ṅwana wa Tseruya, na Ithai wa Gathi, muṅwe na muṅwe e mulangammbi wa tshigwada tshawe. Khosi ya vhudza vhanna vha mmbi ya ri, “Nṋe ndi ḓo takutshedza nda bva na inwi nga tshavhukoma.”

₃Vhone vha fhindula vha ri, “Vha songo bva na riṋe, arali ra shavha, riṋe vha nga si ri tevhele. Naho ha lovha hafu yashu vha nga si londe riṋe. Vhone vha fana na zwigidi zwa fumi zwashu. Ndi khwiṋe vha tshi tou ri khwaṱhisa vhe henefha muḓini.”

₄Khosi ya fhindula ya ri, “Ndi ḓo ita zwine na vhona zwi zwone.”

Khosi ya ima thungo ha khoro vhanna vhoṱhe vha tshi khou bva nga zwigwada zwa ḓana na zwa tshigidi. ₅Khosi ya laya Juaba na Abishai na Ithai ya ri, “Ni songo huvhadza ṅwananga Abisalomo nandi.” Vhanna vhoṱhe vha zwi pfa khosi i tshi laya mulangammbi muṅwe na muṅwe nga Abisalomo.

₆Mmbi ya livha ḓakani u yo lwa na Vhaisraele, nndwa ya lwelwa maṱakani a Efraimi. ₇Henefho mmbi ya Israele ya kundwa nga vhanna vha Dafita. Musi uyo zwo tou vhifha, ha vhulawa vhanna vha 20 000. ₈Nndwa ya angaredza shango ḽeneḽo ḽoṱhe, musi wonoyo vho vhulawaho nga mupo vha fhira vho vhulawaho nga pfumo.

₉Zwino Abisalomo a tshenuwa o ṱangana na vhanna vha Dafita. O vha o namela meila yawe, musi meila i tshi khou sera nga fhasi ha davhi ḽidenya ḽa muri muhulu, ṱhoho ya Abisalomo ya fashiwa nga uyo muri, a sala o nembelela tshikhalani, meila ye a vha o i namela ya ḓi gidima i tshi ya.

₁₀Muṅwe wa vhanna a zwi vhona a vhudza Juaba a ri, “Ndo vhona Abisalomo o nembelela murini.”

₁₁Juaba a fhindula munna we a mu vhudza ayo mafhungo a ri, “Mini? No mu vhona? Ndi mini ni songo mu vhulaha henefho a wela fhasi? Ndo vha ndi tshi ḓo vha ndo ni ṋea mangwende a fumi a siliva na bannda ḽa maṱeleṱele.”

₁₂Hone uyo munna a fhindula a ri, “Naho vho vha vho mpha mangwende a tshigidi a siliva, ndo vha ndi nga si ise tshanḓa tshanga kha ṅwana wa khosi. Hufha khosi yo laya vhone na Abishai na Ithai riṋe ri tshi zwi pfa ya ri, ‘Ni songo huvhadza ṅwananga Abisalomo nandi.’ ₁₃Huno arali ndo vha ndo nyadza khosi nda vhulaha Abisalomo, khosi yo vha i tshi ḓo zwi pfa – i pfa zwithu zwoṱhe – vhone vho vha vha tshi vho ḓo nndaṱa.”

₁₄Juaba a ri, “Ndi nga si ṱwe ndo ima ndi tshi khou fhedza tshifhinga na inwi.” Juaba a dzhia nthi tharu a runga Abisalomo kha khana Abisalomo a tshi kha ḓi tshila o nembelela henefho murini. ₁₅Vhahwalazwihali vha Juaba vha fumi vha mbo tanga Abisalomo vha mu fhedzisa.

₁₆Ndi hone Juaba a tshi lidza phalaphala, mmbi dza litsha u londa Vhaisraele nge Juaba a ri vha litshe. ₁₇Vha dzhia Abisalomo vha mu posa dindini ḽihulu henefho maṱakani, vha khokha thulwi khulu ya matombo nṱha hawe. Zwi tshi khou ralo Vhaisraele vhoṱhe vha shavhela mahayani avho.

₁₈Musi Abisalomo a tshi kha ḓi tshila o imisa tombo ḽa ṱhodzi ndapfu Govhani ḽa Khosi, nge a ri, “A thi na ṅwana ane a ḓo ita uri dzina ḽanga ḽi si hangwiwe.” A rina iḽo tombo dzina ḽawe, na ṋamusi ḽi kha ḓi pfi Tshihumbudzo tsha Abisalomo.

₁₉Zwino Ahimaatsi ṅwana wa Tsadoko a ri, “Litshani ndi gidime ndi swikise mafhungo aya ha khosi uri Muṋe washu o mu lamulela zwanḓani zwa maswina awe.”

₂₀Juaba a mu vhudza a ri, “Ṋamusi mafhungo ha swikiswi nga inwi. Ni nga ḓi swikisa mafhungo muṅwe musi, hone ṋamusi a hu yi inwi, ngauri ho vhulawa ṅwana wa khosi.”

₂₁Ndi hone Juaba a tshi ruma phuli yawe ya Mukushu a ri, “Tshimbilani ni yo vhudza khosi zwe na zwi vhona.” Mukushu a gwadama phanḓa ha Juaba a gidima a ṱuwa.

₂₂Ahimaatsi ṅwana wa Tsadoko a dovha a vhudza Juaba a ri, “Naho ha itea mini, nga vha litshe ndi tevhele Mukushu nga luvhilo.”

Hone Juaba a fhindula a ri, “Ṅwananga, ndi mini ni tshi ḓidina nga u ya? Hufha ni sa ḓo wana tshithu nga mafhungo aṋu.”

₂₃Ahimaatsi a ri, “Naho ha itea mini, ndi funa u gidima nda ya.”

Ndi hone Juaba a tshi ri, “Gidimani zwaṋu!” Ahimaatsi a gidima nga nḓila ya govhani ḽa Jorodani a fhirela Mukushu.

₂₄Dafita o vha o dzula vhukati ha khoro ya ngomu na ya nnḓa, mulindi a gonya mutsheṱo a yo ima ṱhangani ya mafhoro. A tshi sedza nnḓa a vhona muṅwe munna a tshi khou gidima e eṱhe. ₂₅Mulindi a ḓivhadza khosi a tshi tou vhidzelela.

Khosi ya ri, “Arali e eṱhe a nga vha a tshi khou ḓisa mafhungo mavhuya.” Munna uyo a ḓi sendela.

₂₆Zwino mulindi a vhona muṅwe-vho a tshi khou gidima, a vhidzelela mulindakhoro a ri, “Vhonani, hu na muṅwe munna, u khou gidima e eṱhe!”

Khosi ya fhindula ya ri, “Na ene a nga vha a tshi khou ḓisa mafhungo mavhuya.”

₂₇Mulindi a ri, “Ndi vhona unga wa u thoma u gidima unga Ahimaatsi ṅwana wa Tsadoko.”

Khosi ya ri, “Ahimaatsi ndi muvhuya. U khou ḓisa mafhungo mavhuya.”

₂₈Ahimaatsi a vhidzelela khosi a ri, “Zwoṱhe zwo luga!” Ahimaatsi a wa nga tshifhaṱuwo phanḓa ha khosi a ri, “Nga hu rendwe Muṋe washu Mudzimu wavho! O ri kumedza vhanna vhe vha vha vutshela thovhela muṋe wanga.”

₂₉Khosi ya vhudzisa ya ri, “Uḽa muṱhannga Abisalomo ho ngo huvhala?”

Ahimaatsi a fhindula a ri, “Ndo vhona hu na vilinga ḽihulu hezwi gota ḽavho Juaba a tshi khou nndaedza, a thi ḓivhi uri ho itea mini.”

₃₀Khosi ya ri, “Imelani thungo ni lindele henefho.” Zwenezwo a bvela thungo a ima henefho.

₃₁Zwino ha swika na Mukushu a ri, “Thovhele muṋe wanga, nga vha pfe mafhungo mavhuya! Ṋamusi Muṋe washu o ita uri vha kunde vhoṱhe vhe vha vha vutshela.”

₃₂Khosi ya vhudzisa Mukushu ya ri, “Muṱhannga uḽa Abisalomo ho ngo huvhala naa?”

Mukushu a fhindula a ri, “Ngavhe zwo mu welaho zwi tshi wela maswina avho oṱhe na vhoṱhe vhe vha vha vutshela vha tshi ṱoda u huvhadza thovhele muṋe wanga.”

₃₃Khosi ya tetemela, ya gonya kamarani i re nṱha ha mafhoro ya lila, ya enda i tshi ri, “Yawee, ṅwananga Abisalomo! Ṅwananga, ṅwananga Abisalomo! Ngavhe ho fa nṋe hu si fe iwe! Yawee, ṅwananga, ṅwananga Abisalomo!”