2 SAMUELE 15

₁Ngavhuya Abisalomo a ḓiṱoḓela gariki na dzibere, a ḓinangela vhanna vha 50 uri vha gidime phanḓa hawe. ₂O vha a tshi fhinduwa a ima thungo ha nḓila yo livhaho khoroni ya muḓi. Musi muthu a tshi ḓisa mulandu une wa fanela u swikiswa musanda uri u sengiwe, Abisalomo o vha a tshi vhidza uyo muthu a ri, “Ni bva muḓini ufhio?” Muthu uyo o vha a tshi nga fhindula a ri, “Ndi bva kha tsinde ḽa uri ḽa Israele.” ₃Zwenezwo Abisalomo o vha a tshi mu vhudza a ri, “Vhonani, zwililo zwaṋu zwo tea, hone fhaḽa musanda a hu na ane a nga u pfa.” ₄Abisalomo o vha a tshi ḓi engedza a ri, “Ngavhe ndi muhaṱuli wa shango heḽi! Muṅwe na muṅwe a re na mbilaelo kana mulandu o vha a tshi ḓo ḓa ha nṋe a wana khaṱhulo mbuya.”

₅Na musi muthu a tshi swika kha Abisalomo a gwadama phanḓa hawe, Abisalomo o vha a tshi isa tshanḓa tshawe a mu fara a mu kuvhatedza. ₆O vha a tshi ita nga u ralo kha Vhaisraele vhoṱhe vhe vha ḓa ha khosi uri vha wane khaṱhulo mbuya, ngauralo a tswa mbilu dza vhanna vha Israele.

₇Musi ho no fhela miṅwaha miṋa, Abisalomo a humbela khosi a ri, “Nga vha litshe ndi ye Hebroni ndi yo khunyeledza zwe nda fulufhedzisa Muṋe washu. ₈Zwiḽa ndi tshi kha ḓi dzula Geshuru kha ḽa Aramu, ndo fulufhedzisa nda ri, ‘Arali Muṋe washu a mmbuedzedza Jerusalema, ndi ḓo luvha Muṋe washu.’ ”

₉Khosi ya vhudza Abisalomo ya ri, “Tshimbilani nga mulalo.” Abisalomo a takuwa a ya Hebroni. ₁₀Abisalomo o vha o ruma vhaḓinḓa nga tshiphiri matsindeni oṱhe a Israele a ri, “Musi ni tshi tou pfa phalaphala dzi tshi lila, ni ambe ni ri, ‘Abisalomo o vha khosi Hebroni.’ ” ₁₁Abisalomo o vha o fhelekedzwa nga vhanna vha 200 vha no bva Jerusalema. Vho vha vho vhidzwa sa vhaeni vha ya nae vha sa ḓivhi tshivhidzelwa. ₁₂Musi Abisalomo a tshi khou ṋekedza zwiṱhavhelo, a vhidzisa na Ahithofele wa Gilo, we a vha e muṅwe wa vhaeletshedzi vha Dafita, uri a ḓe a tshi bva muḓini wa hawe wa Gilo. Zwino-ha tshimbevha tsha tou pfumba, vhane vha ima na Abisalomo vha ḓi anda vha tshi ya.

₁₃Ha ḓa muḓinḓa a vhudza Dafita a ri, “Vhanna vha Israele vha vho ima na Abisalomo.”

₁₄Ndi hone Dafita a tshi vhudza magota awe oṱhe e a vha e nae Jerusalema a ri, “Iḓani! Nga ri shavhe, ra sa ralo a hu na na muthihi washu ane a nga ponyoka Abisalomo. Nga ri mbo ḓi ṱuwa, a sa ḓo ṱavhanya u tshimbila a ri fara, a ri tshinyadza a vhulaha vhoṱhe vha re fhano muḓini!”

₁₅Magota a khosi a fhindula a ri, “Ro ḓiimisela u ita zwoṱhe zwine thovhele muṋe washu vha zwi funa.”

₁₆Khosi ya takuwa, na muṱa wayo woṱhe wa tevhela, hone ya sia vhasadzi vhayo vha dziphuli vha fumi uri vha sale vha tshi londola pfamo. ₁₇Zwenezwo khosi ya takuwa, vhathu vhoṱhe vha i tevhela, vha ima nḓuni ya u fhedzisela ya muḓi. ₁₈Magota awe oṱhe na vhalindi vha musanda vha vha vha tshi khou fhira phanḓa hawe. Vhahali vha 600 vhe vha mu tevhela vha tshi bva Gathi na vhone vha fhira. ₁₉Khosi ya amba na Ithai wa Gathi ya ri, “Ni tshimbilelani na riṋe? Humani ni yo dzula na khosi Abisalomo. Hufha ni mutsinda, ni tshavhi i no bva shangoni ḽa haṋu. ₂₀A si kale no swika fhano, zwino nṋe ndi nga tenda ni tshi tendeleka na riṋe ndi sa ḓivhi hune nda ya hone? Humani ni ṱuwe na vha haṋu. Ngavhe Muṋe washu a tshi ni pfufhela vhuthu haṋu na u fulufhedzea haṋu.”

₂₁Huno Ithai a fhindula khosi a ri, “Nga Muṋe washu a tshilaho na nga thovhele muṋe wanga, hoṱhe hune thovhele muṋe wanga vha ḓo vha hone, kana hu a tshiliwa kana hu a fiwa, nṋe ndi ḓo vha henefho.”

₂₂Dafita a vhudza Ithai a ri, “Ndi zwone, nga ri ṱuwe.” Ndi hone Ithai wa Gathi a tshi tshimbila na vhanna vhawe vhoṱhe na miṱa yavho vhe vha vha vhe nae. ₂₃Vhathu vhoṱhe na vhoṱhe vha dzulaho muḓini vha lila musi vhathu vha Dafita vha tshi fhira. Khosi ya wela mulambwana wa Kidroni, na vhathu vhoṱhe vha tevhela vha livha phangani.

₂₄Tsadoko na ene o vha e henefho, na Vhalivi vhoṱhe vhe vha vha vhe nae vho vha vho hwala mbulungelo ya mulanga ya Mudzimu. Vha vhea mbulungelo ya Mudzimu fhasi, Abiathara a ṋekedza zwiṱhavhelo vhathu vhoṱhe vha vhuya vha bva muḓini.

₂₅Ndi hone khosi i tshi vhudza Tsadoko ya ri, “Humiselani mbulungelo ya Mudzimu muḓini. Arali Muṋe washu a tshi ntakalela, muṅwe musi u ḓo mmbuisa nda dovha nda i vhona na hune ya dzula hone. ₂₆Hone arali a ri, ‘Thi u takaleli,’ ndi a zwi ṱanganedza, nga a nnyite zwine a vhona zwi zwone.”

₂₇Khosi ya vhudza tshifhe Tsadoko ya ri, “Hufha ni tshi vhona uri hu khou iteani. Humelani muḓini nga mulalo na ṅwana waṋu Ahimaatsi na Abiathara na ṅwana wawe Jonathani. ₂₈Nṋe ndi ḓo ima maḓambuwoni ngei phangani u swika ni tshi ntsevha.” ₂₉Ndi hone Tsadoko na Abiathara vha tshi dzhia mbulungelo ya Mudzimu vha i humisela Jerusalema, vha dzula henengei.

₃₀Huno Dafita a gonya Thavha ya Miolivi, a enda a tshi lila; o vha o khurumela, milenzheni a songo ambara navhula. Vhathu vhoṱhe vhe a vha e navho na vhone vho vha vho khurumela, vha enda vha tshi lila vha tshi gonya. ₃₁Zwino Dafita o vha o vhudzwa ha pfi, “Ahithofele ndi muṅwe wa vho itaho vhukwila na Abisalomo.” Ndi hone Dafita a tshi rabela a ri, “Yawee Muṋe wanga, pfuvhisa vhueletshedzi ha Ahithofele.”

₃₂Musi Dafita a tshi swika muṱumbani wa thavha, he vhathu vha vha vha tshi anzela u luvha Mudzimu, a ṱanganedzwa nga Hushai wa Muarakhi; zwiambaro zwawe zwo vha zwo kherukana, ṱhohoni o shela buse. ₃₃Dafita a mu vhudza a ri, “Arali vha tshimbila na nṋe vha ḓo vha muhwalo kha nṋe. ₃₄Hone arali vha humela muḓini vha vhudza Abisalomo vha ri, ‘Thovhela, ndi ḓo vha mulanda wavho; kale ndo vha ndi mulanda wa khotsi avho, huno zwino ndi ḓo vha mulanda wavho,’ vha linge nga nungo dzoṱhe u ntikedza nga u hanedza nyeletshedzo ya Ahithofele. ₃₅Vhotshifhe Tsadoko na Abiathara vha ḓo vha vhe navho henefho. Vha vha vhudze zwoṱhe zwine vha zwi pfa pfamoni ya musanda. ₃₆Vhana vhavho vhavhili, Ahimaatsi ṅwana wa Tsadoko na Jonathani ṅwana wa Abiathara, vha navho henengei. Vha vha rume vha ḓe vha mmbudze zwine vha zwi pfa.”

₃₇Hushai khonani ya Dafita a swika Jerusalema musi Abisalomo a tshi khou dzhena muḓini.