2 SAMUELE 14

₁Juaba ṅwana wa Tseruya a zwi ḓivha uri khosi i khou ḽa mbilu nga Abisalomo. ₂Ndi hone Juaba a tshi ruma muthu a ye Thekua, a yo dzhia muṅwe musadzi wa vhuṱali a vhuya nae. Juaba a vhudza uyo musadzi a ri, “Kha vha ḓiite unga vha khou lilela mufu, vha ambare zwiambaro zwa vha lilelaho mufu, vha si ḓole zwiḓolo. Vha ite unga musadzi o fhedzaho maḓuvha manzhi o ṱungufhalela mufu. ₃Vha ṱuwe vha ye ha khosi vha yo amba maipfi haya.” Juaba a mbo funzedza uyo musadzi zwine a ḓo amba.

₄Musadzi a mbo ya ha khosi, a wa nga tshifhaṱuwo a tshi luvha khosi, a vhudza khosi a ri, “Yawee thovhele, a thi lamulelwi naa?”

₅Khosi ya mu vhudzisa ya ri, “Vha khou dinwa ngani?”

Musadzi a fhindula a ri, “Vhukumakuma nṋe ndi tshilikadzi, munna wanga o fa. ₆Zwino ndi na vhana vhavhili vha vhatuka. Vho tshenuwa vho lwa ḓakani ha vha hu si na ane a nga vha lamula. Muṅwe o rwa muṅwe a mu vhulaha. ₇Zwino mashaka anga oṱhe o mmvutshela, vha ri, ‘Ri kumedze uyo we a vhulaha murathu wawe uri ri mu vhulahe ri lifhedzele murathu wawe we a mu vhulaha, naho e ene muḽaifa.’ Vha ḓo thutha fulufhelo ḽanga ḽithihi fhedzi, dzina ḽa munna wanga ḽa sala ḽi si tsha vhidzwa, a si tshee na muḓuhulu fhano fhasi.”

₈Khosi ya vhudza uyo musadzi ya ri, “Nga vha ye hayani, ndi ḓo vha dzivhisa nga tsha vhukoma.”

₉Musadzi a fhindula khosi a ri, “Thovhela muṋe wanga, mulandu u ḓo hweswa nṋe na muṱa wa khotsi anga, thovhela na muvhuso wavho a vha na tshine vha nga solwa.”

₁₀Khosi ya fhindula ya ri, “Arali muṅwe muthu a vha vhudza tshiṅwe tshithu, nga vha mu ḓise kha nṋe, a nga si tsha dovha a vha dina.”

₁₁Musadzi a fhindula a ri, “Thovhele nga vha tou ana nga Muṋe washu Mudzimu wavho uri a vha nga tendi mulifhedzi wa malofha a tshi dovha a engedza ndozwo nga u vhulaha ṅwananga.”

Khosi ya ri, “Ndi ana nga Muṋe washu a tshilaho ndi ri na luvhudzi na luthihi lwa ṱhoho ya ṅwana wavho a lu nga weli fhasi.”

₁₂Ndi hone musadzi a tshi ri, “Thovhele muṋe wanga, nga vha litshe ndi vha vhudze ḽiṅwe ipfi ḽithihi.”

Khosi ya fhindula ya ri, “Ndi zwone, nga vha ambe.”

₁₃Musadzi a vhudza khosi a ri, “Ndi mini vhone vho khakhela vhathu vha Mudzimu nga zwo raloho? Musi thovhele vha tshi amba nga u ralo a si u ḓivhea mulandu naa? Hufha thovhele vha sa athu vhuisa ṅwana wavho o thathiwaho! ₁₄Hufha ri tshi fa roṱhe. Ri nga maḓi ane a ri u tevhutshela fhasi a si tsha kumbelea. Hone Mudzimu ha dzhii vhutshilo, tshawe ndi u wana nḓila ya uri muthu o thathiwaho a songo dzula o luṱana nae. ₁₅Zwino thovhela muṋe wanga nṋe ndi tshi ḓa u vha vhudza hezwi ndi nge vhathu vha ntshenusa. Ndo elekanya nda ri, ‘Ndi ḓo amba na khosi, khamusi i ḓo ita zwine nda i humbela. ₁₆Khamusi khosi i ḓo tenda u ntshidza zwanḓani zwa munna uyo ane a khou linga u vhulaha nṋe na ṅwananga ra si tsha vha shangoni ḽe Mudzimu a ri ṋea.’ ₁₇Zwino ndi ri, ‘Ngavhe ipfi ḽa thovhele muṋe wanga ḽi tshi nthudza mbilu, ngauri thovhele muṋe wanga vha nga muruṅwa wa Mudzimu kha u ṱalukanya zwivhi na zwivhuya. Ngavhe Muṋe washu Mudzimu wavho a tshi vha navho.’ ”

₁₈Ndi hone khosi i tshi vhudza uyo musadzi ya ri, “Vha songo litsha u fhindula zwine nda ḓo vha vhudzisa.”

Musadzi a ri, “Thovhele muṋe wanga, nga vha ambe.”

₁₉Khosi ya vhudzisa ya ri, “Juaba ho ngo longa tshanḓa kha mafhungo aya naa?”

Musadzi a fhindula a ri, “Nga vhutshilo ha thovhele muṋe wanga, a hu na ane a nga vha fhura vha sa zwi vhoni. Ndi zwone, ndi mulanda wavho Juaba we a nndaya uri ndi ite nga u ralo, a mpfunzedza zwoṱhe zwine nda fanela u amba. ₂₀Juaba o ita hezwi uri a shande mafhungo. Hone muṋe wanga vha na vhuṱali vhu no nga ha muruṅwa wa Mudzimu, vha ḓivha zwoṱhe zwine zwa itea shangoni.”

₂₁Ndi hone khosi i tshi vhudza Juaba ya ri, “Ndi zwone, ndi ḓo ita nga u ralo. Tshimbilani ni yo dzhia muṱhannga houḽa Abisalomo ni vhuye nae.”

₂₂Juaba a wa nga tshifhaṱuwo a tshi luvha khosi, a ri ngavhe khosi zwi tshi i nakela, a ri, “Thovhele muṋe wanga, ṋamusi ndi a ḓivha uri vha a ntakalela, ngauri vho tenda zwe nda vha humbela.”

₂₃Ndi hone Juaba a tshi takuwa a ya Geshuru, a vhuya na Abisalomo a mu ḓisa Jerusalema. ₂₄Huno khosi ya ri, “Abisalomo nga a ye nḓuni yawe, hone a songo vhona tshifhaṱuwo tshanga.” Abisalomo a ya nḓuni yawe, a si vhone tshifhaṱuwo tsha khosi.

₂₅Kha ḽoṱhe ḽa Israele ho vha hu si na munna na muthihi we a vha a tshi khoḓelwa lunako lwawe unga Abisalomo. U bva ṱhohoni yawe u swika milenzheni yawe o vha a si na thando. ₂₆Mavhudzi awe o vha e madenya vhukuma, nahone o vha a tshi a vheula kathihi nga ṅwaha, musi o no lapfesa, a tshi lemela. O vha a tshi kona u lemela u fhira khilogiramu mmbili hu tshi tevhedzwa zwikalo zwa musanda. ₂₇Abisalomo o vha e na vhana vhararu vha vhatuka na ṅwananyana muthihi we a vha a tshi pfi Thamara. Onoyo o vha musadzi wa lunako.

₂₈Abisalomo o dzula miṅwaha mivhili Jerusalema a sa athu vhona tshifhaṱuwo tsha khosi. ₂₉Ndi hone a tshi vhidzisa Juaba uri a mu rume ha khosi, hone Juaba a hana u ḓa khae. A dovha a mu vhidzisa, ene a ḓi dovha a hana u ḓa. ₃₀Ndi hone a tshi vhudza vhashumi vhawe a ri, “Vhonani, tsimu ya Juaba i tsini na yanga, henefho tsimuni o lima baḽi. Iyani ni yo fhisa iyo tsimu.” Vhashumi vha Abisalomo vha mbo ya vha fhisa iyo tsimu.

₃₁Ndi hone Juaba a tshi ya nḓuni ya Abisalomo, a mu vhudza a ri, “Ndi mini vhashumi vhaṋu vho fhisa tsimu yanga?”

₃₂Abisalomo a fhindula Juaba a ri, “Nga vha vhone, ndo vha vhidzisa nda ri, ‘Nga vha ḓe ndi vha rume ha khosi vha yo vhudzisa vha ri: Ndo vhuelani ndi tshi bva Geshuru? Khwiṋe ndi musi ndi tshi kha ḓi vha henengei zwanga!’ Zwino-ha, ndi ṱoḓa u vhona tshifhaṱuwo tsha khosi, arali ndi na mulandu, khosi nga i mmbulahe zwanga.”

₃₃Ndi hone Juaba a tshi ya ha khosi a i vhudza zwenezwo, khosi ya vhidzisa Abisalomo, Abisalomo a swika a dzhena, a wa nga tshifhaṱuwo phanḓa ha khosi. Khosi ya mu kuvhatedza.