2 SAMUELE 16

₁Musi Dafita o no fhiranyana muṱumba wa thavha, a ṱangana na Tsiba mushumeli wa Miribaali. Onoyo o vha e na donngi mbili dzi na dzisala, dzo hwala mikonde ya 200 ya vhurotho, na khekhe dza 100 dza mpale wa nḓirivhe na khekhe dza 100 dza mahuyu na gumbu ḽa mukumba ḽo ḓala waini.

₂Khosi ya vhudzisa Tsiba ya ri, “Izwi zwithu no zwi ḓiselani?”

Tsiba a fhindula a ri, “Donngi dzi ḓo namelwa nga vha muṱa wa musanda, vhurotho na mitshelo ndi zwiḽiwa zwa vhanna, waini ndi ya u netulusa vhane vha neta phangani.”

₃Ndi hone khosi i tshi vhudzisa ya ri, “Miribaali muḓuhulu wa muṋe waṋu Saulo u ngafhi?”

Tsiba a mu fhindula a ri, “O sala Jerusalema, u khou vhona unga zwino Vhaisraele vha ḓo dovha vha mu fha muvhuso wa makhulu wawe Saulo.”

₄Ndi hone khosi i tshi vhudza Tsiba ya ri, “Zwoṱhe zwe zwa vha zwi zwa Miribaali zwino ndi zwaṋu.”

Tsiba a fhindula a ri, “Ndi gwadama nga u ḓiṱukufhadza. Thovhele muṋe wanga, ngavhe ndi tshi ḓi vha takadza!”

₅Musi khosi Dafita a tshi swika Bahurimu, muṅwe wa mashaka a Saulo ane a pfi Shimei, ṅwana wa Gera, a bvela nnḓa u ḓa u mu ṱanganedza, a sendela a tshi khou mu teketela. ₆Shimei a thoma u posa Dafita na magota awe nga matombo, naho Dafita o vha o tangwa nga mmbi yoṱhe na vhalindi vhawe. ₇Shimei a tshi teketela Dafita o ri, “Ṱuwa! Ṱuwa! Phondi yenei, tshigevhenga ndiwe! ₈Muṋe washu o u lifhedza zwe wa shulula malofha a muṱa wa Saulo we wa mu dzhiela muvhuso. Muṋe washu o dzhia muvhuso a u ṋea ṅwana wau Abisalomo. U khomboni nga vhupondi hau!”

₉Abishai ṅwana wa Tseruya a amba na khosi a ri, “Thovhele muṋe wanga, vha nga tenda mmbwa iyi yo faho i tshi vha teketela naa? Nga vha litshe ndi mu ele ndi mu tumule ṱhoho.”

₁₀Hone khosi ya ri, “Inwi vhana vha Tseruya, aya a si mafhungo anga kana aṋu! Arali a tshi khou nteketela nge Muṋe washu a ri, ‘Teketela Dafita,’ ndi nnyi ane a nga vhudzisa a ri, ‘Ndi mini u tshi ita izwi?’ ” ₁₁Ndi hone Dafita a tshi amba na Abishai na magota awe oṱhe a ri, “Ṅwananga we nda mu beba u khou linga u mmbulaha. Zwino uyu wa Benyamini ni mu londelani? Mu litsheni, litshani a teketele, o rumiwa nga Muṋe washu. ₁₂Khamusi Muṋe washu u ḓo vhona u ṱungufhala hanga a nnyitela zwivhuya nge nda teketelwa ṋamusi.”

₁₃Ndi hone Dafita na vhanna vhawe vha tshi fhirela phanḓa vha tshi tshimbila nga nḓila, Shimei a tshi tshimbila nṱha bamani o ḓi vhambela nae, a tshi enda a tshi mu teketela, a tshi mu posa nga matombo, a tshi mu hasha nga tshika. ₁₄Khosi na vhathu vhoṱhe vhe a vha e navho vha vhuya vha swika he vha vha vha tshi ya hone vhó neta, vha awela henefho.

₁₅Abisalomo na Vhaisraele vhoṱhe vhe a vha e navho vha dzhena Jerusalema. Na Ahithofele o vha e nae. ₁₆Ndi hone Hushai wa Muarakhi khonani ya Dafita a tshi ya ha Abisalomo a mu vhudza a ri, “Thovhele nga vha lalame! Thovhele nga vha lalame!”

₁₇Abisalomo a vhudzisa Hushai a ri, “Ndi hone u fulufhedzea kha khonani yavho izwi! Ndi mini vha songo ṱuwa nayo?”

₁₈Hushai a fhindula a ri, “Aiwa, nṋe ndi ima na we a nangiwa nga Muṋe washu na nga vhathu havha, na nga Vhaisraele vhoṱhe. Ndi ḓo vha wa onoyo, nda ima na onoyo; ₁₉hone ndi nga shumela nnyi arali e si ṅwana wa muṋe wanga? Unga ndo shumela khotsi avho, zwino ndi ḓo shumela vhone.”

₂₀Musi vhahulwane vho no kuvhangana, Abisalomo a vhudzisa Ahithofele a ri, “Nga vha ri eletshedze. Ri ite mini?”

₂₁Ahithofele a fhindula a ri, “Nga vha dzhie vhommane vhavho vhe khotsi avho vha vha sia uri vha londole pfamo, vha vha dzhenise nḓuni. Ndi hone Vhaisraele vha tshi ḓo zwi ḓivha uri vho luṱana tshoṱhe na khotsi avho, zwa konou khwaṱhisa vhoṱhe vhane vha ima navho.” ₂₂Ndi hone vha tshi akhela Abisalomo dennde nṱha ha ṱhanga ya pfamo, Abisalomo a dzhenisa vhommane vhawe nḓuni Vhaisraele vhoṱhe vha tshi zwi vhona.

₂₃Misi iyo nyeletshedzo ye ya vha i tshi ṋewa nga Ahithofele yo vha i tshi ṱanganedzwa ḽa nga ipfi ḽi bvaho ha Mudzimu. Hu Dafita, he Abisalomo, vho vha vha tshi sedza nyeletshedzo dzoṱhe dza Ahithofele nga u ralo.