2 MAHOSI 25

₁Zwino Tsedekia a shandukela Nebukhadnetsara khosi ya Babele. Zwenezwo nga ḓuvha ḽa fumi ḽa ṅwedzi wa fumi wa ṅwaha wa vhuṱanu na vhuṋa wa muvhuso wa Tsedekia, Nebukhadnetsara khosi ya Babele a ḓa na mmbi yawe yoṱhe a tshi ḓa u dia Jerusalema. Vha ṱoka mishasha nnḓa ha muḓi, vha u govhela nga thulwi dza mavu e vha khokha. ₂Muḓi wa dzula wo govhelwa u swika ṅwaha wa 11 wa muvhuso wa khosi Tsedekia. ₃Nga ḓuvha ḽa vhuṱanu na vhuṋa ḽa ṅwedzi wa vhuṋa ḽa ṅwaha wonoyo nḓala ya vha yo no hulela afho muḓini lwe ha vha hu si tshee na zwiḽiwa zwine vhathu vha nga ḽa. ₄Zwino mutsheṱo wa muḓi wa pwashea wa phorotshedzwa, mmbi yoṱhe ya shavha vhusiku ya bva nga khoro ine ya vha vhukati ha mitsheṱo mivhili tsini ha ngade ya musanda, naho Vhababele vho vha vho govhela muḓi. Vha shavha vho livha govhani ḽa Jorodani. ₅Hone mmbi ya Vhababele ya pandamedza khosi Tsedekia ya mu fara mudavhini wa Jerikho, vhahali vhawe vhoṱhe vha mu ṱutshela vha balangana. ₆Tsedekia a fariwa, a iswa ha khosi ya Babele ye ya vha i muḓini wa Ribila, ya mu haṱula henefho. ₇Vha shidzha vhana vha vhatuka vha Tsedekia a tshi zwi vhona. Zwo no ralo vha mu nongola maṱo, vha mu vhofha nga tsimbi dza musinaseṱha, vha mu isa Babele.

₈Nga ḓuvha ḽa vhuṱanu na vhuvhili ḽa ṅwedzi wa vhuṱanu wa ṅwaha wa 19 wa muvhuso wa Nebukhadnetsara khosi ya Babele, Nebusaradani mulangammbi wa musanda, mukoma wa khosi a dzhena Jerusalema, ₉a fhisa thembele ya Muṋe washu na pfamo ya musanda na nnḓu dzoṱhe dza vhathu vha Jerusalema, na dza vhaḓivhalea. ₁₀Mmbi yoṱhe ya Vhababele ye ya vha i tshi langwa nga mulangammbi wa musanda, ya thutha mitsheṱo u mona na muḓi wa Jerusalema. ₁₁Ndi hone Nebusaradani mulangammbi wa musanda a tshi hwala vhathu vhe vha vha vho sala afho muḓini a vha isa vhuthubwani Babele khathihi na vhaṅwe vhathu vhoṱhe na vhe vha vha vho pfukela ha khosi ya Babele. ₁₂Hone a sia vhaṅwe vhe vha vha vha tshi tou shaya vhukuma henefho shangoni ḽa Juda uri vha lime masimu a minḓirivhe na maṅwe masimu.

₁₃Vhababele vha pwasha phuphu dza musinaseṱha na zwigoloi na thannge ya musinaseṱha zwe zwa vha zwi thembeleni ya Muṋe washu, vha hwala uyo musinaseṱha vha u isa Babele. ₁₄Vha hwala na dzikhali na dzifosholo na zwiṱunyathambo na masambelo a u fara malofha a zwiṱhavhelo na zwithu zwoṱhe zwa musinaseṱha zwine zwa shuma thembeleni. ₁₅Mulangammbi wa musanda a dzhia na zwidubisazwioro na ndilo dza u handulula, zwoṱhe zwe zwa vha zwo itwa nga musuku kana siliva. ₁₆Musinaseṱha u no bva kha phuphu mbili na thannge na zwigoloi, zwe khosi Solomoni a zwi itela thembele ya Muṋe washu, wo vha u tshi lemelesa u sa koni u kalea. ₁₇Phuphu iṅwe na iṅwe yo vha i na vhulapfu ha mitha ṱhanu na tharu. Ṱhoho ya musinaseṱha i re nṱha ha phuphu yo vha i na vhulapfu ha mitha dza 1,5, yo nakiswa nga geḓane dza musinaseṱha na maramba a musinaseṱha u mona nayo. Phuphu iṅwe na geḓane dzayo, yo vha i tshi ḓi nga iyo iṅwe.

₁₈Nebusaradani, mulangammbi wa musanda, a hwala tshifhe muhulu Seraya na Tsefania tshanḓa tshawe na vhalindamuṋango vhararu a vha isa vhuthubwani. ₁₉Kha vhe vha vha vha tshi kha ḓi vha henefho muḓini a dzhia mulangammbi na vhaeletshedzi vhaṱanu vha musanda na tshanḓa tsha mulangammbi, we a vha a tshi langa zwa maṅwalwa a mmbi, na vhanna vha 60 vha vhaḓivhalea vhe a vha e navho afho muḓini, ₂₀a vha dzhia vhoṱhe a vha isa ha khosi ya Babele muḓini wa Ribila. ₂₁Henefho muḓini wa Ribila, shangoni ḽa Hamathi, khosi ya ita uri vha vhulawe.

Vhathu vha Juda vha iswa vhuthubwani, kule na shango ḽavho.

₂₂Nebukhadnetsara khosi ya Babele a dzhia Gedalia ṅwana wa Ahikamu ṅwana wa Shafani, a mu vhea uri a lange vhathu vhe a vha sia shangoni ḽa Juda. ₂₃Musi vhalangammbi vhoṱhe na vhanna vhavho vha tshi pfa uri khosi ya Babele yo vhea Gedalia uri a vhe muvhusi, vha ḓa ha Gedalia e Mitsipha. Vhalangammbi vhenevho vho vha vhe Ishmaele ṅwana wa Nethania na Johanani ṅwana wa Karia na Seraya ṅwana wa Thanumethe wa muḓi wa Netofa na Jesania wa Maakha. ₂₄Gedalia a ana a vha vhudza na vhanna vhe vha vha vhe navho a ri, “Ni songo ofha magota a Vhababele, dzulani shangoni ni shumele khosi ya Babele, ndi hone zwi tshi ḓo ni nakela.”

₂₅Nga ṅwedzi wa vhuṱanu na vhuvhili wa ṅwaha wonoyo, Ishmaele ṅwana wa Nethania ṅwana wa Elishama, we a vha e wa malofha a musanda, a ḓa na vhanna vha fumi, a vhulaha Gedalia na vhanna vha Juda na Vhababele vhe vha vha vhe nae henefho Mitsipha. ₂₆Vhathu vhoṱhe, vhanyadzea na vhaḓivhalea, khathihi na vhalangammbi, vha ri u vhona zwenezwo vha shavhela Egipita nga u ofha Vhababele.

₂₇Nga ṅwaha we Evili Merodakha a vha khosi ya Babele, a itela Jehoyakhini khosi ya Juda vhuthu, a mu vhofholola dzhele. Hezwo zwo itea nga ḓuvha ḽa 27 ḽa ṅwedzi wa 12 wa ṅwaha wa 37 u bva tshee Jehoyakhini a hwalwa a yo hoṋelwa dzhele. ₂₈Evili Merodakha a fara Jehoyakhini zwavhuḓi, a mu hulisa u fhira maṅwe mahosi e a iswa vhuthubwani nae henefho Babele. ₂₉Jehoyakhini a tendelwa u bvula zwiambaro zwa dzhele, a ḽela ḓafulani ḽa musanda vhutshilo hawe hoṱhe. ₃₀Khosi yo vha i tshi ḓi ṋea Jehoyakhini tshelede ya zwine a zwi ṱoḓa ḓuvha ḽiṅwe na ḽiṅwe.