2 MAHOSI 24

₁Musi Jehoyakimu e khosi, Nebukhadnetsara khosi ya Babele a dia shango ḽa Juda, Jehoyakimu a fhedza miṅwaha miraru e gota ḽawe, a konou mu shandukela. ₂Muṋe washu a ruma mmbi dza Vhababele na Vhaaramu na Vhamuaba na Vhaamoni uri vha ḓe vha mu ṱangule, vha phusukanye shango ḽa Juda, nga he Muṋe washu a ḓivhadza nga milomo ya vhaḓinḓa vhawe vhaporofita. ₃Vhukuma zwithu izwo zwo itea shangoni ḽa Juda zwi tshi tevhedza ndaela ya Muṋe washu, uri a vha sudzuluse a si tsha vha vhona, nga vhuvhi he Manase a ita, ₄na nge a shulula malofha a vhathu vha si na mulandu. O ḓadza Jerusalema nga malofha a vhathu vha si na mulandu, zwenezwo Muṋe washu a si tsha funa u mu hangwela.

₅Mafhungo maṅwe a Jehoyakimu na zwoṱhe zwe a ita, o ṅwalwa buguni ya Histori ya Mahosi a Juda. ₆Jehoyakimu a dzama, ṅwana wawe Jehoyakhini a vha khosi vhudzuloni hawe.

₇U bva zwenezwo khosi ya Egipita ya si tsha dovha ya bva pfumo nge khosi ya Babele ya vha i tshi vho langa shango ḽoṱhe ḽe ḽa vha ḽi ḽa Egipita u bva mulamboni wa Yufuratha u swika masakhani a devhula a Egipita.

₈Jehoyakhini a tshi vha khosi ya Juda o vha e na miṅwaha ya 18, a vhusa e Jerusalema a fhedza miṅwedzi miraru. Mme awe o vha a tshi pfi Nehushtha, ṅwananyana wa Elinathani wa Jerusalema. ₉Jehoyakhini a kanda vhuṱalani ha khotsi awe, a ita zwi sa takadzi Muṋe washu.

₁₀Misi yeneyo magota a Nebukhadnetsara khosi ya Babele vha ḓa muḓini wa Jerusalema, vha u govhela, ₁₁Nebukhadnetsara a ḓa muḓini wa Jerusalema nga tsha vhukoma musi magota awe a tshi khou govhela muḓi uyo. ₁₂Jehoyakhini khosi ya Juda na mme awe na vhalanda vhawe na vhaḓivhalea vhawe na vhakoma vhawe vha mbo bva muḓini, vhoṱhe vha ḓiṋekedza khae.

Nga ṅwaha wa vhuṱanu na vhuraru wa muvhuso wa Nebukhadnetsara khosi ya Babele, Nebukhadnetsara a fara Jehoyakhini a mu ita ḽithubwa. ₁₃A dzhia lupfumo lwoṱhe lu re thembeleni ya Muṋe washu na pfamoni ya musanda, a hwala zwithu zwoṱhe zwa musuku zwe Solomoni khosi ya Juda a zwi itela thembele ya Muṋe washu, nga he Muṋe washu a dzula o ḓivhadza. ₁₄Nebukhadnetsara a hwala vhathu vha Jerusalema a vha isa vhuthubwani, vhakoma vhoṱhe, vhahali na vhatsila vhoṱhe na vhafhaṱi, vho ṱangana vhoṱhe vha ita 10 000. Ho vha ho tou siwa vhashai vhukuma vha shango.

₁₅Nebukhadnetsara a dzhia Jehoyakhini afho Jerusalema a mu isa vhuthubwani Babele, a dzhia na mme a khosi na vhafumakadzi vha khosi na magota awe na vharangaphanḓa vha shango. ₁₆A hwala na vhoṱhe vha re na zwavho, vha 7 000, na vhatsila na vhafuli vha tsimbi vha 1 000, na vhoṱhe vho teaho u bva pfumo, a vha isa Babele.

₁₇Nebukhadnetsara a dzhia Mathania khotsimunene wa Jehoyakhini, a mu vhumba khosi vhudzuloni hawe, a shandukisa dzina ḽawe ḽa vho pfi Tsedekia.

₁₈Tsedekia a tshi vha khosi ya Juda o vha e na miṅwaha ya 21, a vhusa e Jerusalema a fhedza miṅwaha ya 11. Mme awe o vha a tshi pfi Hamuthali, ṅwananyana wa Jeremia wa muḓi wa Libina. ₁₉Khosi Tsedekia a ita zwi sa takadzi Muṋe washu, u ḓi nga khosi Jehoyakimu. ₂₀Ndi zwe Muṋe washu a sinyutshela Jerusalema na Juda, a fhedza nga u vha sudzulusa a si tsha vha vhona.