2 MAHOSI 23

₁Khosi Josiasi a vhidza vhahulwane vhoṱhe vha Juda na Jerusalema. ₂A ya thembeleni ya Muṋe washu e na vhanna vha Juda na vhathu vha Jerusalema na vhotshifhe na vhaporofita, vhathu vhoṱhe, vha nyadzeaho na vhaḓivhalea. Josiasi a dzhia iḽa bugu ye ya vha yo tumbulwa thembeleni ya Muṋe washu, a vhalela vhathu maipfi oṱhe a Bugu ya Mulanga. ₃Khosi ya ima tsini na phuphu a vhofha mulanga na Muṋe washu, a ri u ḓo tevhela Muṋe washu, a vhulunga ndayo na milayo yawe na ndaela dzawe nga mbilu yawe yoṱhe na nga zwoṱhe zwine a vha zwone, u ralo ha vha u khwaṱhisa maipfi a mulanga o ṅwalwaho buguni iyo. Ndi hone vhathu vhoṱhe vha tshi fulufhedzisa uri vha ḓo vhulunga mulanga.

₄Khosi ya laya tshifhe muhulu Hilikia na vhotshifhe vha mu tevhelaho nga vhuimo, na vhalindamuṋango, uri hafho thembeleni ya Muṋe washu vha bvise zwithu zwoṱhe zwa Baali na Ashera mudzimu wa musadzi, na zwa masambi oṱhe a ṋaledzi. Khosi ya dzhia zwithu izwo ya zwi fhisa nnḓa ha muḓi wa Jerusalema mudavhini tsini ha govha ḽa Kidroni, ya hwala milora yazwo ya isa Bethele. ₅Khosi ya bvisa vhotshifhe vha vhahedeni mushumoni we vha vha vho vhewa khawo nga mahosi a Juda, wa u dubisa zwioro vha tshi dubisela zwitembeleni zwa zwikwarani zwa miḓi ya Juda na yo tangaho Jerusalema, vhane vha dubisa zwioro vha tshi dubisela Baali na ḓuvha na ṅwedzi na masambi oṱhe a ṋaledzi na zwine dza fanyisa zwone. ₆Khosi ya bvisa thanda ya Ashera thembeleni ya Muṋe washu a i isa Govhani ḽa Kidroni nnḓa ha muḓi wa Jerusalema, a i fhisela henefho. A i kuya ya vha luvhanda, a hasha buse ḽayo nṱha ha zwalo zwa vhathu zwavho. ₇Khosi ya ita na u thutha nnḓu ya phombwe dza thembele afho thembeleni ya Muṋe washu. Ndi hone he vhasadzi vha vha vha tshi luka zwiambaro zwe zwa vha zwi tshi ambarwa hu tshi luvhiwa Ashera.

₈Josiasi a kuvhanganya vhotshifhe vhoṱhe Jerusalema vha tshi bva miḓini ya Juda, vha kumadza zwitembele zwa zwikwarani, u bva Geba u swika Bierisheba, he vhotshifhe vha vha vha tshi fhisa zwioro. A thutha zwitembele zwa midzimu dzikhoroni, muṋangoni wa khoro ya Joshua muvhusi wa muḓi, ye ya vha i thungo ya tshamonde khoroni ya muḓi. ₉Naho vhotshifhe vha zwitembele zwa zwikwarani vho vha vha sa shumi aḽiṱarini ya Muṋe washu Jerusalema, vhurotho vhu si na mbilisa vho vha vha tshi vhu ḽa-vho na vhaṅwe vhotshifhe vha mutupo wavho.

₁₀Khosi Josiasi a ita na u kumadza tshivhaso hune vhathu vha luvha midzimu hone Govhani ḽa Hinomu, uri hu si tsha vha na muthu ane a ṋekedza Molekhe ṅwana wawe a mu ita nduvho i fhiswaho. ₁₁Muṋangoni wa thembele ya Muṋe washu a thutha bere dze mahosi a Juda a vha o dzi sumela ḓuvha. Dzo vha dzi muṱani tsini ha kamara ya gota ḽe ḽa vha ḽi tshi pfi Nathani Melekhe. Josiasi a fhisa gariki dzo sumelwaho ḓuvha. ₁₂A thutha aḽiṱari dze dza vha dzo fhaṱwa nga mahosi a Juda nṱha ha ṱhanga tsini ha kamara ya Ahasi ya nṱha, a thutha na aḽiṱari dze dza vha dzo fhaṱwa nga Manase miṱani mivhili ya thembele ya Muṋe washu. A dzi thutha henefho, a dzi pwashekanya dza thuthekana a dzhia mathukhwi adzo a hasha Govhani ḽa Kidroni. ₁₃Khosi ya tshinya na thembele dza midzimu dzo fhaṱwaho nga Solomoni khosi ya Israele vhubvaḓuvha ha Jerusalema, tshipembe ha Thavha ya Phusuphusu; dzo fhaṱelwa zwitungulo zwi nengisaho zwa Ashtharotho mudzimu wa musadzi wa Vhasidoni na Khemosho mudzimu u nengisaho wa Muaba na Molekhe mudzimu wa tshika wa Vhaamoni. ₁₄Josiasi a pwasha phuphu dza matombo, a remekanya thanda dza Ashera, fhethu afho a hu tibedza nga marambo a vhathu.

₁₅Josiasi a thutha na aḽiṱari ya Bethele, na kutembele kwa tshikwarani kwo fhaṱwaho nga Jerobiamu ṅwana wa Nebati we a ita uri Vhaisraele vha tshinye. Josiasi a fhisa aḽiṱari iyo khathihi na kutembele kwa tshikwarani a ku kuya kwa vha luvhanda, a ita na u fhisa thanda ya Ashera. ₁₆A rembuluwa a sedza, a vhona zwalo zwe zwa vha zwi zwikwarani, a ita uri marambo a bvisiwe khazwo, a fhisiwe kha aḽiṱari uri i kumale, a tshi khunyeledza zwe Muṋe washu a amba, zwa ḓivhadzwa nga uḽa muḓinḓa wa Mudzimu we a dzula o amba zwithu izwo.

₁₇Khosi ya vhudzisa ya ri, “Tshalo tshiḽa tshine nda tshi vhona ndi tsha nnyi?”

Vhathu vha muḓi wa Bethele vha fhindula vha ri, “Ndi tshalo tsha muḓinḓa wa Mudzimu we a bva Juda, onoyo o teketela aḽiṱari ya Bethele a bula zwithu zwine vhone vha kha ḓi bva u zwi ita.”

₁₈A ri, “Itsho tshi litsheni. Ni songo tenda na muthihi a tshi kwama marambo awe.” Ndi hone vha tshi litsha marambo awe na a uḽa muporofita we a vha a tshi bva Samaria.

₁₉A thutha a kumadza zwitembele zwoṱhe zwa zwikwarani zwo fhaṱwaho nga mahosi a Israele miḓini ya Samaria sa zwe a ita Bethele, ngauri zwo vha zwi tshi sinyusa Muṋe washu. ₂₀A shidzha vhotshifhe vha zwitembele zwa zwikwarani vhe vha vha vhe henefho, a vha vhulahela kha aḽiṱari dzavho, a fhisa marambo a vhathu kha aḽiṱari dzoṱhe. Zwo no ralo a vhuelela Jerusalema.

₂₁Khosi Josiasi a laya vhathu vhoṱhe a ri, “Itani vhuṱambo ha Paseka ni tshi hulisa Muṋe washu Mudzimu waṋu, nga he ha ṅwalwa ngaho Buguni hei ya Mulanga.” ₂₂Ho vha hu sa athu vhuya ha ḽiwa vhuṱambo ha Paseka nga nḓila yeneyo, u bva misi ya vharangaphanḓa vhe vha endedza Vhaisraele, na misi yoṱhe ya mahosi a Israele na a Juda. ₂₃Huno nga ṅwaha wa 18 wa muvhuso wa khosi Josiasi, vhuṱambo uho ha Paseka ha itelwa Muṋe washu muḓini wa Jerusalema.

₂₄Josiasi a dovha a fhelisa zwa vhaambeli na malombo na zwitungulo zwa muṱani na midzimu ya tshika na zwiṅwe zwoṱhe zwi nengisaho zwine zwa vhonala Juda na Jerusalema. Hezwo o zwi itela u khunyeledza mulayo wo ṅwalwaho buguni ye tshifhe Hilikia a i tumbula thembeleni ya Muṋe washu. ₂₅Ho vha hu sa athu vha na khosi i no nga Josiasi kha vho mu rangaho phanḓa, na vho ḓaho ngavhuya, we a rembulutshela ha Muṋe washu nga mbilu yoṱhe na nga nungo dzoṱhe na nga zwoṱhe zwine a vha zwone, a tshi tevhedza Mulayo wa Mushe woṱhe.

₂₆Naho zwo ralo, Muṋe washu ho ngo humisa mbiti dzawe dzi ofhisaho, dze dza tou dugela vhathu vha Juda nga zwoṱhe zwo itwaho nga Manase a tshi mu ṱunga. ₂₇Muṋe washu a ri, “Vhathu vha Juda na vhone ndi ḓo vha sudzulusa nda si tsha vha vhona, sa zwe nda sudzulusa Vhaisraele, ndi ḓo landula Jerusalema, muḓi we nda u nanga, na thembele hei ye nda amba ngayo nda ri, ‘Dzina ḽanga ḽi ḓo vha henefho.’ ”

₂₈Mafhungo maṅwe a Josiasi na zwoṱhe zwe a ita, o ṅwalwa buguni ya Histori ya Mahosi a Juda.

₂₉Musi Josiasi e khosi, Farao Nikho khosi ya Egipita a gonya a yo tikedza khosi ya Ashuru a bva nga nḓila ya mulambo wa Yufuratha. Khosi Josiasi a bva uri a yo ṱangana nae vha lwe, hone Nikho a imedzana nae, a mu vhulaha muḓini wa Megido. ₃₀Vhalanda vha Josiasi vha hwala tshitumbu tshawe nga gariki tshi tshi bva Megido vha tshi isa Jerusalema, vha tshi swiṱa tshaloni tshawe. Vhaḓivhalea vha shango vha dzhia Juahasi ṅwana wa Josiasi, vha mu ḓodza mapfura, vha mu vhumba khosi vhudzuloni ha khotsi awe.

₃₁Juahasi a tshi vha khosi ya Juda o vha e na miṅwaha ya 23, a vhusa e Jerusalema a fhedza miṅwedzi miraru. Mme awe o vha e ṅwananyana wa Jeremia, a no pfi Hamuthali, wa muḓi wa Libina. ₃₂Juahasi a ita zwi sa takadzi Muṋe washu, u ḓi nga vhomakhulukuku wawe. ₃₃Farao Nikho wa Egipita a mu vhofha nga dzigeḓane a mu vhea muḓini wa Ribila shangoni ḽa Hamathi uri a si kone u vhusa Jerusalema, a thelisa vhathu vha Juda khilogiramu dza 3 400 dza siliva na khilogiramu dza 34 dza musuku. ₃₄Farao Nikho a dzhia Eliakimu ṅwana wa Josiasi a mu ita khosi vhudzuloni ha khotsi awe Josiasi, a shandukisa dzina ḽa Eliakimu ḽa vho pfi Jehoyakimu. Nikho a hwala Juahasi a mu isa Egipita, a fela hone.

₃₅Jehoyakimu a ṋea Farao Nikho siliva na musuku nga he a zwi ṱoḓa ngaho. Izwo o zwi kona nga u thelisa shango, vhathu vha shango vha bvisa siliva na musuku zwi tshi ya nga zwine vha vha nazwo.

₃₆Jehoyakimu a tshi vha khosi ya Juda o vha e na miṅwaha ya 25, a vhusa e Jerusalema a fhedza miṅwaha ya 11. Mme awe o vha a tshi pfi Zibida ṅwananyana wa Phedaya, a tshi bva muḓini wa Ruma. ₃₇Jehoyakimu a ita zwi sa takadzi Muṋe washu, u ḓi nga vhomakhulukuku wawe.