2 MAHOSI 18

₁Hiskia ṅwana wa Ahasi o vha khosi ya Juda nga ṅwaha wa vhuraru wa muvhuso wa Hoshia ṅwana wa Ela, khosi ya Israele. ₂Hiskia a tshi vha khosi o vha e na miṅwaha ya 25, a vhusa e Jerusalema a fhedza miṅwaha ya 29. Mme awe o vha a tshi pfi Abia ṅwananyana wa Zakaria. ₃O ita zwe zwa vha zwi tshi takadza Muṋe washu, u ḓi nga makhulukuku wawe Dafita. ₄O thutha zwitembele zwa zwikwarani, a pwashekanya matombo a zwitungulo, a remekanya thanda dza Ashera mudzimu wa musadzi. A ita na u vunḓekanya ṋowa ya musinaseṱha ye ya fuliwa nga Mushe, ngauri u swika zwenezwo Vhaisraele vho vha vha tshi ḓi i dubisela zwioro. Ṋowa iyo yo vha i tshi pfi Nehushthani.

₅Hiskia o vha a tshi fulufhela Muṋe washu Mudzimu wa Israele. A ho ngo vha na ane a nga Hiskia kha mahosi oṱhe a Juda, vho mu rangaho phanḓa na vho mu tevhelaho. ₆O nambatela Muṋe washu a si vhuye a mu shandukela, a tevhedza ndayo dze Muṋe washu a ṋea Mushe. ₇Muṋe washu o vha e nae, zwoṱhe zwe a ita zwa mu nakela. Hiskia a shandukela khosi ya Ashuru, a si tsha mu shumela. ₈Hiskia a kunda Vhafilista, a kunda miḓi yoṱhe, mihulwane ya mitsheṱo na ine ya tou vha na tshiingamo fhedzi, u vhuya u swika Gaza na shango ḽo hu tangaho.

₉Nga ṅwaha wa vhuṋa wa muvhuso wa khosi Hiskia, we wa vha u ṅwaha wa vhuṱanu na vhuvhili wa muvhuso wa Hoshia ṅwana wa Ela, khosi ya Israele, Shalamanesere khosi ya Ashuru a dia Israele, a govhela muḓi wa Samaria. ₁₀Musi hu tshi fhela ṅwaha wa vhuraru Vhaashuru vha dzhia uyo muḓi. Muḓi wa Samaria wo thubiwa nga ṅwaha wa vhuṱanu na vhuthihi wa muvhuso wa Hiskia, we wa vha u ṅwaha wa vhuṱanu na vhuṋa wa muvhuso wa Hoshia khosi ya Israele. ₁₁Khosi ya Ashuru ya thuba Vhaisraele ya vha isa Ashuru, vhaṅwe ya vha vhea muḓini wa Hala, vhaṅwe ya vha vhea tsini ha mulambo wa Haboro dzinguni ḽa Gozani, vhaṅwe ya vha vhea miḓini ya Mede. ₁₂Muḓi wa Samaria wo thuthwa nge Vhaisraele vha si thetshelese Muṋe washu Mudzimu wavho, vha vhofholola mulanga wawe, vha nyadza zwoṱhe zwe Mushe muḓinḓa wa Muṋe washu a vha laya. Ndayo idzo a vho ngo dzi thetshelesa, a vho ngo dzi tevhedza.

₁₃Nga ṅwaha wa 14 wa muvhuso wa khosi Hiskia, Sanakheribi khosi ya Ashuru a dia miḓi yoṱhe ya Juda yo tangwaho nga mitsheṱo, a i thuba. ₁₄Ndi hone Hiskia khosi ya Juda a tshi ruma vhaḓinḓa vha ya ha Sanakheribi khosi ya Ashuru we a vha e muḓini wa Lakhishi a ri, “Ndo khakha. Nga vha nnditshe, nṋe ndi ḓo lifha zwoṱhe zwine vha ri ndi lifhe.” Khosi ya Ashuru ya lifhisa khosi Hiskia wa Juda siliva ya khilogiramu dza 10 000 na musuku wa khilogiramu dza 1 000. ₁₅Hiskia a ṋea Sanakheribi siliva yoṱhe ye ya vha i thembeleni ya Muṋe washu na mbulungeloni dza pfamo ya musanda. ₁₆Zwenezwo Hiskia khosi ya Juda a kwatula musuku we wa vha wo fhoma mahothi na mihangammbwa ya thembele ya Muṋe washu, a u ṋea Sanakheribi khosi ya Ashuru.

₁₇Khosi ya Ashuru a ruma mmbi khulu i tshi bva Lakhishi i tshi yo dia khosi Hiskia e Jerusalema, i na mulangammbi wawe muhulu na gota ḽawe ḽihulwane na muḓinḓa muhulwane. Vha swika Jerusalema, vha ima tsini ha mugero une wa bva ishani ḽa nṱha, hu shumaho vhaluki vha masila. ₁₈Vha vhidzisa khosi Hiskia, a ruma Eliakimu ṅwana wa Hilikia, we a vha a tshi langa pfamo, na Shebena muṅwaleli wa khosi, na Jua ṅwana wa Asafu, tshanḓa tsha khosi, vha bva vha yo ṱangana navho. ₁₉Mulangammbi a vha vhudza a ri, “Tshimbilani ni yo vhudza Hiskia ni ri, ‘Thovhele muhulu khosi ya Ashuru u ri: Tshe wa ḓitika ngatsho ndi mini? ₂₀U vhona unga u amba ndi u kona nndwa? Ndi hone u na mmbi? Wo ḓitika nga nnyi, zwine wa vhuya wa ntshandukela? ₂₁Zwino vhona, u ḓitika nga Vhaegipita, lubaḓa holuḽa lwa luṱanga lwo vunḓeaho, lune arali muthu a lu gogoḓela lwa mu runga tshanḓa lwa mu huvhadza! Vhoṱhe vhane vha ḓitika nga Farao khosi ya Egipita vha ḓo wana o tou ralo.

₂₂“ ‘Zwino arali wa ri ni ḓitika nga Yahavee Mudzimu waṋu, a si Ene we Hiskia a thutha zwitembele zwawe zwa zwikwarani, na aḽiṱari dzawe, a tshi vhudza vhathu vha Juda na vha Jerusalema a ri vha fanela u luvha aḽiṱarini iyi Jerusalema. ₂₃Zwino iḓa u betshane na muṋe wanga khosi ya Ashuru: nṋe ndi ḓo u ṋea bere dza 2 000 arali u na vhanameli vhadzo. ₂₄Hufha u sa vhuyi wa kona u imedzana na gota zwaḽo ḽa muṋe wanga. U songo ḓitika nga Vhaegipita u tshi ri vha ḓo u ṋea dzigariki na vhanameli vha dzibere! ₂₅Kani-ha u vhona unga nṋe ndo ḓa u dia fhethu fhano nda hu phusukanya ndi songo rumiwa nga Yahavee? Ndi Ene Yahavee we a mmbudza uri ndi die shango heḽino ndi ḽi phusukanye.’ ”

₂₆Ndi hone Elikana ṅwana wa Hilikia na Shebena na Jua vha tshi vhudza uḽa muḓinḓa muhulwane vha ri, “Nga vha ambe na riṋe nga Tshiaramu, ri a tshi pfa. Vha songo amba Tshiheberu vhathu vho dzulaho kha mutsheṱo vha tshi zwi pfa.”

₂₇Hone muḓinḓa muhulwane a fhindula a ri, “Kani-ha ni ri muṋe wanga o nthuma uri ndi ḓe ndi vhudze inwi na muṋe waṋu fhedzi zwithu izwi? Ho ngo nthumela kha vha re mutsheṱoni naa, hufha na vhone vha tshi ḓo ḓi ḽa mababa avho vha nwa muṱambuluwo wavho unga inwi!”

₂₈Ndi hone uyo muḓinḓa muhulwane a tshi ima a vhidzelela nga Tshiheberu a ri, “Thetshelesani maipfi a thovhele muhulu khosi ya Ashuru! ₂₉Thovhele u ri, ‘Ni songo fhurwa nga Hiskia, a nga si ni lamulele zwanḓani zwanga. ₃₀Ni songo tenda Hiskia a tshi ri ni ḓitike nga Yahavee, a tshi ri: Vhukumakuma Yahavee u ḓo ri lamulela, muḓi houno u nga si kumedzwe khosi ya Ashuru.’ ₃₁Hiskia ni songo mu thetshelesa. Khosi ya Ashuru i ri, ‘Nga hu vhe na mulalo, ibvani muḓini ni ḓe ni nṱanganedze. Ndi hone muṅwe na muṅwe waṋu a tshi ḓo fula munḓirivhe wawe na muhuyu wawe a ḽa, a ka na maḓi tshisimani tshawe a nwa, ₃₂ndi vhuye ndi ḓe u ni dzhia nda ni isa shangoni ḽine ḽa nga ḽaṋu, shango ḽa goroi na waini, shango ḽa zwiḽiwa na masimu a minḓirivhe, shango ḽa miri ya miolivi na ṋotshi. Nangani u tshila, hu si u fa! Hiskia ni songo mu thetshelesa, ngauri u khou ni fhura hezwi a tshi ri Yahavee u ḓo ni lamulela. ₃₃Ndi lufhio lushaka lwe mudzimu walwo wa vhuya wa lamulela shango ḽawe zwanḓani zwa khosi ya Ashuru? ₃₄Midzimu ya Hamathi na Ariphada i ngafhi zwino? Midzimu ya Sefaravaimi na Hena na Iva i ngafhi? Yo vhuya ya lamukisa Samaria zwanḓani zwanga naa?

₃₅“ ‘Kha midzimu yoṱhe ya tshakha dzoṱhe ndi ufhio we wa kona u lamulela shango ḽawo zwanḓani zwanga inwi ni tshi vho ri Yahavee u ḓo kona u lamulela Jerusalema?’ ”

₃₆Hone vhathu vha sokou tshete vha si fhindule tshithu, nge khosi Hiskia a vha o vha laya uri vha songo mu fhindula. ₃₇Ndi hone Eliakimu ṅwana wa Hilikia, mulangi wa pfamo ya musanda, na Shebena muṅwaleli wa khosi, na Jua ṅwana wa Asafu, tshanḓa tsha khosi, vha tshi kherukanya zwiambaro zwavho nga u ṱungufhala, vha ya ha Hiskia vha swika vha mu vhudza zwe mulangammbi wa Ashuru a amba.