Hoshia khosi ya Israele (731-723 BC)
1Nga ṅwaha wa 12 wa muvhuso wa Ahasi khosi ya Juda, Hoshia ṅwana wa Ela a vha khosi ya Israele, a vhusa e Samaria a fhedza miṅwaha miṱanu na miṋa. 2Hoshia a ita zwi sa takadzi Muṋe washu, naho vhuvhi hawe vhu songo swika kha ha mahosi a Israele o mu rangaho phanḓa. 3Shalamanesere khosi ya Ashuru a ḓa a dia Hoshia. Hoshia a vha gota ḽawe a thela muthelo wa Shalamanesere. 4Hone khosi ya Ashuru ya sala i tshi zwi wana uri Hoshia o i shandukela; o vha o ruma vhaḓinḓa ha Suu khosi ya Egipita uri vha vhofhe mulanga, a litsha na u thela muthelo wa khosi ya Ashuru we a vha a tshi u thela ṅwaha na ṅwaha. Ndi zwe Shalamanesere a mu fara a mu hoṋela dzhele.
U fhalala ha muḓi wa Samaria (722 BC)
5Shalamanesere khosi ya Ashuru a mbo dia shango ḽoṱhe ḽa Israele, a govhela muḓi wa Samaria a fhedza miṅwaha miraru. 6Nga ṅwaha wa vhuṱanu na vhuṋa wa muvhuso wa Hoshia, khosi ya Ashuru ya thuba Samaria, ya kumba Vhaisraele ya vha isa Ashuru vha vha mathubwa, vhaṅwe ya vha vhea muḓini wa Hala, vhaṅwe ya vha vhea tsini ha mulambo wa Haboro dzinguni ḽa Gozani, vhaṅwe ya vha vhea miḓini ya Mede.
7Zwoṱhe hezwo zwo itea nge Vhaisraele vha khakhela Muṋe washu Mudzimu wavho we a vha pfulusa Egipita vha tshi khou kandeledzwa nga Farao khosi ya Egipita. Vho luvha miṅwe midzimu, 8vha tshi edzisa maitele a tshakha dze Muṋe washu a dzi thatha vhone vha tshi swika, vha edzisa na maitele o ḓiswaho nga mahosi a Israele. 9Vhaisraele vha endela u nyefula Muṋe washu Mudzimu wavho nga zwo bvaho nḓilani. Vha ḓifhaṱela zwitembele zwa u luvha midzimu miḓini yavho yoṱhe, kha ine ya tou vha na tshiingamo fhedzi, na kha yo tangeledzwaho nga mitsheṱo. 10Vha imisa matombo a zwitungulo na thanda dza Ashera mudzimu wa musadzi tshikwarani tshiṅwe na tshiṅwe na fhasi ha muri muṅwe na muṅwe wo bvukaho. 11Vha fhisa zwioro hoṱhe hune ha luvhiwa midzimu, unga tshakha dze Muṋe washu a dzi thatha vha tshi swika. Vha ita zwithu zwo vhifhaho zwe zwa sinyusa Muṋe washu. 12Vha luvha midzimu i nengisaho, naho Muṋe washu o vha o ri, “Ni songo vhuya na ita zwi no nga zwenezwo.”
13Muṋe washu o kaidza Vhaisraele na Vhajuda nga milomo ya vhaporofita vhawe na vhaḓinḓa vhawe vhoṱhe a ri, “Laṱani nḓila dzaṋu mmbi. Vhulungani ndayo dzanga, ni tshi tevhedza mulayo woṱhe we nda laya vhomakhulukuku waṋu uri vha u tevhedze, nda u swikisa kha inwi nga vhaḓinḓa vhanga vhaporofita.”
14Hone vha si thetshelese, vha ita tshipimbi unga vhomakhulukuku wavho vhe vha si fulufhele Muṋe washu Mudzimu wavho. 15Vha landula ndayo dzawe na mulanga we a vhofha na vhomakhulukuku wavho na zwe a vha laya. Vha luvha zwitungulo zwi si na mushumo, na vhone vhaṋe vha fhedza vhe si tshithu. Vha edzisa tshakha dzi dzulaho tsini navho, naho Muṋe washu o vha laya a ri, “Ni songo vha edzisa.” 16Vha ṱutshela ndayo dzoṱhe dza Muṋe washu Mudzimu wavho, vha ḓiitela zwitungulo zwivhili nga tshivhumbeo tsha mbohwana, na thanda ya Ashera mudzimu wa musadzi. Vha gwadamela masambi oṱhe a dziṋaledzi, vha luvha na Baali. 17Vha ṋekedza vhana vhavho vha vhatuka na vha vhasidzana vha vha ita zwiṱhavhelo zwi fhiswaho. Vha edzisa zwa u tungula na zwa manditi, vha tou ḓikumedza kha u ita zwi sa takadzi Muṋe washu, u ralo ha vha u mu sinyusa. 18Ndi zwe Muṋe washu a sinyutshela Vhaisraele, a si tsha funa u vha vhona, ha sala tsinde ḽa Juda fhedzi.
19Hone na tsinde ḽa Juda vha si tevhedze ndayo dza Muṋe washu Mudzimu wavho. Vho edzisa zwo ḓiswaho nga Vhaisraele. 20Ndi zwe Muṋe washu a landula lushaka lwoṱhe lwa Israele, a vha pfisa vhuṱungu, a vha kumedza vhaṱanguli u vhuya u swika a si tsha funa na u vha vhona.
21Musi Muṋe washu o no tumula Vhaisraele kha nnḓu ya Dafita, vha dzhia Jerobiamu ṅwana wa Nebati vha mu vhumba khosi yavho. Jerobiamu a xedza Vhaisraele vha ṱutshela Muṋe washu, a vha itisa vhutshinyi vhuhulu. 22Vhaisraele vha ḓi omelela vhuvhi hoṱhe ha Jerobiamu, vha si vhu laṱe, 23Muṋe washu a vhuya a vha sudzulusa a si tsha vha vhona, nga he a dzula o vha vhudza nga milomo ya vhaporofita vhoṱhe vhaḓinḓa vhawe. Ndi zwe Vhaisraele vha hwaliwa shangoni ḽavho vha iswa vhuthubwani Ashuru, na zwino vha henengei.
Vhatsinda vha tshi fhaṱa kha ḽa Israele
24Khosi ya Ashuru ya dzhia vhathu miḓini ya Babele na Khutha na Iva na Hamathi na Sefaravaimi, ya vha dzudza miḓini ya Samaria vhudzuloni ha Vhaisraele vho iswaho vhuthubwani. Vha dzhia shango ḽa Samaria vha dzula miḓini yaḽo. 25Musi vha tshi thoma u dzula henefho, vho vha vha sa luvhi Muṋe washu, zwenezwo a vha rumela ndau dza vhulaha vhaṅwe vhavho. 26Mafhungo ayo a swikiswa ha khosi ya Ashuru ha pfi, “Vhathu vhe vha vha pfulusa vha vha dzudza miḓini ya Samaria a vha ḓivhi milayo ya mudzimu wa iḽo shango. O vha rumela ndau dzine dza khou vha fhedza ngauri a vha ḓivhi milayo yawe.”
27Khosi ya Ashuru ya ri hu dzhiwe muṅwe wa vhotshifhe o iswaho vhuthubwani, a vhuye, a dzule shangoni ḽa Samaria a laye vhathu milayo ya mudzimu wa shango ḽeneḽo. 28Ndi hone muṅwe wa vhotshifhe vhe vha kumbiwa Samaria vha iswa vhuthubwani a tshi ḓa a dzula Bethele, a vha funza u luvha Muṋe washu.
29Naho zwo ralo, lushaka luṅwe na luṅwe lwa ḓiitela midzimu yalwo miḓini yalwo, vha i vhea zwitembeleni zwa zwikwarani zwo fhaṱwaho nga vhathu vha Samaria. 30Vhathu vha Babele vha ita tshitungulo tsha mudzimu Sukotho Benotho, vha Khutha vha ita tshitungulo tsha Neregala, vha Hamathi vha ita tshitungulo tsha Ashima, 31vha Iva vha ita tshitungulo tsha Nibahasi na Tharathaka, vha Sefaravaimi vha dzhia vhana vhavho vha vha fhisela Adiramelekhe na Anamelekhe midzimu ya Vhasefaravaimi. 32Vhathu havho vho vha vha tshi luvha Muṋe washu, vha dovha vha ita na u nanga vhathu vha havho uri vha vhe vhotshifhe vhavho vha zwikwarani. 33Vho vha vha tshi luvha Muṋe washu, vha dovha vha shumela na midzimu yavho vha tshi tevhedza maitele a tshakha dze vha ḓiswa vha tshi bva khadzo.
34Na ṋamusi vha tshee vho nambatela maitele avho eneaḽa a kale. A vha luvhi Muṋe washu, a vha tevhedzi milayo na ndaela na pfunzo na ndayo dze Muṋe washu a ṋea vhaḓuhulu vha Jakopo, we a ri u pfi Israele. 35Musi Muṋe washu a tshi vhofha mulanga na Vhaisraele, o vha laya a ri, “Ni songo luvha miṅwe midzimu kana na i gwadamela kana na i shumela kana na i ṋekedza nduvho. 36Ni fanela u luvha Yahavee fhedzi. Ndi Ene we a ni pfulusa Egipita nga maanḓa mahulu o imisa tshanḓa, luvhani Ene ni mu gwadamele, ni mu ṋekedze nduvho. 37Ni vhone uri nga misi ni vhulunge milayo na ndaela na ndayo na pfunzo ye a ni ṅwalela. Ni songo vhuya na luvha miṅwe midzimu. 38Ni songo hangwa mulanga we a vhofha na inwi, ni songo luvha miṅwe midzimu. 39Tshaṋu nga hu vhe u luvha Yahavee Mudzimu waṋu, ndi Ene ane a ḓo ni lamulela kha maswina aṋu oṱhe.”
40Naho zwo ralo vhathu avho vha si thetshelese, vha ḓi omelela maitele avho a kale. 41Na musi avho vhathu vha tshi khou luvha Muṋe washu, vho vha vha tshi ḓi shumela zwitungulo zwavho. Vhana vhavho na vhaḓuhulu vhavho vha kha ḓi edzisa vhomakhulukuku wavho na ṋamusi.
