Khosi i tshi humbela nyeletshedzo kha Yesaya
1Musi khosi Hiskia a tshi tou zwi pfa, a kherukanya zwiambaro zwawe nga u ṱungufhala a ambara madzanganda, a ya thembeleni ya Muṋe washu. 2A ruma Eliakimu mulangi wa pfamo ya musanda, na Shebena muṅwaleli wa khosi, na vhotshifhe vhahulwane, a ri vha ye ha muporofita Yesaya ṅwana wa Amutsi vho ambara-vho madzanganda, 3vha vhudze Yesaya vha ri, “Khosi Hiskia u ri, ‘Uno ndi musi muvhi, wa u seṅwa, wa u nyadziwa, zwi nga musi musadzi e tsini na u vhofholowa, hone a shaya nungo dza u beba. 4Khamusi Muṋe washu Mudzimu waṋu u ḓo pfa maipfi oṱhe a mulangammbi we muṋe wawe khosi ya Ashuru a mu ruma uri a ḓe a nyefule Mudzimu a tshilaho, a mu lifhedze maipfi e a pfiwa nga Muṋe washu Mudzimu wavho. Zwenezwo nga vha rabelele tsalela dzine dza kha ḓi tshila.’ ”
5Musi vhaḓinḓa vha khosi Hiskia vha tshi swika ha Yesaya, 6ene a vha fhindula a ri vha vhudze muṋe wavho vha ri, “Muṋe washu u ri, ‘Ni songo ofha zwe na zwi pfa, ndi amba maipfi e magota a khosi ya Ashuru a nnyefula ngao. 7Ndi ḓo mu dzhenisa muya une musi a tshi ḓo pfa mafhungo ane a ḓo vhudzwa, a ḓo humela shangoni ḽawe, henefho ndi ḓo ita uri a ḽiwe nga pfumo.’ ”
Vhaashuru vha tshi dovha u govhela Jerusalema
8Musi mulangammbi a tshi pfa upfi khosi ya Ashuru yo ṱuwa Lakhishi, a ṱuwa, a wana khosi i tshi khou lwa na vha Libina. 9Zwino Sanakheribi a pfa uri Thiraka, khosi ya Mukushu ya Egipita, u khou ḓa u lwa nae. A dovha a ruma vhaḓinḓa vha ya ha Hiskia khosi ya Juda, a ri 10vha mu vhudze vha ri, “U songo tenda hoyo mudzimu wau ane wa ḓitika ngae a tshi u fhura a ri Jerusalema u nga si kumedzwe khosi ya Ashuru. 11Hufha wo ḓipfela nga dzau nḓevhe zwe mahosi a Ashuru a ita mashango oṱhe, vha tshi a phusukanya tshoṱhe vha a kumedza midzimu ya Ashuru. Zwino iwe u ḓo ponyoka hani? 12Midzimu ya mashango e a phusukanywa nga vhomakhulukuku wanga yo a lamulela naa? Ndi amba midzimu ya Gozani na Harani na Retsefe na vhathu vha Edeni vha dzulaho Thelasara. 13Mahosi a miḓi ya Hamathi na Ariphada na Sefaravaimi na Hena na Iva a ngafhi?”
Thabelo ya khosi Hiskia
14Khosi Hiskia a ṱanganedza luṅwalo lu no bva kha avho vhaḓinḓa, a lu vhala. Ndi hone a tshi ya thembeleni ya Muṋe washu, a lu ṱharamudza phanḓa ha Muṋe washu. 15A rabela Muṋe washu a ri, “Yawee Muṋe washu Mudzimu wa Israele, Iwe wo dzulaho kha khuluṋoni vhukati ha vhakherube, Iwe u woṱhe u Mudzimu a vhusaho mivhuso ya ḽifhasi. Ndi Iwe wo sikaho ḽiṱaḓulu na ḽifhasi. 16Yawee Muṋe washu, nthetshelese u mpfe! Yawee Muṋe washu, bonyolola u vhone, thetshelesa maipfi o bvaho kha Sanakheribi a tshi nyefula Iwe Mudzimu a tshilaho. 17Yawee Muṋe washu, ndi ngoho uri mahosi a Ashuru o lozwa tshakha hedzi a phusukanya mashango adzo. 18Vho fhisa midzimu yadzo nga mulilo vha i lozwa ngauri a si midzimu, i tou vha matanda na matombo yo itwaho nga zwanḓa zwa vhathu. 19Yawee Muṋe washu, Mudzimu washu, zwino ri lamulele zwanḓani zwawe, uri mivhuso yoṱhe ya ḽifhasi i ḓivhe uri Mudzimu ndi Iwe Muṋe washu u woṱhe.”
Phindulo ya Muṋe washu
20Ndi hone Yesaya ṅwana wa Amutsi a tshi swikisa fhungo ha khosi Hiskia a ri, “Muṋe washu Mudzimu wa Israele u ri, ‘Ndo pfa thabelo yau u tshi amba nga Sanakheribi khosi ya Ashuru.’ 21Yahavee a tshi mu fhindula u ri,
“ ‘Musidzana ṅwananyana Tsioni u a u nyadza, u a u sea.
Ṅwananyana Jerusalema u a u goḓa
iwe u tshi khou shavha.
22Wo sema nnyi? Wo nyefula nnyi?
Ipfi ḽau wo ḽi takusela nnyi?
Wo ḓihudza phanḓa ha nnyi?
A si Mukhethwa wa Israele naa?
23Wo ruma vhaḓinḓa vhau uri vha ṱongele Muṋe wa zwoṱhe.
Iwe u tshi amba wo ri:
Ndo gonya miṱumbani ya dzithavha
nga gariki dzanga nnzhi,
nda swika nṱha-nṱha ha Libanoni.
Ndo rema mikedara yayo milapfulapfu,
na mipaini yayo yavhuḓivhuḓi.
Nda swika ngomu-ngomu hayo,
hone tshivhindini tsha maṱaka ayo.
24Ndo bwa bidzi mashangoni asili,
nda nwa maḓi henefho.
Nda ri u kanda milonga ya Nile yoṱhe ya xa.
25“ ‘A u athu vhuya wa zwi pfa uri
ndo dzula ndo dzudzanya zwoṱhe izwo kale-kale?
Ndo zwi dzudzanya maḓuvha aḽa a kale,
zwino ndi hone ndo zwi bveledza,
zwe wa phusukanya miḓi ya mitsheṱo
ya sala i thulwi dza mathukhwi.
26Vhathu vha miḓi iyo vha kulea nungo,
vha hanganea, vha shona.
Vha sala vha tshi nga tsheṋe tsimuni,
vha tshi nga maḓadzwane madala matete,
vha tshi nga hatsi vhu no mela tshiuludzani tsha nnḓu,
vhune ha ri u mela ha mbo ḓi puta.
27“ ‘Na iwe ndi a u ḓivha;
ndi ḓivha hune wa dzula,
na musi u tshi ḓa na musi u tshi ṱuwa
na zwine wa nndyela vhuhali.
28Ndo zwi pfa zwa mbiti dzenedzo dzau
na u ḓihudza hau.
Zwino-ha ndi ḓo u phulela muhala ningoni,
nda u longa ḓomu mulomoni,
nda u humisa nga nḓila ye wa ḓa ngayo.
29“ ‘A vha iwe Hiskia, tshiga tshine nda u ṋea ngetshi:
ṋaṅwaha ni ḓo ḽa zwine zwa tou mela nga zwoṱhe,
mwakani na ḽa maokha a zwenezwo,
nga wa vhuraru na ḓo konou lima na kaṋa,
na ṱavha minḓirivhe, na ḽa mitshelo yayo.
30Tsalela dza nnḓu ya Juda
dzi ḓo dovha dza ṱoka midzi dza aṋwa mitshelo.
31Jerusalema hu ḓo vha na tsalela,
thavhani ya Tsioni ha bva vho ponyokaho lufu.
Nṋe Yahavee Mulangazwoṱhe ndi a fulufhedzea,
ndi ḓo zwi khunyeledza.’
32“Muṋe washu a tshi amba khosi ya Ashuru u ri,
“ ‘U nga si dzhene muḓini hoyu,
na musevhe a u nga u posi;
a hu na ane a ḓo sendela tsini hawo ó fara tshiṱangu,
na u govhelwa a u nga govhelwi.
33U ḓo huma nga nḓila ye wa ḓa ngayo,
hafhano muḓini a u nga dzheni.
Ho amba Nṋe Yahavee.
34Ndi ḓo pilela muḓi hoyu nda u tshidza,
ndi tshi itela Nṋe muṋe na Dafita mulanda wanga.’ ”
35Vhusiku honoho muruṅwa wa Muṋe washu a bva a vhulaha vhanna vha 185 000 mishashani ya Vhaashuru. Vhathu vha tshi vuwa nga matshelo vha wana vho rambalala vhó fa vhoṱhe. 36Ndi hone Sanakheribi khosi ya Ashuru a tshi takuwa a humela Ninive a dzula hone.
37Muṅwe musi a tshi khou luvha thembeleni ya mudzimu wawe Nisirokho, vhana vhawe Adiramelekhe na Sharetsere vha mu vhulaha nga mapanga, vha shavhela shangoni ḽa Ararathi. Ṅwana wawe Esarahadoni a vha khosi vhudzuloni hawe.
